Read Roman Urdu Geo ayyūb 17 Bible Online

ayyūb 17 - Roman Urdu Geo bible

ayyūb 17

¹merī rūh shikastā ho gaī, mere din bujh gae haiṅ. qabristān hī mere intizār meṅ hai.

²mere chāroṅ taraf mazāq hī mazāq sunāī detā, merī āṅkheṅ logoṅ kā haṭdharm rawayyā deḳhte deḳhte thak gaī haiṅ.

³ai allāh, merī zamānat mere apne hāthoṅ se qabūl farmā, kyūṅki aur koī nahīṅ jo use de.

⁴un ke zahnoṅ ko tū ne band kar diyā, is lie to un se izzat nahīṅ pāegā.

⁵wuh us ādmī kī mānind haiṅ jo apne dostoṅ ko ziyāfat kī dāwat de, hālāṅki us ke apne bachche bhūke mar rahe hoṅ.

⁶allāh ne mujhe mazāq kā yūṅ nishānā banāyā hai ki maiṅ qaumoṅ meṅ ibratangez misāl ban gayā hūṅ. mujhe deḳhte hī log mere muṅh par thūkte haiṅ.

⁷merī āṅkheṅ ġham khā khā kar dhundlā gaī haiṅ, mere āzā yahāṅ tak sūkh gae ki sāyā hī rah gayā hai.

⁸yih dekh kar sīdhī rāh par chalne wāloṅ ke roṅgṭe khaṛe ho jāte aur begunāh bedīnoṅ ke ḳhilāf mushta'il ho jāte haiṅ.

⁹rāstbāz apnī rāh par qāim rahte, aur jin ke hāth pāk haiṅ wuh taqwiyat pāte haiṅ.

¹⁰lekin jahāṅ tak tum sab kā tālluq hai, āo dubārā mujh par hamlā karo! mujhe tum meṅ ek bhī dānā ādmī nahīṅ milegā.

¹¹mere din guzar gae haiṅ. mere wuh mansūbe aur dil kī ārzūeṅ ḳhāk meṅ mil gaī haiṅ

¹²jin se rāt din meṅ badal gaī aur raushnī andhere ko dūr karke qarīb āī thī.

¹³agar maiṅ sirf itnī hī ummīd rakhūṅ ki pātāl merā ghar hogā to yih kaisī ummīd hogī? agar maiṅ apnā bistar tārīkī meṅ bichhā kar

¹⁴qabr se kahūṅ, ‘tū merā bāp hai’ aur kīṛe se, ‘ai merī ammī, ai merī bahan’

¹⁵to phir yih kaisī ummīd hogī? kaun kahegā, ‘mujhe tere lie ummīd nazar ātī hai’?

¹⁶tab merī ummīd mere sāth pātāl meṅ utregī, aur ham mil kar ḳhāk meṅ dhaṅs jāeṅge.”