Read Roman Urdu Geo ayyūb 31 Bible Online

ayyūb 31 - Roman Urdu Geo bible

ayyūb 31

¹maiṅ ne apnī āṅkhoṅ se ahd bāndhā hai. to phir maiṅ kis tarah kisī kuṅwārī par nazar ḍāl saktā hūṅ?

²kyūṅki insān ko āsmān par rahne wāle ḳhudā kī taraf se kyā nasīb hai, use bulandiyoṅ par basne wāle qādir-e-mutlaq se kyā wirāsat pānā hai?

³kyā aisā nahīṅ hai ki nārāst shaḳhs ke lie āfat aur badkār ke lie tabāhī muqarrar hai?

⁴merī rāheṅ to allāh ko nazar ātī haiṅ, wuh merā har qadam gin letā hai.

⁵na maiṅ kabhī dhoke se chalā, na mere pāoṅ ne kabhī fareb dene ke lie phurtī kī. agar is meṅ zarā bhī shak ho

⁶to allāh mujhe insāf ke tarāzū meṅ tol le, allāh merī be'ilzām hālat mālūm kare.

⁷agar mere qadam sahīh rāh se haṭ gae. merī āṅkheṅ mere dil ko ġhalat rāh par le gaīṅ yā mere hāth dāġhdār hue

⁸to phir jo bīj maiṅ ne boyā us kī paidāwār koī aur khāe, jo fasleṅ maiṅ ne lagāīṅ unheṅ ukhāṛā jāe.

⁹agar merā dil kisī aurat se nājāiz tālluqāt rakhne par uksāyā gayā aur maiṅ is maqsad se apne paṛosī ke darwāze par tāk lagāe baiṭhā

¹⁰to phir allāh kare ki merī bīwī kisī aur ādmī kī gandum pīse, ki koī aur us par jhuk jāe.

¹¹kyūṅki aisī harkat sharmnāk hotī, aisā jurm sazā ke lāiq hotā hai.

¹²aise gunāh kī āg pātāl tak sab kuchh bhasm kar detī hai. agar wuh mujh se sarzad hotā to merī tamām fasal jaṛoṅ tak rākh kar detā.

¹³agar merā naukar-naukarāniyoṅ ke sāth jhagaṛā thā aur maiṅ ne un kā haq mārā

¹⁴to maiṅ kyā karūṅ jab allāh adālat meṅ khaṛā ho jāe? jab wuh merī pūchh-gachh kare to maiṅ use kyā jawāb dūṅ?

¹⁵kyūṅki jis ne mujhe merī māṅ ke peṭ meṅ banāyā us ne unheṅ bhī banāyā. ek hī ne unheṅ bhī aur mujhe bhī rahm meṅ tashkīl diyā.

¹⁶kyā maiṅ ne pasthāloṅ kī zarūriyāt pūrī karne se inkār kiyā yā bewā kī āṅkhoṅ ko bujhne diyā? hargiz nahīṅ!

¹⁷kyā maiṅ ne apnī roṭī akele hī khāī aur yatīm ko us meṅ sharīk na kiyā?

¹⁸hargiz nahīṅ, balki apnī jawānī se le kar maiṅ ne us kā bāp ban kar us kī parwarish kī, apnī paidāish se hī bewā kī rāhnumāī kī.

¹⁹jab kabhī maiṅ ne dekhā ki koī kapṛoṅ kī kamī ke bāis halāk ho rahā hai, ki kisī ġharīb ke pās kambal tak nahīṅ

²⁰to maiṅ ne use apnī bheṛoṅ kī kuchh ūn dī tāki wuh garm ho sake. aise log mujhe duā dete the.

²¹maiṅ ne kabhī bhī yatīmoṅ ke ḳhilāf hāth nahīṅ uṭhāyā, us waqt bhī nahīṅ jab shahr ke darwāze meṅ baiṭhe buzurg mere haq meṅ the.

