Read Roman Urdu Geo ayyūb 24 Bible Online

ayyūb 24 - Roman Urdu Geo bible

ayyūb 24

¹qādir-e-mutlaq adālat ke auqāt kyūṅ nahīṅ muqarrar kartā? jo use jānte haiṅ wuh aise din kyūṅ nahīṅ deḳhte?

²bedīn apnī zamīnoṅ kī hudūd ko āge pīchhe karte aur dūsroṅ ke rewaṛ lūṭ kar apnī charāgāhoṅ meṅ le jāte haiṅ.

³wuh yatīmoṅ kā gadhā hāṅk kar le jāte aur is shart par bewā ko qarz dete haiṅ ki wuh unheṅ zamānat ke taur par apnā bail de.

⁴wuh zarūratmandoṅ ko rāste se haṭāte haiṅ, chunāṅche mulk ke ġharīboṅ ko sarāsar chhup jānā paṛtā hai.

⁵zarūratmand bayābān meṅ janglī gadhoṅ kī tarah kām karne ke lie nikalte haiṅ. ḳhurāk kā khoj lagā lagā kar wuh idhar udhar ghūmte phirte haiṅ balki registān hī unheṅ un ke bachchoṅ ke lie khānā muhayyā kartā hai.

⁶jo khet un ke apne nahīṅ haiṅ un meṅ wuh fasal kāṭte haiṅ, aur bedīnoṅ ke angūr ke bāġhoṅ meṅ jā kar wuh do chār angūr chun lete haiṅ jo fasal chunane ke bād bāqī rah gae the.

⁷kapṛoṅ se mahrūm rah kar wuh rāt ko barahnā hālat meṅ guzārte haiṅ. sardī meṅ un ke pās kambal tak nahīṅ hotā.

⁸pahāṛoṅ kī bārish se wuh bhīg jāte aur panāhgāh na hone ke bāis pattharoṅ ke sāth lipaṭ jāte haiṅ.

⁹bedīn bāp se mahrūm bachche ko māṅ kī god se chhīn lete haiṅ balki is shart par musībatzadā ko qarz dete haiṅ ki wuh unheṅ zamānat ke taur par apnā shīrḳhwār bachchā de.

¹⁰ġharīb barahnā hālat meṅ aur kapṛe pahne baġhair phirte haiṅ, wuh bhūke hote hue pūle uṭhāe chalte haiṅ.

¹¹zaitūn ke jo daraḳht bedīnoṅ ne saf-dar-saf lagāe the un ke darmiyān ġharīb zaitūn kā tel nikālte haiṅ. pyāsī hālat meṅ wuh sharīroṅ ke hauzoṅ meṅ angūr ko pāoṅ tale kuchal kar us kā ras nikālte haiṅ.

¹²shahr se marne wāloṅ kī āheṅ nikaltī haiṅ aur zaḳhmī log madad ke lie chīḳhte chillāte haiṅ. is ke bāwujūd allāh kisī ko bhī mujrim nahīṅ ṭhahrātā.

¹³yih bedīn un meṅ se haiṅ jo nūr se sarkash ho gae haiṅ. na wuh us kī rāhoṅ se wāqif haiṅ, na un meṅ rahte haiṅ.

¹⁴subhsawere qātil uṭhtā hai tāki musībatzadā aur zarūratmand ko qatl kare. rāt ko chor chakkar kāṭtā hai.

¹⁵zinākār kī āṅkheṅ shām ke dhundalke ke intizār meṅ rahtī haiṅ, yih soch kar ki us waqt maiṅ kisī ko nazar nahīṅ āūṅgā. nikalte waqt wuh apne muṅh ko ḍhāṅp letā hai.

¹⁶ḍākū andhere meṅ gharoṅ meṅ naqb lagāte jabki din ke waqt wuh chhup kar apne pīchhe kunḍī lagā lete haiṅ. nūr ko wuh jānte hī nahīṅ.

¹⁷gahrī tārīkī hī un kī subh hotī hai, kyūṅki un kī ghane andhere kī dahshatoṅ se dostī ho gaī hai.

¹⁸lekin bedīn pānī kī satah par jhāg haiṅ, mulk meṅ un kā hissā malaūn hai aur un ke angūr ke bāġhoṅ kī taraf koī rujū nahīṅ kartā.

¹⁹jis tarah kāl aur jhulastī garmī barf kā pānī chhīn letī haiṅ usī tarah pātāl gunāhgāroṅ ko chhīn letā hai.

²⁰māṅ kā rahm unheṅ bhūl jātā, kīṛā unheṅ chūs letā aur un kī yād jātī rahtī hai. yaqīnan bedīnī lakaṛī kī tarah ṭūṭ jātī hai.

²¹bedīn bāṅjh aurat par zulm aur bewāoṅ se badsulūkī karte haiṅ,

²²lekin allāh zabardastoṅ ko apnī qudrat se ghasīṭ kar le jātā hai. wuh mazbūtī se khaṛe bhī hoṅ to bhī koī yaqīn nahīṅ ki zindā raheṅge.

²³allāh unheṅ hifāzat se ārām karne detā hai, lekin us kī āṅkheṅ un kī rāhoṅ kī pahrādārī kartī rahtī haiṅ.

²⁴lamhā bhar ke lie wuh sarfarāz hote, lekin phir nest-o-nābūd ho jāte haiṅ. unheṅ ḳhāk meṅ milā kar sab kī tarah jamā kiyā jātā hai, wuh gandum kī kaṭī huī bāloṅ kī tarah murjhā jāte haiṅ.

²⁵kyā aisā nahīṅ hai? agar koī muttafiq nahīṅ to wuh sābit kare ki maiṅ ġhaltī par hūṅ, wuh dikhāe ki mere dalāil bātil haiṅ.”