Read Roman Urdu Geo ayyūb 20 Bible Online

ayyūb 20 - Roman Urdu Geo bible

ayyūb 20

¹tab zūfar nāmātī ne jawāb de kar kahā,

²“yaqīnan mere muztarib ḳhayālāt aur wuh ehsāsāt jo mere andar se ubhar rahe haiṅ mujhe jawāb dene par majbūr kar rahe haiṅ.

³mujhe aisī nasīhat sunanī paṛī jo merī be'izzatī kā bāis thī, lekin merī samajh mujhe jawāb dene kī tahrīk de rahī hai.

⁴kyā tujhe mālūm nahīṅ ki qadīm zamāne se yānī jab se insān ko zamīn par rakhā gayā

⁵sharīr kā fathmand nārā ārizī aur bedīn kī ḳhushī pal bhar kī sābit huī hai?

⁶go us kā qad-o-qāmat āsmān tak pahuṅche aur us kā sar bādaloṅ ko chhue

⁷tāham wuh apne fuzle kī tarah abad tak tabāh ho jāegā. jinhoṅ ne use pahle dekhā thā wuh pūchheṅge, ‘ab wuh kahāṅ hai?’

⁸wuh ḳhwāb kī tarah uṛ jātā aur āindā kahīṅ nahīṅ pāyā jāegā, use rāt kī royā kī tarah bhulā diyā jātā hai.

⁹jis āṅkh ne use dekhā wuh use āindā kabhī nahīṅ dekhegī. us kā ghar dubārā us kā mushāhadā nahīṅ karegā.

¹⁰us kī aulād ko ġharīboṅ se bhīk māṅgnī paṛegī, us ke apne hāthoṅ ko daulat wāpas denī paṛegī.

¹¹jawānī kī jis tāqat se us kī haḍḍiyāṅ bharī haiṅ wuh us ke sāth hī ḳhāk meṅ mil jāegī.

¹²burāī bedīn ke muṅh meṅ mīṭhī hai. wuh use apnī zabān tale chhupāe rakhtā,

¹³use mahfūz rakh kar jāne nahīṅ detā.

¹⁴lekin us kī ḳhurāk peṭ meṅ ā kar ḳharāb ho jātī balki sāṅp kā zahr ban jātī hai.

¹⁵jo daulat us ne nigal lī use wuh ugal degā, allāh hī yih chīzeṅ us ke peṭ se ḳhārij karegā.

¹⁶us ne sāṅp kā zahr chūs liyā, aur sāṅp hī kī zabān use mār ḍālegī.

¹⁷wuh nadiyoṅ se lutfandoz nahīṅ hogā, shahd aur bālāī kī nahroṅ se mazā nahīṅ legā.

¹⁸jo kuchh us ne hāsil kiyā use wuh hazm nahīṅ karegā balki sab kuchh wāpas karegā. jo daulat us ne apne kārobār se kamāī us se wuh lutf nahīṅ uṭhāegā.

¹⁹kyūṅki us ne pasthāloṅ par zulm karke unheṅ tark kiyā hai, us ne aise gharoṅ ko chhīn liyā hai jinheṅ us ne tāmīr nahīṅ kiyā thā.

²⁰us ne peṭ meṅ kabhī sukūn mahsūs nahīṅ kiyā balki jo kuchh bhī chāhtā thā use bachne nahīṅ diyā.

²¹jab wuh khānā khātā hai to kuchh nahīṅ bachtā, is lie us kī ḳhushhālī qāim nahīṅ rahegī.

²²jūṅ hī use kasrat kī chīzeṅ hāsil hoṅgī wuh musībat meṅ phaṅs jāegā. tab dukh-dard kā pūrā zor us par āegā.

²³kāsh allāh bedīn kā peṭ bhar kar apnā bhaṛaktā qahr us par nāzil kare, kāsh wuh apnā ġhazab us par barsāe.

²⁴go wuh lohe ke hathiyār se bhāg jāe, lekin pītal kā tīr use chīr ḍālegā.

²⁵jab wuh use apnī pīṭh se nikāle to tīr kī nok us ke kaleje meṅ se niklegī. use dahshatnāk wāqiāt pesh āeṅge.

²⁶gahrī tārīkī us ke ḳhazānoṅ kī tāk meṅ baiṭhī rahegī. aisī āg jo insānoṅ ne nahīṅ lagāī use bhasm karegī. us ke ḳhaime ke jitne log bach nikle unheṅ wuh khā jāegī.

²⁷āsmān use mujrim ṭhahrāegā, zamīn us ke ḳhilāf gawāhī dene ke lie khaṛī ho jāegī.

²⁸sailāb us kā ghar uṛā le jāegā, ġhazab ke din shiddat se bahtā huā pānī us par se guzaregā.

²⁹yih hai wuh ajr jo allāh bedīnoṅ ko degā, wuh wirāsat jise allāh ne un ke lie muqarrar kī hai.”