Read Roman Urdu Geo ayyūb 29 Bible Online

ayyūb 29 - Roman Urdu Geo bible

ayyūb 29

¹ayyūb ne apnī bāt jārī rakh kar kahā,

²“kāsh maiṅ dubārā māzī ke wuh din guzār sakūṅ jab allāh merī dekh-bhāl kartā thā,

³jab us kī shamā mere sar ke ūpar chamaktī rahī aur maiṅ us kī raushnī kī madad se andhere meṅ chaltā thā.

⁴us waqt merī jawānī urūj par thī aur merā ḳhaimā allāh ke sāy meṅ rahtā thā.

⁵qādir-e-mutlaq mere sāth thā, aur maiṅ apne beṭoṅ se ghirā rahtā thā.

⁶kasrat ke bāis mere qadam dahī se dhoe rahte aur chaṭān se tel kī nadiyāṅ phūṭ kar nikaltī thīṅ.

⁷jab kabhī maiṅ shahr ke darwāze se nikal kar chauk meṅ apnī kursī par baiṭh jātā

⁸to jawān ādmī mujhe dekh kar pīchhe haṭ kar chhup jāte, buzurg uṭh kar khaṛe rahte,

⁹raīs bolne se bāz ā kar muṅh par hāth rakhte,

¹⁰shurafā kī āwāz dab jātī aur un kī zabān tālū se chipak jātī thī.

¹¹jis kān ne merī bāteṅ sunīṅ us ne mujhe mubārak kahā, jis āṅkh ne mujhe dekhā us ne mere haq meṅ gawāhī dī.

¹²kyūṅki jo musībat meṅ ā kar āwāz detā use maiṅ bachātā, besahārā yatīm ko chhuṭkārā detā thā.

¹³tabāh hone wāle mujhe barkat dete the. mere bāis bewāoṅ ke diloṅ se ḳhushī ke nāre ubhar āte the.

¹⁴maiṅ rāstbāzī se mulabbas aur rāstbāzī mujh se mulabbas rahtī thī, insāf merā choġhā aur pagaṛī thā.

¹⁵andhoṅ ke lie maiṅ āṅkheṅ, langaṛoṅ ke lie pāoṅ banā rahtā thā.

¹⁶maiṅ ġharīboṅ kā bāp thā, aur jab kabhī ajnabī ko muqaddamā laṛnā paṛā to maiṅ ġhaur se us ke muāmale kā muāinā kartā thā tāki us kā haq mārā na jāe.

¹⁷maiṅ ne bedīn kā jabṛā toṛ kar us ke dāṅtoṅ meṅ se shikār chhuṛāyā.

¹⁸us waqt merā ḳhayāl thā, ‘maiṅ apne hī ghar meṅ wafāt pāūṅgā, sīmurġh kī tarah apnī zindagī ke dinoṅ meṅ izāfā karūṅga.

¹⁹merī jaṛeṅ pānī tak phailī aur merī shāḳheṅ os se tar raheṅgī.

²⁰merī izzat har waqt tāzā rahegī, aur mere hāth kī kamān ko naī taqwiyat miltī rahegī.’

²¹log merī sun kar ḳhāmoshī se mere mashwaroṅ ke intizār meṅ rahte the.

²²mere bāt karne par wuh jawāb meṅ kuchh na kahte balki mere alfāz halkī sī būṅdā-bāṅdī kī tarah un par ṭapakte rahte.

²³jis tarah insān shiddat se bārish ke intizār meṅ rahtā hai usī tarah wuh mere intizār meṅ rahte the. wuh muṅh pasār kar bahār kī bārish kī tarah mere alfāz ko jazb kar lete the.

²⁴jab maiṅ un se bāt karte waqt muskurātā to unheṅ yaqīn nahīṅ ātā thā, merī un par mehrbānī un ke nazdīk nihāyat qīmtī thī.

²⁵maiṅ un kī rāh un ke lie chun kar un kī qiyādat kartā, un ke darmiyān yūṅ bastā thā jis tarah bādshāh apne dastoṅ ke darmiyān. maiṅ us kī mānind thā jo mātam karne wāloṅ ko tasallī detā hai.