Read Roman Urdu Geo ayyūb 37 Bible Online

ayyūb 37 - Roman Urdu Geo bible

ayyūb 37

¹yih soch kar merā dil laraz kar apnī jagah se uchhal paṛtā hai.

²suneṅ aur us kī ġhazabnāk āwāz par ġhaur kareṅ, us ġhurrātī āwāz par jo us ke muṅh se nikaltī hai.

³āsmān tale har maqām par balki zamīn kī intihā tak wuh apnī bijlī chamakne detā hai.

⁴is ke bād kaṛaktī āwāz sunāī detī, allāh kī robdār āwāz garaj uṭhtī hai. aur jab us kī āwāz sunāī detī hai to wuh bijliyoṅ ko nahīṅ roktā.

⁵allāh anokhe tarīqe se apnī āwāz garajne detā hai. sāth sāth wuh aise azīm kām kartā hai jo hamārī samajh se bāhar haiṅ.

⁶kyūṅki wuh barf ko farmātā hai, ‘zamīn par paṛ jā’ aur mūslādhār bārish ko, ‘apnā pūrā zor dikhā.’

⁷yūṅ wuh har insān ko us ke ghar meṅ rahne par majbūr kartā hai tāki sab jān leṅ ki allāh kām meṅ masrūf hai.

⁸tab janglī jānwar bhī apne bhaṭoṅ meṅ chhup jāte, apne gharoṅ meṅ panāh lete haiṅ.

⁹tūfān apne kamre se nikal ātā, shimālī hawā mulk meṅ ṭhanḍ phailā detī hai.

¹⁰allāh phūṅk mārtā to pānī jam jātā, us kī satah dūr dūr tak munjamid ho jātī hai.

¹¹allāh bādaloṅ ko namī se bojhal karke un ke zarī'e dūr tak apnī bijlī chamkātā hai.

¹²us kī hidāyat par wuh manḍlāte hue us kā har hukm takmīl tak pahuṅchāte haiṅ.

¹³yūṅ wuh unheṅ logoṅ kī tarbiyat karne, apnī zamīn ko barkat dene yā apnī shafqat dikhāne ke lie bhej detā hai.

¹⁴ai ayyūb, merī is bāt par dhyān deṅ, ruk kar allāh ke azīm kāmoṅ par ġhaur kareṅ.

¹⁵kyā āp ko mālūm hai ki allāh apne kāmoṅ ko kaise tartīb detā hai, ki wuh apne bādaloṅ se bijlī kis tarah chamakne detā hai?

¹⁶kyā āp bādaloṅ kī naql-o-harkat jānte haiṅ? kyā āp ko us ke anokhe kāmoṅ kī samajh ātī hai jo kāmil ilm rakhtā hai?

¹⁷jab zamīn junūbī lū kī zad meṅ ā kar chup ho jātī aur āp ke kapṛe tapne lagte haiṅ

¹⁸to kyā āp allāh ke sāth mil kar āsmān ko ṭhoṅk ṭhoṅk kar pītal ke āīne kī mānind saḳht banā sakte haiṅ? hargiz nahīṅ!

¹⁹hameṅ batāeṅ ki allāh se kyā kaheṅ! afsos, andhere ke bāis ham apne ḳhayālāt ko tartīb nahīṅ de sakte.

²⁰agar maiṅ apnī bāt pesh karūṅ to kyā use kuchh mālūm ho jāegā jis kā pahle ilm na thā? kyā koī bhī kuchh bayān kar saktā hai jo use pahle mālūm na ho? kabhī nahīṅ!

²¹ek waqt dhūp nazar nahīṅ ātī aur bādal zamīn par sāyā ḍālte haiṅ, phir hawā chalne lagtī aur mausam sāf ho jātā hai.

²²shimāl se sunahrī chamak qarīb ātī aur allāh robdār shān-o-shaukat se ghirā huā ā pahuṅchtā hai.

²³ham to qādir-e-mutlaq tak nahīṅ pahuṅch sakte. us kī qudrat ālā aur rāstī zor-āwar hai, wuh kabhī insāf kā ḳhūn nahīṅ kartā.

²⁴is lie ādamzād us se ḍarte aur dil ke dānishmand us kā ḳhauf mānte haiṅ.”