Read Roman Urdu Geo ayyūb 16 Bible Online

ayyūb 16 - Roman Urdu Geo bible

ayyūb 16

¹ayyūb ne jawāb de kar kahā,

²“is tarah kī maiṅ ne bahut sī bāteṅ sunī haiṅ, tumhārī tasallī sirf dukh-dard kā bāis hai.

³kyā tumhārī laffāzī kabhī ḳhatm nahīṅ hogī? tujhe kyā chīz bechain kar rahī hai ki tū mujhe jawāb dene par majbūr hai?

⁴agar maiṅ tumhārī jagah hotā to maiṅ bhī tumhārī jaisī bāteṅ kar saktā. phir maiṅ bhī tumhāre ḳhilāf puralfāz taqrīreṅ pesh karke taubā taubā kah saktā.

⁵lekin maiṅ aisā na kartā. maiṅ tumheṅ apnī bātoṅ se taqwiyat detā, afsos ke izhār se tumheṅ taskīn detā.

⁶lekin mere sāth aisā sulūk nahīṅ ho rahā. agar maiṅ bolūṅ to mujhe sukūn nahīṅ miltā, agar chup rahūṅ to merā dard dūr nahīṅ hotā.

⁷lekin ab allāh ne mujhe thakā diyā hai, us ne mere pūre gharāne ko tabāh kar diyā hai.

⁸us ne mujhe sukaṛne diyā hai, aur yih bāt mere ḳhilāf gawāh ban gaī hai. merī dublī-patlī hālat khaṛī ho kar mere ḳhilāf gawāhī detī hai.

⁹allāh kā ġhazab mujhe phāṛ rahā hai, wuh merā dushman aur merā muḳhālif ban gayā hai jo mere ḳhilāf dāṅt pīs pīs kar mujhe apnī āṅkhoṅ se chhed rahā hai. [10]

¹⁰log galā phāṛ kar merā mazāq uṛāte, mere gāl par thappaṛ mār kar merī be'izzatī karte haiṅ. sab ke sab mere ḳhilāf muttahid ho gae haiṅ.

¹¹allāh ne mujhe sharīroṅ ke hawāle kar diyā, mujhe bedīnoṅ ke changul meṅ phaṅsā diyā hai.

¹²maiṅ sukūn se zindagī guzār rahā thā ki us ne mujhe pāsh pāsh kar diyā, mujhe gale se pakaṛ kar zamīn par paṭaḳh diyā. us ne mujhe apnā nishānā banā liyā,

¹³phir us ke tīrandāzoṅ ne mujhe gher liyā. us ne berahmī se mere gurdoṅ ko chīr ḍālā, merā pit zamīn par unḍel diyā.

¹⁴bār bār wuh merī qilābandī meṅ raḳhnā ḍāltā rahā, pahalwān kī tarah mujh par hamlā kartā rahā.

¹⁵maiṅ ne ṭāṅke lagā kar apnī jild ke sāth ṭāṭ kā libās joṛ liyā hai, apnī shān-o-shaukat ḳhāk meṅ milāī hai.

¹⁶ro ro kar merā chehrā sūj gayā hai, merī palakoṅ par ghanā andherā chhā gayā hai.

¹⁷lekin wajah kyā hai? mere hāth to zulm se barī rahe, merī duā pāk-sāf rahī hai.

¹⁸ai zamīn, mere ḳhūn ko mat ḍhāṅpnā! merī āh-o-zārī kabhī ārām kī jagah na pāe balki gūṅjtī rahe.

¹⁹ab bhī merā gawāh āsmān par hai, mere haq meṅ gawāhī dene wālā bulandiyoṅ par hai.

²⁰merī āh-o-zārī merā tarjumān hai, maiṅ beḳhwābī se allāh ke intizār meṅ rahtā hūṅ.

²¹merī āheṅ allāh ke sāmne fānī insān ke haq meṅ bāt kareṅgī, us tarah jis tarah koī apne dost ke haq meṅ bāt kare.

²²kyūṅki thoṛe hī sāloṅ ke bād maiṅ us rāste par rawānā ho jāūṅgā jis se wāpas nahīṅ āūṅgā.