Read Roman Urdu Geo ayyūb 27 Bible Online

ayyūb 27 - Roman Urdu Geo bible

ayyūb 27

¹phir ayyūb ne apnī bāt jārī rakhī,

²“allāh kī hayāt kī qasam jis ne merā insāf karne se inkār kiyā, qādir-e-mutlaq kī qasam jis ne merī zindagī talḳh kar dī hai,

³mere jīte jī, hāṅ jab tak allāh kā dam merī nāk meṅ hai

⁴mere hoṅṭ jhūṭ nahīṅ boleṅge, merī zabān dhokā bayān nahīṅ karegī.

⁵maiṅ kabhī taslīm nahīṅ karūṅga ki tumhārī bāt durust hai. maiṅ be'ilzām hūṅ aur marte dam tak is ke ulaṭ nahīṅ kahūṅgā.

⁶maiṅ isrār kartā hūṅ ki rāstbāz hūṅ aur is se kabhī bāz nahīṅ āūṅgā. merā dil mere kisī bhī din ke bāre meṅ mujhe malāmat nahīṅ kartā.

⁷allāh kare ki mere dushman ke sāth wuhī sulūk kiyā jāe jo bedīnoṅ ke sāth kiyā jāegā, ki mere muḳhālif kā wuh anjām ho jo badkāroṅ ko pesh āegā.

⁸kyūṅki us waqt sharīr kī kyā ummīd rahegī jab use is zindagī se munqate kiyā jāegā, jab allāh us kī jān us se talab karegā?

⁹kyā allāh us kī chīḳheṅ sunegā jab wuh musībat meṅ phaṅs kar madad ke lie pukāregā?

¹⁰yā kyā wuh qādir-e-mutlaq se lutfandoz hogā aur har waqt allāh ko pukāregā?

¹¹ab maiṅ tumheṅ allāh kī qudrat ke bāre meṅ tālīm dūṅgā, qādir-e-mutlaq kā irādā tum se nahīṅ chhupāūṅgā.

¹²dekho, tum sab ne is kā mushāhadā kiyā hai. to phir is qism kī bātil bāteṅ kyūṅ karte ho?

¹³bedīn allāh se kyā ajr pāegā, zālim ko qādir-e-mutlaq se mīrās meṅ kyā milegā?

¹⁴go us ke bachche muta'addid hoṅ, lekin āḳhirkār wuh talwār kī zad meṅ āeṅge. us kī aulād bhūkī rahegī.

¹⁵jo bach jāeṅ unheṅ mohlak bīmārī se qabr meṅ pahuṅchāyā jāegā, aur un kī bewāeṅ mātam nahīṅ kar pāeṅgī.

¹⁶beshak wuh ḳhāk kī tarah chāṅdī kā ḍher lagāe aur miṭṭī kī tarah nafīs kapṛoṅ kā todā ikaṭṭhā kare,

¹⁷lekin jo kapṛe wuh jamā kare unheṅ rāstbāz pahan legā, aur jo chāṅdī wuh ikaṭṭhī kare use bequsūr taqsīm karegā.

¹⁸jo ghar bedīn banā le wuh ghoṅsle kī mānind hai, us ārizī jhoṅpṛī kī mānind jo chaukīdār apne lie banā letā hai.

¹⁹wuh amīr hālat meṅ so jātā hai, lekin āḳhirī dafā. jab apnī āṅkheṅ khol letā to tamām daulat jātī rahī hai.

²⁰us par haulnāk wāqiāt kā sailāb ṭūṭ paṛtā, use rāt ke waqt āṅdhī chhīn letī hai.

²¹mashriqī lū use uṛā le jātī, use uṭhā kar us ke maqām se dūr phaiṅk detī hai.

²²berahmī se wuh us par yūṅ jhapaṭṭā mārtī rahtī hai ki use bār bār bhāgnā paṛtā hai.

²³wuh tāliyāṅ bajā kar apnī hiqārat kā izhār kartī, apnī jagah se āwāze kastī hai.