Read Roman Urdu Geo ayyūb 30 Bible Online

ayyūb 30 - Roman Urdu Geo bible

ayyūb 30

¹lekin ab wuh merā mazāq uṛāte haiṅ, hālāṅki un kī umr mujh se kam hai aur maiṅ un ke bāpoṅ ko apnī bheṛ-bakriyoṅ kī dekh-bhāl karne wāle kuttoṅ ke sāth kām par lagāne ke bhī lāiq nahīṅ samajhtā thā.

²mere lie un ke hāthoṅ kī madad kā kyā fāidā thā? un kī pūrī tāqat to jātī rahī thī.

³ḳhurāk kī kamī aur shadīd bhūk ke māre wuh ḳhushk zamīn kī thoṛī bahut paidāwār katar katar kar khāte haiṅ. har waqt wuh tabāhī aur wīrānī ke dāman meṅ rahte haiṅ.

⁴wuh jhāṛiyoṅ se ḳhatmī kā phal toṛ kar khāte, jhāṛiyoṅ [15] kī jaṛeṅ āg tāpne ke lie ikaṭṭhī karte haiṅ.

⁵unheṅ ābādiyoṅ se ḳhārij kiyā gayā hai, aur log ‘chor chor’ chillā kar unheṅ bhagā dete haiṅ.

⁶unheṅ ghāṭiyoṅ kī ḍhalānoṅ par basnā paṛtā, wuh zamīn ke ġhāroṅ meṅ aur pattharoṅ ke darmiyān hī rahte haiṅ.

⁷jhāṛiyoṅ ke darmiyān wuh āwāzeṅ dete aur mil kar ūṅṭkaṭāroṅ tale dabak jāte haiṅ.

⁸in kamīne aur benām logoṅ ko mār mār kar mulk se bhagā diyā gayā hai.

⁹aur ab maiṅ in hī kā nishānā ban gayā hūṅ. apne gītoṅ meṅ wuh merā mazāq uṛāte haiṅ, merī burī hālat un ke lie mazhakāḳhez misāl ban gaī hai.

¹⁰wuh ghin khā kar mujh se dūr rahte aur mere muṅh par thūkne se nahīṅ rukte.

¹¹chūṅki allāh ne merī kamān kī tāṅt khol kar merī ruswāī kī hai, is lie wuh merī maujūdagī meṅ belagām ho gae haiṅ.

¹²mere dahne hāth hujūm khaṛe ho kar mujhe ṭhokar khilāte aur merī fasīl ke sāth miṭṭī ke ḍher lagāte haiṅ tāki us meṅ raḳhnā ḍāl kar mujhe tabāh kareṅ.

¹³wuh merī qilābandiyāṅ ḍhā kar mujhe ḳhāk meṅ milāne meṅ kāmyāb ho jāte haiṅ. kisī aur kī madad darkār hī nahīṅ.

¹⁴wuh raḳhne meṅ dāḳhil hote aur jauq-dar-jauq tabāhshudā fasīl meṅ se guzar kar āge baṛhte haiṅ.

¹⁵haulnāk wāqiāt mere ḳhilāf khaṛe ho gae haiṅ, aur wuh tez hawā kī tarah mere waqār ko uṛā le jā rahe haiṅ. merī salāmatī bādal kī tarah ojhal ho gaī hai.

¹⁶aur ab merī jān nikal rahī hai, maiṅ musībat ke dinoṅ ke qābū meṅ ā gayā hūṅ.

¹⁷rāt ko merī haḍḍiyoṅ ko chhedā jātā hai, katarne wālā dard mujhe kabhī nahīṅ chhoṛtā.

¹⁸allāh baṛe zor se merā kapṛā pakaṛ kar garebān kī tarah mujhe apnī saḳht girift meṅ rakhtā hai.

¹⁹us ne mujhe kīchaṛ meṅ phaiṅk diyā hai, aur deḳhne meṅ maiṅ ḳhāk aur miṭṭī hī ban gayā hūṅ.

²⁰maiṅ tujhe pukārtā, lekin tū jawāb nahīṅ detā. maiṅ khaṛā ho jātā, lekin tū mujhe ghūrtā hī rahtā hai.

²¹tū mere sāth apnā sulūk badal kar mujh par zulm karne lagā, apne hāth ke pūre zor se mujhe satāne lagā hai.

²²tū mujhe uṛā kar hawā par sawār hone detā, garajte tūfān meṅ ghulne detā hai.

²³hāṅ, ab maiṅ jāntā hūṅ ki tū mujhe maut ke hawāle karegā, us ghar meṅ pahuṅchāegā jahāṅ ek din tamām jāndār jamā ho jāte haiṅ.

²⁴yaqīnan maiṅ ne kabhī bhī apnā hāth kisī zarūratmand ke ḳhilāf nahīṅ uṭhāyā jab us ne apnī musībat meṅ āwāz dī.

²⁵balki jab kisī kā burā hāl thā to maiṅ hamdardī se rone lagā, ġharīboṅ kī hālat dekh kar merā dil ġham khāne lagā.

²⁶tāham mujh par musībat āī, agarche maiṅ bhalāī kī ummīd rakh saktā thā. mujh par ghanā andherā chhā gayā, hālāṅki maiṅ raushnī kī tawaqqo kar saktā thā.

²⁷mere andar sab kuchh muztarib hai aur kabhī ārām nahīṅ kar saktā, merā wāstā taqlīfdih dinoṅ se paṛtā hai.

²⁸maiṅ mātamī libās meṅ phirtā hūṅ aur koī mujhe tasallī nahīṅ detā, hālāṅki maiṅ jamā'at meṅ khaṛe ho kar madad ke lie āwāz detā hūṅ.

²⁹maiṅ gīdaṛoṅ kā bhāī aur uqābī ullū'oṅ kā sāthī ban gayā hūṅ.

³⁰merī jild kālī ho gaī, merī haḍḍiyāṅ taptī garmī ke sabab se jhulas gaī haiṅ.

³¹ab merā sarod sirf mātam karne aur merī bāṅsrī sirf rone wāloṅ ke lie istemāl hotī hai.