Read Roman Urdu Geo ayyūb 15 Bible Online

ayyūb 15 - Roman Urdu Geo bible

ayyūb 15

¹tab ilīfaz temānī ne jawāb de kar kahā,

²“kyā dānishmand ko jawāb meṅ behūdā ḳhayālāt pesh karne chāhieṅ? kyā use apnā peṭ taptī mashriqī hawā se bharnā chāhie?

³kyā munāsib hai ki wuh fuzūl bahs-mubāhasā kare, aisī bāteṅ kare jo befāidā haiṅ? hargiz nahīṅ!

⁴lekin terā rawayyā is se kahīṅ burā hai. tū allāh kā ḳhauf chhoṛ kar us ke huzūr ġhaur-o-ḳhauz karne kā farz haqīr jāntā hai.

⁵terā qusūr hī tere muṅh ko aisī bāteṅ karne kī tahrīk de rahā hai, isī lie tū ne chālākoṅ kī zabān apnā lī hai.

⁶mujhe tujhe qusūrwār ṭhahrāne kī zarūrat hī nahīṅ, kyūṅki terā apnā hī muṅh tujhe mujrim ṭhahrātā hai, tere apne hī hoṅṭ tere ḳhilāf gawāhī dete haiṅ.

⁷kyā tū sab se pahle paidā huā insān hai? kyā tū ne pahāṛoṅ se pahle hī janm liyā?

⁸jab allāh kī majlis mun'aqid ho jāe to kyā tū bhī un kī bāteṅ suntā hai? kyā sirf tujhe hī hikmat hāsil hai?

⁹tū kyā jāntā hai jo ham nahīṅ jānte? tujhe kis bāt kī samajh āī hai jis kā ilm ham nahīṅ rakhte?

¹⁰hamāre darmiyān bhī umrrasīdā buzurg haiṅ, aise ādmī jo tere wālid se bhī būṛhe haiṅ.

¹¹ai ayyūb, kyā terī nazar meṅ allāh kī tasallī dene wālī bātoṅ kī koī ahmiyat nahīṅ? kyā tū is kī qadar nahīṅ kar saktā ki narmī se tujh se bāt kī jā rahī hai?

¹²tere dil ke jazbāt tujhe yūṅ uṛā kar kyūṅ le jāeṅ, terī āṅkheṅ kyūṅ itnī chamak uṭheṅ

¹³ki āḳhirkār tū apnā ġhussā allāh par utār kar aisī bāteṅ apne muṅh se ugal de?

¹⁴bhalā insān kyā hai ki pāk-sāf ṭhahre? aurat se paidā huī maḳhlūq kyā hai ki rāstbāz sābit ho? kuchh bhī nahīṅ!

¹⁵allāh to apne muqaddas ḳhādimoṅ par bhī bharosā nahīṅ rakhtā, balki āsmān bhī us kī nazar meṅ pāk nahīṅ hai.

¹⁶to phir wuh insān par bharosā kyūṅ rakhe jo qābil-e-ghin aur bigaṛā huā hai, jo burāī ko pānī kī tarah pī letā hai.

¹⁷merī bāt sun, maiṅ tujhe kuchh sunānā chāhtā hūṅ. maiṅ tujhe wuh kuchh bayān karūṅga jo mujh par zāhir huā hai,

¹⁸wuh kuchh jo dānishmandoṅ ne pesh kiyā aur jo unheṅ apne bāpdādā se milā thā. un se kuchh chhupāyā nahīṅ gayā thā.

¹⁹(bāpdādā se murād wuh wāhid log haiṅ jinheṅ us waqt mulk diyā gayā jab koī bhī pardesī un meṅ nahīṅ phirtā thā).

²⁰wuh kahte the, bedīn apne tamām din ḍar ke māre taṛaptā rahtā, aur jitne bhī sāl zālim ke lie mahfūz rakhe gae haiṅ utne hī sāl wuh pech-o-tāb khātā rahtā hai.

²¹dahshatnāk āwāzeṅ us ke kānoṅ meṅ gūṅjtī rahtī haiṅ, aur amn-o-amān ke waqt hī tabāhī machāne wālā us par ṭūṭ paṛtā hai.

²²use andhere se bachne kī ummīd hī nahīṅ, kyūṅki use talwār ke lie tayyār rakhā gayā hai.

²³wuh mārā mārā phirtā hai, āḳhirkār wuh giddhoṅ kī ḳhorāk banegā. use ḳhud ilm hai ki tārīkī kā din qarīb hī hai.

²⁴tangī aur musībat use dahshat khilātī, hamlā-āwar bādshāh kī tarah us par ġhālib ātī haiṅ.

²⁵aur wajah kyā hai? yih ki us ne apnā hāth allāh ke ḳhilāf uṭhāyā, qādir-e-mutlaq ke sāmne takabbur dikhāyā hai.

²⁶apnī moṭī aur mazbūt ḍhāl kī panāh meṅ akaṛ kar wuh tezī se allāh par hamlā kartā hai.

²⁷go is waqt us kā chehrā charbī se chamaktā aur us kī kamr moṭī hai,

²⁸lekin āindā wuh tabāhshudā shahroṅ meṅ basegā, aise makānoṅ meṅ jo sab ke chhoṛe hue haiṅ aur jo jald hī patthar ke ḍher ban jāeṅge.

²⁹wuh amīr nahīṅ hogā, us kī daulat qāim nahīṅ rahegī, us kī jāydād mulk meṅ phailī nahīṅ rahegī.

³⁰wuh tārīkī se nahīṅ bachegā. sholā us kī koṅploṅ ko murjhāne degā, aur allāh use apne muṅh kī ek phūṅk se uṛā kar tabāh kar degā.

³¹wuh dhoke par bharosā na kare, warnā wuh bhaṭak jāegā aur us kā ajr dhokā hī hogā.

³²waqt se pahle hī use is kā pūrā muāwazā milegā, us kī koṅpal kabhī nahīṅ phale phūlegī.

³³wuh angūr kī us bel kī mānind hogā jis kā phal kachchī hālat meṅ hī gir jāe, zaitūn ke us daraḳht kī mānind jis ke tamām phūl jhaṛ jāeṅ.

³⁴kyūṅki bedīnoṅ kā jaththā banjar rahegā, aur āg rishwatḳhoroṅ ke ḳhaimoṅ ko bhasm karegī.

³⁵un ke pāoṅ dukh-dard se bhārī ho jāte, aur wuh burāī ko janm dete haiṅ. un kā peṭ dhokā hī paidā kartā hai.”