Read Roman Urdu Geo ayyūb 28 Bible Online

ayyūb 28 - Roman Urdu Geo bible

ayyūb 28

¹yaqīnan chāṅdī kī kāneṅ hotī haiṅ aur aisī jagheṅ jahāṅ sonā ḳhālis kiyā jātā hai.

²lohā zamīn se nikālā jātā aur log patthar pighlā kar tāṅbā banā lete haiṅ.

³insān andhere ko ḳhatm karke zamīn kī gahrī gahrī jaghoṅ tak kachchī dhāt kā khoj lagātā hai, ḳhwāh wuh kitne andhere meṅ kyūṅ na ho.

⁴ek ajnabī qaum surang lagātī hai. jab rassoṅ se laṭke hue kām karte aur insānoṅ se dūr kān meṅ jhūmte haiṅ to zamīn par guzarne wāloṅ ko un kī yād hī nahīṅ rahtī.

⁵zamīn kī satah par ḳhurāk paidā hotī hai jabki us kī gahrāiyāṅ yūṅ tabdīl ho jātī haiṅ jaise us meṅ āg lagī ho.

⁶pattharoṅ se sang-e-lājaward nikālā jātā hai jis meṅ sone ke zarre bhī pāe jāte haiṅ.

⁷yih aise rāste haiṅ jo koī bhī shikārī parindā nahīṅ jāntā, jo kisī bhī bāz ne nahīṅ dekhā.

⁸jangal ke robdār jānwaroṅ meṅ se koī bhī in rāhoṅ par nahīṅ chalā, kisī bhī sherbabar ne in par qadam nahīṅ rakhā.

⁹insān sang-e-chaqmāq par hāth lagā kar pahāṛoṅ ko jaṛ se ulṭā detā hai.

¹⁰wuh patthar meṅ surang lagā kar har qism kī qīmtī chīz dekh letā

¹¹aur zamīndoz nadiyoṅ ko band karke poshīdā chīzeṅ raushnī meṅ lātā hai.

¹²lekin hikmat kahāṅ pāī jātī hai, samajh kahāṅ se miltī hai?

¹³insān us tak jāne wālī rāh nahīṅ jāntā, kyūṅki use mulk-e-hayāt meṅ pāyā nahīṅ jātā.

¹⁴samundar kahtā hai, ‘hikmat mere pās nahīṅ hai,’ aur us kī gahrāiyāṅ bayān kartī haiṅ, ‘yahāṅ bhī nahīṅ hai.’

¹⁵hikmat ko na ḳhālis sone, na chāṅdī se ḳharīdā jā saktā hai.

¹⁶use pāne ke lie na ofīr kā sonā, na beshqīmat aqīq-e-ahmar [12] yā sang-e-lājaward [13] kāfī haiṅ.

¹⁷sonā aur shīshā us kā muqābalā nahīṅ kar sakte, na wuh sone ke zewarāt ke iwaz mil saktī hai.

¹⁸us kī nisbat mūṅgā aur billaur kī kyā qadar hai? hikmat se bharī thailī motiyoṅ se kahīṅ zyādā qīmtī hai.

¹⁹ethūpiyā kā zabarjad [14] us kā muqābalā nahīṅ kar saktā, use ḳhālis sone ke lie ḳharīdā nahīṅ jā saktā.

²⁰hikmat kahāṅ se ātī, samajh kahāṅ se mil saktī hai?

²¹wuh tamām jāndāroṅ se poshīdā rahtī balki parindoṅ se bhī chhupī rahtī hai.

²²pātāl aur maut us ke bāre meṅ kahte haiṅ, ‘ham ne us ke bāre meṅ sirf afwāheṅ sunī haiṅ.’

²³lekin allāh us tak jāne wālī rāh ko jāntā hai, use mālūm hai ki kahāṅ mil saktī hai.

²⁴kyūṅki usī ne zamīn kī hudūd tak dekhā, āsmān tale sab kuchh par nazar ḍālī

²⁵tāki hawā kā wazn muqarrar kare aur pānī kī paimāish karke us kī hudūd muta'ayyin kare.

²⁶usī ne bārish ke lie farmān jārī kiyā aur bādal kī kaṛaktī bijlī ke lie rāstā tayyār kiyā.

²⁷usī waqt us ne hikmat ko dekh kar us kī jāṅch-paṛtāl kī. us ne use qāim bhī kiyā aur us kī tah tak tahqīq bhī kī.

²⁸insān se us ne kahā, ‘suno, allāh kā ḳhauf mānanā hī hikmat aur burāī se dūr rahnā hī samajh hai’.”