Read Roman Urdu Geo ayyūb 26 Bible Online

ayyūb 26 - Roman Urdu Geo bible

ayyūb 26

¹ayyūb ne jawāb de kar kahā,

²“wāh jī wāh! tū ne kyā ḳhūb use sahārā diyā jo bebas hai, kyā ḳhūb us bāzū ko mazbūt kar diyā jo betāqat hai!

³tū ne use kitne achchhe mashware die jo hikmat se mahrūm hai, apnī samajh kī kitnī gahrī bāteṅ us par zāhir kī haiṅ.

⁴tū ne kis kī madad se yih kuchh pesh kiyā hai? kis ne terī rūh meṅ wuh bāteṅ ḍālīṅ jo tere muṅh se nikal āī haiṅ?

⁵allāh ke sāmne wuh tamām murdā arwāh jo pānī aur us meṅ rahne wāloṅ ke nīche bastī haiṅ ḍar ke māre taṛap uṭhtī haiṅ.

⁶hāṅ, us ke sāmne pātāl barahnā aur us kī gahrāiyāṅ beniqāb haiṅ.

⁷allāh hī ne shimāl ko wīrān-o-sunsān jagah ke ūpar tān liyā, usī ne zamīn ko yūṅ lagā diyā ki wuh kisī chīz se laṭkī huī nahīṅ hai.

⁸us ne apne bādaloṅ meṅ pānī lapeṭ liyā, lekin wuh bojh tale na phaṭe.

⁹us ne apnā taḳht nazaroṅ se chhupā kar apnā bādal us par chhā jāne diyā.

¹⁰us ne pānī kī satah par dāirā banāyā jo raushnī aur andhere ke darmiyān had ban gayā.

¹¹āsmān ke satūn laraz uṭhe. us kī dhamkī par wuh dahshatzadā hue.

¹²apnī qudrat se allāh ne samundar ko thamā diyā, apnī hikmat se rahab azhdahe ko ṭukṛe ṭukṛe kar diyā.

¹³us ke rūh ne āsmān ko sāf kiyā, us ke hāth ne farār hone wāle sāṅp ko chhed ḍālā.

¹⁴lekin aise kām us kī rāhoṅ ke kināre par hī kie jāte haiṅ. jo kuchh ham us ke bāre meṅ sunte haiṅ wuh dhīmī dhīmī āwāz se hamāre kān tak pahuṅchtā hai. to phir kaun us kī qudrat kī kaṛaktī āwāz samajh saktā hai?”