Read Roman Urdu Geo ayyūb 23 Bible Online

ayyūb 23 - Roman Urdu Geo bible

ayyūb 23

¹ayyūb ne jawāb meṅ kahā,

²“beshak āj merī shikāyat sarkashī kā izhār hai, hālāṅki maiṅ apnī āhoṅ par qābū pāne kī koshish kar rahā hūṅ.

³kāsh maiṅ use pāne kā ilm rakhūṅ tāki us kī sukūnatgāh tak pahuṅch sakūṅ.

⁴phir maiṅ apnā muāmalā tartībwār us ke sāmne pesh kartā, maiṅ apnā muṅh dalāil se bhar letā.

⁵tab mujhe us ke jawāboṅ kā patā chaltā, maiṅ us ke bayānāt par ġhaur kar saktā.

⁶kyā wuh apnī azīm quwwat mujh se laṛne par sarf kartā? hargiz nahīṅ! wuh yaqīnan mujh par tawajjuh detā.

⁷agar maiṅ wahāṅ us ke huzūr ā saktā to diyānatdār ādmī kī tarah us ke sāth muqaddamā laṛtā. tab maiṅ hameshā ke lie apne munsif se bach nikaltā!

⁸lekin afsos, agar maiṅ mashriq kī taraf jāūṅ to wuh wahāṅ nahīṅ hotā, maġhrib kī jānib baṛhūṅ to wahāṅ bhī nahīṅ miltā.

⁹shimāl maiṅ use ḍhūnḍūṅ to wuh dikhāī nahīṅ detā, junūb kī taraf ruḳh karūṅ to wahāṅ bhī poshīdā rahtā hai.

¹⁰kyūṅki wuh merī rāh ko jāntā hai. agar wuh merī jāṅch-paṛtāl kartā to maiṅ ḳhālis sonā sābit hotā.

¹¹mere qadam us kī rāh meṅ rahe haiṅ, maiṅ rāh se na bāīṅ, na dāīṅ taraf haṭā balki sīdhā us par chaltā rahā.

¹²maiṅ us ke hoṅṭoṅ ke farmān se bāz nahīṅ āyā balki apne dil meṅ hī us ke muṅh kī bāteṅ mahfūz rakhī haiṅ.

¹³agar wuh faislā kare to kaun use rok saktā hai? jo kuchh bhī wuh karnā chāhe use amal meṅ lātā hai.

¹⁴jo bhī mansūbā us ne mere lie bāndhā use wuh zarūr pūrā karegā. aur us ke zahan meṅ mazīd bahut se aise mansūbe haiṅ.

¹⁵isī lie maiṅ us ke huzūr dahshatzadā hūṅ. jab bhī maiṅ in bātoṅ par dhyān dūṅ to us se ḍartā hūṅ.

¹⁶allāh ne ḳhud mujhe shikastādil kiyā, qādir-e-mutlaq hī ne mujhe dahshat khilāī hai.

¹⁷kyūṅki na maiṅ tārīkī se tabāh ho rahā hūṅ, na is lie ki ghane andhere ne mere chehre ko ḍhāṅp diyā hai.