Read Roman Urdu Geo ayyūb 22 Bible Online

ayyūb 22 - Roman Urdu Geo bible

ayyūb 22

¹phir ilīfaz temānī ne jawāb de kar kahā,

²“kyā allāh insān se fāidā uṭhā saktā hai? hargiz nahīṅ! us ke lie dānishmand bhī fāide kā bāis nahīṅ.

³agar tū rāstbāz ho bhī to kyā wuh is se apne lie nafā uṭhā saktā hai? hargiz nahīṅ! agar tū be'ilzām zindagī guzāre to kyā use kuchh hāsil hotā hai?

⁴allāh tujhe terī ḳhudātars zindagī ke sabab se malāmat nahīṅ kar rahā. yih na soch ki wuh isī lie adālat meṅ tujh se jawāb talab kar rahā hai.

⁵nahīṅ, wajah terī baṛī badkārī, tere lā-mahdūd gunāh haiṅ.

⁶jab tere bhāiyoṅ ne tujh se qarz liyā to tū ne bilāwajah wuh chīzeṅ apnā lī hoṅgī jo unhoṅ ne tujhe zamānat ke taur par dī thīṅ, tū ne unheṅ un ke kapṛoṅ se mahrūm kar diyā hogā.

⁷tū ne thakemāndoṅ ko pānī pilāne se aur bhūke marne wāloṅ ko khānā khilāne se inkār kiyā hogā.

⁸beshak terā rawayyā is ḳhayāl par mabnī thā ki pūrā mulk tāqatwaroṅ kī milkiyat hai, ki sirf baṛe log us meṅ rah sakte haiṅ.

⁹tū ne bewāoṅ ko ḳhālī hāth moṛ diyā hogā, yatīmoṅ kī tāqat pāsh pāsh kī hogī.

¹⁰isī lie tū phandoṅ se ghirā rahtā hai, achānak hī tujhe dahshatnāk wāqiāt ḍarāte haiṅ.

¹¹yihī wajah hai ki tujh par aisā andherā chhā gayā hai ki tū dekh nahīṅ saktā, ki sailāb ne tujhe ḍubo diyā hai.

¹²kyā allāh āsmān kī bulandiyoṅ par nahīṅ hotā? wuh to sitāroṅ par nazar ḍāltā hai, ḳhwāh wuh kitne hī ūṅche kyūṅ na hoṅ.

¹³to bhī tū kahtā hai, ‘allāh kyā jāntā hai? kyā wuh kāle bādaloṅ meṅ se dekh kar adālat kar saktā hai?

¹⁴wuh ghane bādaloṅ meṅ chhupā rahtā hai, is lie jab wuh āsmān ke gumbad par chaltā hai to use kuchh nazar nahīṅ ātā.’

¹⁵kyā tū us qadīm rāh se bāz nahīṅ āegā jis par badkār chalte rahe haiṅ?

¹⁶wuh to apne muqarrarā waqt se pahle hī sukaṛ gae. un kī bunyādeṅ sailāb se hī uṛā lī gaīṅ.

¹⁷unhoṅ ne allāh se kahā, ‘ham se dūr ho jā,’ aur ‘qādir-e-mutlaq hamāre lie kyā kuchh kar saktā hai?’

¹⁸lekin allāh hī ne un ke gharoṅ ko bharpūr ḳhushhālī se nawāzā, go bedīnoṅ ke bure mansūbe us se dūr hī dūr rahte haiṅ.

¹⁹rāstbāz un kī tabāhī dekh kar ḳhush hue, bequsūroṅ ne un kī haṅsī uṛā kar kahā,

²⁰‘lo, yih dekho, un kī jāydād kis tarah miṭ gaī, un kī daulat kis tarah bhasm ho gaī hai!’

²¹ai ayyūb, allāh se sulah karke salāmatī hāsil kar, tab hī tū ḳhushhālī pāegā.

²²allāh ke muṅh kī hidāyat apnā le, us ke farmān apne dil meṅ mahfūz rakh.

²³agar tū qādir-e-mutlaq ke pās wāpas āe to bahāl ho jāegā, aur tere ḳhaime se badī dūr hī rahegī.

²⁴sone ko ḳhāk ke barābar, ofīr kā ḳhālis sonā wādī ke patthar ke barābar samajh le

²⁵to qādir-e-mutlaq ḳhud terā sonā hogā, wuhī tere lie chāṅdī kā ḍher hogā.

²⁶tab tū qādir-e-mutlaq se lutfandoz hogā aur allāh ke huzūr apnā sar uṭhā sakegā.

²⁷tū us se iltijā karegā to wuh terī sunegā aur tū apnī mannateṅ baṛhā sakegā.

²⁸jo kuchh bhī tū karne kā irādā rakhe us meṅ tujhe kāmyābī hogī, terī rāhoṅ par raushnī chamkegī.

²⁹kyūṅki jo sheḳhī baghārtā hai use allāh past kartā jabki jo pasthāl hai use wuh najāt detā hai.

³⁰wuh bequsūr ko chhuṛātā hai, chunāṅche agar tere hāth pāk hoṅ to wuh tujhe chhuṛāegā.”