²²agar aisā na thā to allāh kare ki merā shānā kandhe se nikal kar gir jāe, ki merā bāzū joṛ se phāṛā jāe!

²³aisī harkateṅ mere lie nāmumkin thīṅ, kyūṅki agar maiṅ aisā kartā to maiṅ allāh se dahshat khātā rahtā, maiṅ us se ḍar ke māre qāim na rah saktā.

²⁴kyā maiṅ ne sone par apnā pūrā bharosā rakhā yā ḳhālis sone se kahā, ‘tujh par hī merā etimād hai’? hargiz nahīṅ!

²⁵kyā maiṅ is lie ḳhush thā ki merī daulat zyādā hai aur mere hāth ne bahut kuchh hāsil kiyā hai? hargiz nahīṅ!

²⁶kyā sūraj kī chamak-damak aur chāṅd kī purwaqār rawish dekh kar

²⁷mere dil ko kabhī chupke se ġhalat rāh par lāyā gayā? kyā maiṅ ne kabhī un kā ehtirām kiyā? [16]

²⁸hargiz nahīṅ, kyūṅki yih bhī sazā ke lāiq jurm hai. agar maiṅ aisā kartā to bulandiyoṅ par rahne wāle ḳhudā kā inkār kartā.

²⁹kyā maiṅ kabhī ḳhush huā jab mujh se nafrat karne wālā tabāh huā? kyā maiṅ bāġh bāġh huā jab us par musībat āī? hargiz nahīṅ!

³⁰maiṅ ne apne muṅh ko ijāzat na dī ki gunāh karke us kī jān par lānat bheje.

³¹balki mere ḳhaime ke ādmiyoṅ ko taslīm karnā paṛā, ‘koī nahīṅ hai jo ayyūb ke gosht se ser na huā.’

³²ajnabī ko bāhar galī meṅ rāt guzārnī nahīṅ paṛtī thī balki merā darwāzā musāfiroṅ ke lie khulā rahtā thā.

³³kyā maiṅ ne kabhī ādam kī tarah apnā gunāh chhupā kar apnā qusūr dil meṅ poshīdā rakhā,

³⁴is lie ki hujūm se ḍartā aur apne rishtedāroṅ se dahshat khātā thā? hargiz nahīṅ! maiṅ ne kabhī bhī aisā kām na kiyā jis ke bāis mujhe ḍar ke māre chup rahnā paṛtā aur ghar se nikal nahīṅ saktā thā.

³⁵kāsh koī merī sune! dekho, yahāṅ merī bāt par mere dastḳhat haiṅ, ab qādir-e-mutlaq mujhe jawāb de. kāsh mere muḳhālif likh kar mujhe wuh ilzāmāt batāeṅ jo unhoṅ ne mujh par lagāe haiṅ!

³⁶agar ilzāmāt kā kāġhaz miltā to maiṅ use uṭhā kar apne kandhe par rakhtā, use pagaṛī kī tarah apne sar par bāndh letā.

³⁷maiṅ allāh ko apne qadmoṅ kā pūrā hisāb-kitāb de kar raīs kī tarah us ke qarīb pahuṅchtā.

³⁸kyā merī zamīn ne madad ke lie pukār kar mujh par ilzām lagāyā hai? kyā us kī reghāriyāṅ mere sabab se mil kar ro paṛī haiṅ?

³⁹kyā maiṅ ne us kī paidāwār ajr die baġhair khāī, us par mehnat-mashaqqat karne wāloṅ ke lie āheṅ bharne kā bāis ban gayā? hargiz nahīṅ!

⁴⁰agar maiṅ is meṅ qusūrwār ṭhahrūṅ to gandum ke bajāe ḳhārdār jhāṛiyāṅ aur jau ke bajāe dhatūrā [17] uge.” yūṅ ayyūb kī bāteṅ iḳhtitām ko pahuṅch gaīṅ.