Read Roman Urdu Geo ayyūb 12 Bible Online

ayyūb 12 - Roman Urdu Geo bible

ayyūb 12

¹ayyūb ne jawāb de kar kahā,

²“lagtā hai ki tum hī wāhid dānishmand ho, ki hikmat tumhāre sāth hī mar jāegī.

³lekin mujhe samajh hai, is nāte se maiṅ tum se adnā nahīṅ hūṅ. waise bhī kaun aisī bāteṅ nahīṅ jāntā?

⁴maiṅ to apne dostoṅ ke lie mazāq kā nishānā ban gayā hūṅ, maiṅ jis kī duāeṅ allāh suntā thā. hāṅ, maiṅ jo begunāh aur be'ilzām hūṅ dūsroṅ ke lie mazāq kā nishānā ban gayā hūṅ!

⁵jo sukūn se zindagī guzārtā hai wuh musībatzadā ko haqīr jāntā hai. wuh kahtā hai, ‘āo, ham use ṭhokar māreṅ jis ke pāoṅ ḍagmagāne lage haiṅ.’

⁶ġhāratgaroṅ ke ḳhaimoṅ meṅ ārām-o-sukūn hai, aur allāh ko taish dilāne wāle hifāzat se rahte haiṅ, go wuh allāh ke hāth meṅ haiṅ.

⁷tāham tum kahte ho ki jānwaroṅ se pūchh le to wuh tujhe sahīh bāt sikhāeṅge. parindoṅ se patā kar to wuh tujhe durust jawāb deṅge.

⁸zamīn se bāt kar to wuh tujhe tālīm degī, balki samundar kī machhliyāṅ bhī tujhe is kā mafhūm sunāeṅgī.

⁹in meṅ se ek bhī nahīṅ jo na jāntā ho ki rab ke hāth ne yih sab kuchh kiyā hai.

¹⁰usī ke hāth meṅ har jāndār kī jān, tamām insānoṅ kā dam hai.

¹¹kān to alfāz kī yūṅ jāṅch-paṛtāl kartā hai jis tarah zabān khānoṅ meṅ imtiyāz kartī hai.

¹²aur hikmat un meṅ pāī jātī hai jo umrrasīdā haiṅ, samajh muta'addid din guzarne ke bād hī ātī hai.

¹³hikmat aur qudrat allāh kī hai, wuhī maslahat aur samajh kā mālik hai.

¹⁴jo kuchh wuh ḍhā de wuh dubārā tāmīr nahīṅ hogā, jise wuh giriftār kare use āzād nahīṅ kiyā jāegā.

¹⁵jab wuh pānī roke to kāl paṛtā hai, jab use khulā chhoṛe to wuh mulk meṅ tabāhī machā detā hai.

¹⁶us ke pās quwwat aur dānāī hai. bhaṭakne aur bhaṭkāne wālā donoṅ hī us ke hāth meṅ haiṅ.

¹⁷mushīroṅ ko wuh nange pāoṅ apne sāth le jātā hai, qāziyoṅ ko ahmaq sābit kartā hai.

¹⁸wuh bādshāhoṅ kā paṭkā khol kar un kī kamroṅ meṅ rassā bāndhtā hai.

¹⁹imāmoṅ ko wuh nange pāoṅ apne sāth le jātā hai, mazbūtī se khaṛe ādmiyoṅ ko tabāh kartā hai.

²⁰qābil-e-etimād afrād se wuh bolne kī qābiliyat aur buzurgoṅ se imtiyāz karne kī liyāqat chhīn letā hai.

²¹wuh shurafā par apnī hiqārat kā izhār karke zor-āwaroṅ kā paṭkā khol detā hai.

²²wuh andhere ke poshīdā bhed khol detā aur gahrī tārīkī ko raushnī meṅ lātā hai.

²³wuh qaumoṅ ko baṛā bhī banātā aur tabāh bhī kartā hai, ummatoṅ ko muntashir bhī kartā aur un kī qiyādat bhī kartā hai.

²⁴wuh mulk ke rāhnumāoṅ ko aql se mahrūm karke unheṅ aise bayābān meṅ āwārā phirne detā hai jahāṅ rāstā hī nahīṅ.

²⁵tab wuh andhere meṅ raushnī ke baġhair ṭaṭol ṭaṭol kar ghūmte haiṅ. allāh hī unheṅ nashe meṅ dhut sharābiyoṅ kī tarah bhaṭakne detā hai.