Read Roman Urdu Geo ayyūb 35 Bible Online

ayyūb 35 - Roman Urdu Geo bible

ayyūb 35

¹phir ilīhū ne apnī bāt jārī rakhī,

²“āp kahte haiṅ, ‘maiṅ allāh se zyādā rāstbāz hūṅ.’ kyā āp yih bāt durust samajhte haiṅ

³yā yih ki ‘mujhe kyā fāidā hai, gunāh na karne se mujhe kyā nafā hotā hai?’

⁴maiṅ āp ko aur sāthī dostoṅ ko is kā jawāb batātā hūṅ.

⁵apnī nigāh āsmān kī taraf uṭhāeṅ, bulandiyoṅ ke bādaloṅ par ġhaur kareṅ.

⁶agar āp ne gunāh kiyā to allāh ko kyā nuqsān pahuṅchā hai? go āp se muta'addid jarāim bhī sarzad hue hoṅ tāham wuh muta'assir nahīṅ hogā.

⁷rāstbāz zindagī guzārne se āp use kyā de sakte haiṅ? āp ke hāthoṅ se allāh ko kyā hāsil ho saktā hai? kuchh bhī nahīṅ!

⁸āp ke hamjins insān hī āp kī bedīnī se muta'assir hote haiṅ, aur ādamzād hī āp kī rāstbāzī se fāidā uṭhāte haiṅ.

⁹jab logoṅ par saḳht zulm hotā hai to wuh chīḳhte chillāte aur baṛoṅ kī ziyādatī ke bāis madad ke lie āwāz dete haiṅ.

¹⁰lekin koī nahīṅ kahtā, ‘allāh, merā ḳhāliq kahāṅ hai? wuh kahāṅ hai jo rāt ke daurān naġhme atā kartā,

¹¹jo hameṅ zamīn par chalne wāle jānwaroṅ kī nisbat zyādā tālīm detā, hameṅ parindoṅ se zyādā dānishmand banātā hai?’

¹²un kī chīḳhoṅ ke bāwujūd allāh jawāb nahīṅ detā, kyūṅki wuh ghamanḍī aur bure haiṅ.

¹³yaqīnan allāh aisī bātil faryād nahīṅ suntā, qādir-e-mutlaq us par dhyān hī nahīṅ detā.

¹⁴to phir wuh āp par kyūṅ tawajjuh de jab āp dāwā karte haiṅ, ‘maiṅ use nahīṅ dekh saktā,’ aur ‘merā muāmalā us ke sāmne hī hai, maiṅ ab tak us kā intizār kar rahā hūṅ’?

¹⁵wuh āp kī kyūṅ sune jab āp kahte haiṅ, ‘allāh kā ġhazab kabhī sazā nahīṅ detā, use burāī kī parwā hī nahīṅ’?

¹⁶jab ayyūb muṅh kholtā hai to bemānī bāteṅ nikaltī haiṅ. jo muta'addid alfāz wuh pesh kartā hai wuh ilm se ḳhālī haiṅ.”