Read Roman Urdu Geo ayyūb 13 Bible Online

ayyūb 13 - Roman Urdu Geo bible

ayyūb 13

¹yih sab kuchh maiṅ ne apnī āṅkhoṅ se dekhā, apne kānoṅ se sun kar samajh liyā hai.

²ilm ke lihāz se maiṅ tumhāre barābar hūṅ. is nāte se maiṅ tum se kam nahīṅ hūṅ.

³lekin maiṅ qādir-e-mutlaq se hī bāt karnā chāhtā hūṅ, allāh ke sāth hī mubāhasā karne kī ārzū rakhtā hūṅ.

⁴jahāṅ tak tumhārā tālluq hai, tum sab farebdih lep lagāne wāle aur bekār ḍākṭar ho.

⁵kāsh tum sarāsar ḳhāmosh rahte! aisā karne se tumhārī hikmat kahīṅ zyādā zāhir hotī.

⁶mubāhase meṅ zarā merā mauqif suno, adālat meṅ mere bayānāt par ġhaur karo!

⁷kyā tum allāh kī ḳhātir kajrau bāteṅ pesh karte ho, kyā usī kī ḳhātir jhūṭ bolte ho?

⁸kyā tum us kī jānibdārī karnā chāhte ho, allāh ke haq meṅ laṛnā chāhte ho?

⁹soch lo, agar wuh tumhārī jāṅch kare to kyā tumhārī bāt banegī? kyā tum use yūṅ dhokā de sakte ho jis tarah insān ko dhokā diyā jātā hai?

¹⁰agar tum ḳhufiyā taur par bhī jānibdārī dikhāo to wuh tumheṅ zarūr saḳht sazā degā.

¹¹kyā us kā rob tumheṅ ḳhaufzadā nahīṅ karegā? kyā tum us se saḳht dahshat nahīṅ khāoge?

¹²phir jin kahāwatoṅ kī yād tum dilāte rahte ho wuh rākh kī amsāl sābit hoṅgī, patā chalegā ki tumhārī bāteṅ miṭṭī ke alfāz haiṅ.

¹³ḳhāmosh ho kar mujh se bāz āo! jo kuchh bhī mere sāth ho jāe, maiṅ bāt karnā chāhtā hūṅ.

¹⁴maiṅ apne āp ko ḳhatre meṅ ḍālne ke lie tayyār hūṅ, maiṅ apnī jān par khelūṅgā.

¹⁵shāyad wuh mujhe mār ḍāle. koī bāt nahīṅ, kyūṅki merī ummīd jātī rahī hai. jo kuchh bhī ho meṅ usī ke sāmne apnī rāhoṅ kā difā karūṅga.

¹⁶aur is meṅ maiṅ panāh letā hūṅ ki bedīn us ke huzūr āne kī jur'at nahīṅ kartā.

¹⁷dhyān se mere alfāz suno, apne kān mere bayānāt par dharo.

¹⁸tumheṅ patā chalegā ki maiṅ ne ehtiyāt aur tartīb se apnā muāmalā tayyār kiyā hai. mujhe sāf mālūm hai ki maiṅ haq par hūṅ!

¹⁹agar koī mujhe mujrim sābit kar sake to maiṅ chup ho jāūṅgā, dam chhoṛne tak ḳhāmosh rahūṅgā.

²⁰ai allāh, merī sirf do darḳhwāsteṅ manzūr kar tāki mujhe tujh se chhup jāne kī zarūrat na ho.

²¹pahle, apnā hāth mujh se dūr kar tāki terā ḳhauf mujhe dahshatzadā na kare.

²²dūsre, is ke bād mujhe bulā tāki maiṅ jawāb dūṅ, yā mujhe pahle bolne de aur tū hī is kā jawāb de.

²³mujh se kitne gunāh aur ġhaltiyāṅ huī haiṅ? mujh par merā jurm aur merā gunāh zāhir kar!

²⁴tū apnā chehrā mujh se chhupāe kyūṅ rakhtā hai? tū mujhe kyūṅ apnā dushman samajhtā hai?

²⁵kyā tū hawā ke jhoṅkoṅ ke uṛāe hue patte ko dahshat khilānā chāhtā, ḳhushk bhūse kā tāqqub karnā chāhtā hai?

²⁶yih terā hī faislā hai ki maiṅ talḳh tajriboṅ se guzarūṅ, terī hī marzī hai ki maiṅ apnī jawānī ke gunāhoṅ kī sazā pāūṅ. [9]

²⁷tū mere pāoṅ ko kāṭh meṅ ṭhoṅk kar merī tamām rāhoṅ kī pahrādārī kartā hai. tū mere har ek naqsh-e-qadam par dhyān detā hai,

²⁸go maiṅ mai kī ghisī phaṭī mashk aur kīṛoṅ kā ḳharāb kiyā huā libās hūṅ.