Read Roman Urdu Geo ayyūb 3 Bible Online

ayyūb 3 - Roman Urdu Geo bible

ayyūb 3

¹tab ayyūb bol uṭhā aur apne janm din par lānat karne lagā.

³“wuh din miṭ jāe jab maiṅ ne janm liyā, wuh rāt jis ne kahā, ‘peṭ meṅ laṛkā paidā huā hai!’

⁴wuh din andherā hī andherā ho jāe, ek kiran bhī use raushan na kare. allāh bhī jo bulandiyoṅ par hai us kā ḳhayāl na kare.

⁵tārīkī aur ghanā andherā us par qabzā kare, kāle kāle bādal us par chhāe raheṅ, hāṅ wuh raushnī se mahrūm ho kar saḳht dahshatzadā ho jāe.

⁶ghanā andherā us rāt ko chhīn le jab maiṅ māṅ ke peṭ meṅ paidā huā. use na sāl, na kisī mahīne ke dinoṅ meṅ shumār kiyā jāe.

⁷wuh rāt bāṅjh rahe, us meṅ ḳhushī kā nārā na lagāyā jāe.

⁸jo dinoṅ par lānat bhejte aur liwiyātān azhdahe ko tahrīk meṅ lāne ke qābil hote haiṅ wuhī us rāt par lānat kareṅ.

⁹us rāt ke dhundalke meṅ ṭimṭimāne wāle sitāre bujh jāeṅ, fajr kā intizār karnā befāidā hī rahe balki wuh rāt tulū-e-subh kī palakeṅ [4] bhī na dekhe.

¹⁰kyūṅki us ne merī māṅ ko mujhe janm dene se na rokā, warnā yih tamām musībat merī āṅkhoṅ se chhupī rahtī.

¹¹maiṅ paidāish ke waqt kyūṅ mar na gayā, māṅ ke peṭ se nikalte waqt jān kyūṅ na de dī?

¹²māṅ ke ghuṭnoṅ ne mujhe ḳhushāmdīd kyūṅ kahā, us kī chhātiyoṅ ne mujhe dūdh kyūṅ pilāyā?

¹³agar yih na hotā to is waqt maiṅ sukūn se leṭā rahtā, ārām se soyā hotā.

¹⁴maiṅ un hī ke sāth hotā jo pahle bādshāh aur duniyā ke mushīr the, jinhoṅ ne khanḍarāt az sar-e-nau tāmīr kie.

¹⁵maiṅ un ke sāth hotā jo pahle hukmrān the aur apne gharoṅ ko sone-chāṅdī se bhar lete the.

¹⁶mujhe zāe ho jāne wāle bachche kī tarah kyūṅ na zamīn meṅ dabā diyā gayā? mujhe us bachche kī tarah kyūṅ na dafnāyā gayā jis ne kabhī raushnī na dekhī?

¹⁷us jagah bedīn apnī belagām harkatoṅ se bāz āte aur wuh ārām karte haiṅ jo tag-o-dau karte karte thak gae the.

¹⁸wahāṅ qaidī itmīnān se rahte haiṅ, unheṅ us zālim kī āwāz nahīṅ sunanī paṛtī jo unheṅ jīte jī hāṅktā rahā.

¹⁹us jagah chhoṭe aur baṛe sab barābar hote haiṅ, ġhulām apne mālik se āzād rahtā hai.

²⁰allāh musībatzadoṅ ko raushnī aur shikastādiloṅ ko zindagī kyūṅ atā kartā hai?

²¹wuh to maut ke intizār meṅ rahte haiṅ lekin befāidā. wuh khod khod kar use yūṅ talāsh karte haiṅ jis tarah kisī poshīdā ḳhazāne ko.

²²agar unheṅ qabr nasīb ho to wuh bāġh bāġh ho kar jashn manāte haiṅ.

²³allāh us ko zindā kyūṅ rakhtā jis kī nazaroṅ se rāstā ojhal ho gayā hai aur jis ke chāroṅ taraf us ne bāṛ lagāī hai.

²⁴kyūṅki jab mujhe roṭī khānī hai to hāy hāy kartā hūṅ, merī āheṅ pānī kī tarah muṅh se phūṭ nikaltī haiṅ.

²⁵jis chīz se maiṅ ḍartā thā wuh mujh par āī, jis se maiṅ ḳhauf khātā thā us se merā wāstā paṛā.

²⁶na mujhe itmīnān huā, na sukūn yā ārām balki mujh par bechainī ġhālib āī.”