Read Roman Urdu Geo ayyūb 36 Bible Online

ayyūb 36 - Roman Urdu Geo bible

ayyūb 36

¹ilīhū ne apnī bāt jārī rakhī,

²“thoṛī der ke lie sabar karke mujhe is kī tashrīh karne deṅ, kyūṅki mazīd bahut kuchh hai jo allāh ke haq meṅ kahnā hai.

³maiṅ dūr dūr tak phirūṅga tāki wuh ilm hāsil karūṅ jis se mere ḳhāliq kī rāstī sābit ho jāe.

⁴yaqīnan jo kuchh maiṅ kahūṅgā wuh farebdih nahīṅ hogā. ek aisā ādmī āp ke sāmne khaṛā hai jis ne ḳhulūsdilī se apnā ilm hāsil kiyā hai.

⁵go allāh azīm qudrat kā mālik hai tāham wuh ḳhulūsdiloṅ ko radd nahīṅ kartā.

⁶wuh bedīn ko zyādā der tak jīne nahīṅ detā, lekin musībatzadoṅ kā insāf kartā hai.

⁷wuh apnī āṅkhoṅ ko rāstbāzoṅ se nahīṅ phertā balki unheṅ bādshāhoṅ ke sāth taḳhtnashīn karke bulandiyoṅ par sarfarāz kartā hai.

⁸phir agar unheṅ zanjīroṅ meṅ jakaṛā jāe, unheṅ musībat ke rassoṅ meṅ giriftār kiyā jāe

⁹to wuh un par zāhir kartā hai ki un se kyā kuchh sarzad huā hai, wuh unheṅ un ke jarāim pesh karke unheṅ dikhātā hai ki un kā takabbur kā rawayyā hai.

¹⁰wuh un ke kānoṅ ko tarbiyat ke lie khol kar unheṅ hukm detā hai ki apnī nāinsāfī se bāz ā kar wāpas āo.

¹¹agar wuh mān kar us kī ḳhidmat karne lageṅ to phir wuh jīte jī apne din ḳhushhālī meṅ aur apne sāl sukūn se guzāreṅge.

¹²lekin agar na māneṅ to unheṅ daryā-e-maut ko ubūr karnā paṛegā, wuh ilm se mahrūm rah kar mar jāeṅge.

¹³bedīn apnī harkatoṅ se apne āp par ilāhī ġhazab lāte haiṅ. allāh unheṅ bāndh bhī le, lekin wuh madad ke lie nahīṅ pukārte.

¹⁴jawānī meṅ hī un kī jān nikal jātī, un kī zindagī muqaddas farishtoṅ ke hāthoṅ ḳhatm ho jātī hai.

¹⁵lekin allāh musībatzadā ko us kī musībat ke zarī'e najāt detā, us par hone wāle zulm kī mārifat us kā kān khol detā hai.

¹⁶wuh āp ko bhī musībat ke muṅh se nikalne kī tarġhīb dilā kar ek aisī khulī jagah par lānā chāhtā hai jahāṅ rukāwaṭ nahīṅ hai, jahāṅ āp kī mez umdā khānoṅ se bharī rahegī.

¹⁷lekin is waqt āp adālat kā wuh pyālā pī kar ser ho gae haiṅ jo bedīnoṅ ke nasīb meṅ hai, is waqt adālat aur insāf ne āp ko apnī saḳht girift meṅ le liyā hai.

¹⁸ḳhabardār ki yih bāt āp ko kufr bakne par na uksāe, aisā na ho ki tāwān kī baṛī raqm āp ko ġhalat rāh par le jāe.

¹⁹kyā āp kī daulat āp kā difā karke āp ko musībat se bachāegī? yā kyā āp kī sirtoṛ koshisheṅ yih saranjām de saktī haiṅ? hargiz nahīṅ!

²⁰rāt kī ārzū na kareṅ, us waqt kī jab qaumeṅ jahāṅ bhī hoṅ nest-o-nābūd ho jātī haiṅ.

²¹ḳhabardār raheṅ ki nāinsāfī kī taraf rujū na kareṅ, kyūṅki āp ko isī lie musībat se āzmāyā jā rahā hai.

²²allāh apnī qudrat meṅ sarfarāz hai. kaun us jaisā ustād hai?

²³kis ne muqarrar kiyā ki use kis rāh par chalnā hai? kaun kah saktā hai, ‘tū ne ġhalat kām kiyā’? koī nahīṅ!

²⁴us ke kām kī tamjīd karnā na bhūleṅ, us sāre kām kī jis kī logoṅ ne apne gītoṅ meṅ hamd-o-sanā kī hai.

²⁵har shaḳhs ne yih kām dekh liyā, insān ne dūr dūr se us kā mullāhazā kiyā hai.

²⁶allāh azīm hai aur ham use nahīṅ jānte, us ke sāloṅ kī tādād mālūm nahīṅ kar sakte.

²⁷kyūṅki wuh pānī ke qatre ūpar khaiṅch kar dhund se bārish nikāl letā hai,

²⁸wuh bārish jo bādal zamīn par barsā dete aur jis kī bauchhāṛeṅ insān par paṛtī haiṅ.

²⁹kaun samajh saktā hai ki bādal kis tarah chhā jāte, ki allāh ke maskan se bijliyāṅ kis tarah kaṛaktī haiṅ?

³⁰wuh apne irdgird raushnī phailā kar samundar kī jaṛoṅ tak sab kuchh raushan kartā hai.

³¹yūṅ wuh bādaloṅ se qaumoṅ kī parwarish kartā, unheṅ kasrat kī ḳhurāk muhayyā kartā hai.

³²wuh apnī muṭṭhiyoṅ ko bādal kī bijliyoṅ se bhar kar hukm detā hai ki kyā chīz apnā nishānā banāeṅ.

³³us ke bādaloṅ kī garajtī āwāz us ke ġhazab kā elān kartī, nāinsāfī par us ke shadīd qahr ko zāhir kartī hai.