Read Roman Urdu Geo ayyūb 18 Bible Online

ayyūb 18 - Roman Urdu Geo bible

ayyūb 18

¹bildad sūḳhī ne jawāb de kar kahā,

²“tū kab tak aisī bāteṅ karegā? in se bāz ā kar hosh meṅ ā! tab hī ham sahīh bāt kar sakeṅge.

³tū hameṅ ḍangar jaise ahmaq kyūṅ samajhtā hai?

⁴go tū āg-bagūlā ho kar apne āp ko phāṛ rahā hai, lekin kyā tere bāis zamīn ko wīrān honā chāhie aur chaṭānoṅ ko apnī jagah se khisaknā chāhie? hargiz nahīṅ!

⁵yaqīnan bedīn kā charāġh bujh jāegā, us kī āg kā sholā āindā nahīṅ chamkegā.

⁶us ke ḳhaime meṅ raushnī andherā ho jāegī, us ke ūpar kī shamā bujh jāegī.

⁷us ke lambe qadam ruk ruk kar āge baṛheṅge, aur us kā apnā mansūbā use paṭaḳh degā.

⁸us ke apne pāoṅ use jāl meṅ phaṅsā dete haiṅ, wuh dām par hī chaltā phirtā hai.

⁹phandā us kī eṛī pakaṛ letā, kamand use jakaṛ letī hai.

¹⁰use phaṅsāne kā rassā zamīn meṅ chhupā huā hai, rāste meṅ phandā bichhā hai.

¹¹wuh aisī chīzoṅ se ghirā rahtā hai jo use qadam-ba-qadam dahshat khilātī aur us kī nāk meṅ dam kartī haiṅ.

¹²āfat use haṛap kar lenā chāhtī hai, tabāhī tayyār khaṛī hai tāki use girte waqt hī pakaṛ le.

¹³bīmārī us kī jild ko khā jātī, maut kā pahlauṭhā us ke āzā ko nigal letā hai.

¹⁴use us ke ḳhaime kī hifāzat se chhīn liyā jātā aur ghasīṭ kar dahshatoṅ ke bādshāh ke sāmne lāyā jātā hai.

¹⁵us ke ḳhaime meṅ āg bastī, us ke ghar par gandhak bikhar jātī hai.

¹⁶nīche us kī jaṛeṅ sūkh jātī, ūpar us kī shāḳheṅ murjhā jātī haiṅ.

¹⁷zamīn par se us kī yād miṭ jātī hai, kahīṅ bhī us kā nām-o-nishān nahīṅ rahtā.

¹⁸use raushnī se tārīkī meṅ dhakelā jātā, duniyā se bhagā kar ḳhārij kiyā jātā hai.

¹⁹qaum meṅ us kī na aulād na nasl rahegī, jahāṅ pahle rahtā thā wahāṅ koī nahīṅ bachegā.

²⁰us kā anjām dekh kar maġhrib ke bāshindoṅ ke roṅgṭe khaṛe ho jāte aur mashriq ke bāshinde dahshatzadā ho jāte haiṅ.

²¹yihī hai bedīn ke ghar kā anjām, usī ke maqām kā jo allāh ko nahīṅ jāntā.”