Read Roman Urdu Geo ayyūb 32 Bible Online

ayyūb 32 - Roman Urdu Geo bible

ayyūb 32

¹tab mazkūrā tīnoṅ ādmī ayyūb ko jawāb dene se bāz āe, kyūṅki wuh ab tak samajhtā thā ki maiṅ rāstbāz hūṅ.

²yih dekh kar ilīhū bin barakel ġhusse ho gayā. būz shahr ke rahne wāle is ādmī kā ḳhāndān rām thā. ek taraf to wuh ayyūb se ḳhafā thā, kyūṅki yih apne āp ko allāh ke sāmne rāstbāz ṭhahrātā thā.

³dūsrī taraf wuh tīnoṅ dostoṅ se bhī nārāz thā, kyūṅki na wuh ayyūb ko sahīh jawāb de sake, na sābit kar sake ki mujrim hai.

⁴ilīhū ne ab tak ayyūb se bāt nahīṅ kī thī. jab tak dūsroṅ ne bāt pūrī nahīṅ kī thī wuh ḳhāmosh rahā, kyūṅki wuh buzurg the.

⁵lekin ab jab us ne dekhā ki tīnoṅ ādmī mazīd koī jawāb nahīṅ de sakte to wuh bhaṛak uṭhā

⁶aur jawāb meṅ kahā, “maiṅ kamumr hūṅ jabki āp sab umrrasīdā haiṅ, is lie maiṅ kuchh sharmīlā thā, maiṅ āp ko apnī rāy batāne se ḍartā thā.

⁷maiṅ ne sochā, chalo wuh boleṅ jin ke zyādā din guzare haiṅ, wuh tālīm deṅ jinheṅ muta'addid sāloṅ kā tajribā hāsil hai.

⁸lekin jo rūh insān meṅ hai yānī jo dam qādir-e-mutlaq ne us meṅ phūṅk diyā wuhī insān ko samajh atā kartā hai.

⁹na sirf būṛhe log dānishmand haiṅ, na sirf wuh insāf samajhte haiṅ jin ke bāl safed haiṅ.

¹⁰chunāṅche maiṅ guzārish kartā hūṅ ki zarā merī bāt suneṅ, mujhe bhī apnī rāy pesh karne dījie.

¹¹maiṅ āp ke alfāz ke intizār meṅ rahā. jab āp mauzūṅ jawāb talāsh kar rahe the to maiṅ āp kī dānishmand bātoṅ par ġhaur kartā rahā.

¹²maiṅ ne āp par pūrī tawajjuh dī, lekin āp meṅ se koī ayyūb ko ġhalat sābit na kar sakā, koī us ke dalāil kā munāsib jawāb na de pāyā.

¹³ab aisā na ho ki āp kaheṅ, ‘ham ne ayyūb meṅ hikmat pāī hai, insān use shikast de kar bhagā nahīṅ saktā balki sirf allāh hī.’

¹⁴kyūṅki ayyūb ne apne dalāil kī tartīb se merā muqābalā nahīṅ kiyā, aur jab maiṅ jawāb dūṅgā to āp kī bāteṅ nahīṅ dohrāūṅgā.

¹⁵āp ghabrā kar jawāb dene se bāz āe haiṅ, ab āp kuchh nahīṅ kah sakte.

¹⁶kyā maiṅ mazīd intizār karūṅ, go āp ḳhāmosh ho gae haiṅ, āp ruk kar mazīd jawāb nahīṅ de sakte?

¹⁷maiṅ bhī jawāb dene meṅ hissā lenā chāhtā hūṅ, maiṅ bhī apnī rāy pesh karūṅga.

¹⁸kyūṅki mere andar se alfāz chhalak rahe haiṅ, merī rūh mere andar mujhe majbūr kar rahī hai.

¹⁹haqīqat meṅ maiṅ andar se us naī mai kī mānind hūṅ jo band rakhī gaī ho, maiṅ naī mai se bharī huī naī mashkoṅ kī tarah phaṭne ko hūṅ.

²⁰mujhe bolnā hai tāki ārām pāūṅ, lāzim hī hai ki maiṅ apne hoṅṭoṅ ko khol kar jawāb dūṅ.

²¹yaqīnan na maiṅ kisī kī jānibdārī, na kisī kī chāplūsī karūṅga.

²²kyūṅki maiṅ ḳhushāmad kar hī nahīṅ saktā, warnā merā ḳhāliq mujhe jald hī uṛā le jāegā.