Read Roman Urdu Geo ayyūb 11 Bible Online

ayyūb 11 - Roman Urdu Geo bible

ayyūb 11

¹phir zūfar nāmātī ne jawāb de kar kahā,

²“kyā in tamām bātoṅ kā jawāb nahīṅ denā chāhie? kyā yih ādmī apnī ḳhālī bātoṅ kī binā par hī rāstbāz ṭhahregā?

³kyā terī bemānī bāteṅ logoṅ ke muṅh yūṅ band kareṅgī ki tū āzādī se lān-tān kartā jāe aur koī tujhe sharmindā na kar sake?

⁴allāh se tū kahtā hai, ‘merī tālīm pāk hai, aur terī nazar meṅ maiṅ pāk-sāf hūṅ.’

⁵kāsh allāh ḳhud tere sāth hamkalām ho, wuh apne hoṅṭoṅ ko khol kar tujh se bāt kare!

⁶kāsh wuh tere lie hikmat ke bhed khole, kyūṅki wuh insān kī samajh ke nazdīk mojize se haiṅ. tab tū jān letā ki allāh tere gunāh kā kāfī hissā darguzar kar rahā hai.

⁷kyā tū allāh kā rāz khol saktā hai? kyā tū qādir-e-mutlaq ke kāmil ilm tak pahuṅch saktā hai?

⁸wuh to āsmān se buland hai, chunāṅche tū kyā kar saktā hai? wuh pātāl se gahrā hai, chunāṅche tū kyā jān saktā hai?

⁹us kī lambāī zamīn se baṛī aur chauṛāī samundar se zyādā hai.

¹⁰agar wuh kahīṅ se guzar kar kisī ko giriftār kare yā adālat meṅ us kā hisāb kare to kaun use rokegā?

¹¹kyūṅki wuh farebdih ādmiyoṅ ko jān letā hai, jab bhī use burāī nazar āe to wuh us par ḳhūb dhyān detā hai.

¹²aql se ḳhālī ādmī kis tarah samajh pā saktā hai? yih utnā hī nāmumkin hai jitnā yih ki janglī gadhe se insān paidā ho.

¹³ai ayyūb, apnā dil pūre dhyān se allāh kī taraf māil kar aur apne hāth us kī taraf uṭhā!

¹⁴agar tere hāth gunāh meṅ mulawwas hoṅ to use dūr kar aur apne ḳhaime meṅ burāī basne na de!

¹⁵tab tū be'ilzām hālat meṅ apnā chehrā uṭhā sakegā, tū mazbūtī se khaṛā rahegā aur ḍaregā nahīṅ.

¹⁶tū apnā dukh-dard bhūl jāegā, aur wuh sirf guzare sailāb kī tarah yād rahegā.

¹⁷terī zindagī dopahar kī tarah chamakdār, terī tārīkī subh kī mānind raushan ho jāegī.

¹⁸chūṅki ummīd hogī is lie tū mahfūz hogā aur salāmatī se leṭ jāegā.

¹⁹tū ārām karegā, aur koī tujhe dahshatzadā nahīṅ karegā balki bahut log terī nazar-e-ināyat hāsil karne kī koshish kareṅge.

²⁰lekin bedīnoṅ kī āṅkheṅ nākām ho jāeṅgī, aur wuh bach nahīṅ sakeṅge. un kī ummīd māyūskun hogī.” [8]