Read Roman Urdu Geo ayyūb 14 Bible Online

ayyūb 14 - Roman Urdu Geo bible

ayyūb 14

¹aurat se paidā huā insān chand ek din zindā rahtā hai, aur us kī zindagī bechainī se bharī rahtī hai.

²phūl kī tarah wuh chand lamhoṅ ke lie phūṭ nikaltā, phir murjhā jātā hai. sāy kī tarah wuh thoṛī der ke bād ojhal ho jātā aur qāim nahīṅ rahtā.

³kyā tū wāqaī ek aisī maḳhlūq kā itne ġhaur se muāinā karnā chāhtā hai? maiṅ kaun hūṅ ki tū mujhe peshī ke lie apne huzūr lāe?

⁴kaun nāpāk chīz ko pāk-sāf kar saktā hai? koī nahīṅ!

⁵insān kī umr to muqarrar huī hai, us ke mahīnoṅ kī tādād tujhe mālūm hai, kyūṅki tū hī ne us ke dinoṅ kī wuh had bāndhī hai jis se āge wuh baṛh nahīṅ saktā.

⁶chunāṅche apnī nigāh us se pher le aur use chhoṛ de tāki wuh mazdūr kī tarah apne thoṛe dinoṅ se kuchh mazā le sake.

⁷agar daraḳht ko kāṭā jāe to use thoṛī bahut ummīd bāqī rahtī hai, kyūṅki ain mumkin hai ki muḍh se koṅpleṅ phūṭ nikleṅ aur us kī naī shāḳheṅ ugtī jāeṅ.

⁸beshak us kī jaṛeṅ purānī ho jāeṅ aur us kā muḍh miṭṭī meṅ ḳhatm hone lage,

⁹lekin pānī kī ḳhushbū sūṅghte hī wuh koṅpleṅ nikālne lagegā, aur panīrī kī sī ṭahniyāṅ us se phūṭne lageṅgī.

¹⁰lekin insān farq hai. marte waqt us kī har tarah kī tāqat jātī rahtī hai, dam chhoṛte waqt us kā nām-o-nishān tak nahīṅ rahtā.

¹¹wuh us jhīl kī mānind hai jis kā pānī ojhal ho jāe, us nadī kī mānind jo sukaṛ kar ḳhushk ho jāe.

¹²wafāt pāne wāle kā yihī hāl hai. wuh leṭ jātā aur kabhī nahīṅ uṭhegā. jab tak āsmān qāim hai na wuh jāg uṭhegā, na use jagāyā jāegā.

¹³kāsh tū mujhe pātāl meṅ chhupā detā, mujhe wahāṅ us waqt tak poshīdā rakhtā jab tak terā qahr ṭhanḍā na ho jātā! kāsh tū ek waqt muqarrar kare jab tū merā dubārā ḳhayāl karegā.

¹⁴(kyūṅki agar insān mar jāe to kyā wuh dubārā zindā ho jāegā?) phir maiṅ apnī saḳht ḳhidmat ke tamām din bardāsht kartā, us waqt tak intizār kartā jab tak merī sabukdoshī na ho jātī.

¹⁵tab tū mujhe āwāz detā aur maiṅ jawāb detā, tū apne hāthoṅ ke kām kā ārzūmand hotā.

¹⁶us waqt bhī tū mere har qadam kā shumār kartā, lekin na sirf is maqsad se ki mere gunāhoṅ par dhyān de.

¹⁷tū mere jarāim thaile meṅ bāndh kar us par muhr lagā detā, merī har ġhaltī ko ḍhāṅk detā.

¹⁸lekin afsos! jis tarah pahāṛ gir kar chūr chūr ho jātā aur chaṭān khisak jātī hai,

¹⁹jis tarah bahtā pānī patthar ko ragaṛ ragaṛ kar ḳhatm kartā aur sailāb miṭṭī ko bahā le jātā hai usī tarah tū insān kī ummīd ḳhāk meṅ milā detā hai.

²⁰tū mukammal taur par us par ġhālib ā jātā to wuh kūch kar jātā hai, tū us kā chehrā bigāṛ kar use fāriġh kar detā hai.

²¹agar us ke bachchoṅ ko sarfarāz kiyā jāe to use patā nahīṅ chaltā, agar unheṅ past kiyā jāe to yih bhī us ke ilm meṅ nahīṅ ātā.

²²wuh sirf apne hī jism kā dard mahsūs kartā aur apne lie hī mātam kartā hai.”