Read Roman Urdu Geo ayyūb 33 Bible Online

ayyūb 33 - Roman Urdu Geo bible

ayyūb 33

¹ai ayyūb, merī taqrīr suneṅ, merī tamām bātoṅ par kān dhareṅ!

²ab maiṅ apnā muṅh khol detā hūṅ, merī zabān boltī hai.

³mere alfāz sīdhī rāh par chalne wāle dil se ubhar āte haiṅ, mere hoṅṭ diyānatdārī se wuh kuchh bayān karte haiṅ jo maiṅ jāntā hūṅ.

⁴allāh ke rūh ne mujhe banāyā, qādir-e-mutlaq ke dam ne mujhe zindagī baḳhshī.

⁵agar āp is qābil hoṅ to mujhe jawāb deṅ aur apnī bāteṅ tartīb se pesh karke merā muqābalā kareṅ.

⁶allāh kī nazar meṅ maiṅ to āp ke barābar hūṅ, mujhe bhī miṭṭī se le kar tashkīl diyā gayā hai.

⁷chunāṅche mujhe āp ke lie dahshat kā bāis nahīṅ honā chāhie, merī taraf se āp par bhārī bojh nahīṅ āegā.

⁸āp ne mere sunte hī kahā balki āp ke alfāz abhī tak mere kānoṅ meṅ gūṅj rahe haiṅ,

⁹‘maiṅ pāk hūṅ, mujh se jurm sarzad nahīṅ huā, maiṅ begunāh hūṅ, merā koī qusūr nahīṅ.

¹⁰to bhī allāh mujh se jhagaṛne ke mawāqe ḍhūṅḍtā aur mujhe apnā dushman samajhtā hai.

¹¹wuh mere pāoṅ ko kāṭh meṅ ḍāl kar merī tamām rāhoṅ kī pahrādārī kartā hai.’

¹²lekin āp kī yih bāt durust nahīṅ, kyūṅki allāh insān se ālā hai.

¹³āp us se jhagaṛ kar kyūṅ kahte haiṅ, ‘wuh merī kisī bhī bāt kā jawāb nahīṅ detā’?

¹⁴shāyad insān ko allāh nazar na āe, lekin wuh zarūr kabhī is tarīqe, kabhī us tarīqe se us se hamkalām hotā hai.

¹⁵kabhī wuh ḳhwāb yā rāt kī royā meṅ us se bāt kartā hai. jab log bistar par leṭ kar gahrī nīnd so jāte haiṅ

¹⁶to allāh un ke kān khol kar apnī nasīhatoṅ se unheṅ dahshatzadā kar detā hai.

¹⁷yūṅ wuh insān ko ġhalat kām karne aur maġhrūr hone se bāz rakh kar

¹⁸us kī jān gaṛhe meṅ utarne aur daryā-e-maut ko ubūr karne se rok detā hai.

¹⁹kabhī allāh insān kī bistar par dard ke zarī'e tarbiyat kartā hai. tab us kī haḍḍiyoṅ meṅ lagātār jang hotī hai.

²⁰us kī jān ko ḳhurāk se ghin ātī balki use lazīztarīn khāne se bhī nafrat hotī hai.

²¹us kā gosht-post sukaṛ kar ġhāib ho jātā hai jabki jo haḍḍiyāṅ pahle chhupī huī thīṅ wuh numāyāṅ taur par nazar ātī haiṅ.

²²us kī jān gaṛhe ke qarīb, us kī zindagī halāk karne wāloṅ ke nazdīk pahuṅchtī hai.

²³lekin agar koī farishtā, hazāroṅ meṅ se koī sālis us ke pās ho jo insān ko sīdhī rāh dikhāe

²⁴aur us par tars khā kar kahe, ‘use gaṛhe meṅ utarne se chhuṛā, mujhe fidyā mil gayā hai,

²⁵ab us kā jism jawānī kī nisbat zyādā tar-o-tāzā ho jāe aur wuh dubārā jawānī kī sī tāqat pāe’

²⁶to phir wuh shaḳhs allāh se iltijā karegā, aur allāh us par mehrbān hogā. tab wuh baṛī ḳhushī se allāh kā chehrā taktā rahegā. isī tarah allāh insān kī rāstbāzī bahāl kartā hai.

²⁷aisā shaḳhs logoṅ ke sāmne gāegā aur kahegā, ‘maiṅ ne gunāh karke sīdhī rāh ṭeṛhī-meṛhī kar dī, aur mujhe koī fāidā na huā.

²⁸lekin us ne fidyā de kar merī jān ko maut ke gaṛhe meṅ utarne se chhuṛāyā. ab merī zindagī nūr se lutfandoz hogī.’

²⁹allāh insān ke sāth yih sab kuchh do chār martabā kartā hai

³⁰tāki us kī jān gaṛhe se wāpas āe aur wuh zindagī ke nūr se raushan ho jāe.

³¹ai ayyūb, dhyān se merī bāt suneṅ, ḳhāmosh ho jāeṅ tāki maiṅ bāt karūṅ.

³²agar āp jawāb meṅ kuchh batānā chāheṅ to batāeṅ. boleṅ, kyūṅki maiṅ āp ko rāstbāz ṭhahrāne kī ārzū rakhtā hūṅ.

³³lekin agar āp kuchh bayān nahīṅ kar sakte to merī suneṅ, chup raheṅ tāki maiṅ āp ko hikmat kī tālīm dūṅ.”