Read Roman Urdu Geo ayyūb 38 Bible Online

ayyūb 38 - Roman Urdu Geo bible

ayyūb 38

¹phir allāh ḳhud ayyūb se hamkalām huā. tūfān meṅ se us ne use jawāb diyā,

²“yih kaun hai jo samajh se ḳhālī bāteṅ karne se mere mansūbe ke sahīh matlab par pardā ḍāltā hai?

³mard kī tarah kamarbastā ho jā! maiṅ tujh se sawāl kartā hūṅ, aur tū mujhe tālīm de.

⁴tū kahāṅ thā jab maiṅ ne zamīn kī bunyād rakhī? agar tujhe is kā ilm ho to mujhe batā!

⁵kis ne us kī lambāī aur chauṛāī muqarrar kī? kyā tujhe mālūm hai? kis ne nāp kar us kī paimāish kī?

⁶us ke satūn kis chīz par lagāe gae. kis ne us ke kone kā bunyādī patthar rakhā,

⁷us waqt jab subh ke sitāre mil kar shādiyānā bajā rahe, tamām farishte ḳhushī ke nāre lagā rahe the?

⁸jab samundar rahm se phūṭ niklā to kis ne darwāze band karke us par qābū pāyā?

⁹us waqt maiṅ ne bādaloṅ ko us kā libās banāyā aur use ghane andhere meṅ yūṅ lapeṭā jis tarah nauzād ko potaṛoṅ meṅ lapeṭā jātā hai.

¹⁰us kī hudūd muqarrar karke maiṅ ne use rokne ke darwāze aur kunḍe lagāe.

¹¹maiṅ bolā, ‘tujhe yahāṅ tak ānā hai, is se āge na baṛhnā, terī robdār lahroṅ ko yihīṅ ruknā hai.’

¹²kyā tū ne kabhī subh ko hukm diyā yā use tulū hone kī jagah dikhāī

¹³tāki wuh zamīn ke kināroṅ ko pakaṛ kar bedīnoṅ ko us se jhāṛ de?

¹⁴us kī raushnī meṅ zamīn yūṅ tashkīl pātī hai jis tarah miṭṭī jis par muhr lagāī jāe. sab kuchh rangdār libās pahne nazar ātā hai.

¹⁵tab bedīnoṅ kī raushnī rokī jātī, un kā uṭhāyā huā bāzū toṛā jātā hai.

¹⁶kyā tū samundar ke sarchashmoṅ tak pahuṅch kar us kī gahrāiyoṅ meṅ se guzarā hai?

¹⁷kyā maut ke darwāze tujh par zāhir hue, tujhe ghane andhere ke darwāze nazar āe haiṅ?

¹⁸kyā tujhe zamīn ke wasī maidānoṅ kī pūrī samajh āī hai? mujhe batā agar yih sab kuchh jāntā hai!

¹⁹raushnī ke mambā tak le jāne wālā rāstā kahāṅ hai? andhere kī rihāishgāh kahāṅ hai?

²⁰kyā tū unheṅ un ke maqāmoṅ tak pahuṅchā saktā hai? kyā tū un ke gharoṅ tak le jāne wālī rāhoṅ se wāqif hai?

²¹beshak tū is kā ilm rakhtā hai, kyūṅki tū us waqt janm le chukā thā jab yih paidā hue. tū to qadīm zamāne se hī zindā hai!

²²kyā tū wahāṅ tak pahuṅch gayā hai jahāṅ barf ke zaḳhīre jamā hote haiṅ? kyā tū ne oloṅ ke godāmoṅ ko dekh liyā hai?

²³maiṅ unheṅ musībat ke waqt ke lie mahfūz rakhtā hūṅ, aise dinoṅ ke lie jab laṛāī aur jang chhiṛ jāe.

²⁴mujhe batā, us jagah tak kis tarah pahuṅchnā hai jahāṅ raushnī taqsīm hotī hai, yā us jagah jahāṅ se mashriqī hawā nikal kar zamīn par bikhar jātī hai?

²⁵kis ne mūslādhār bārish ke lie rāstā aur garajte tūfān ke lie rāh banāī

²⁶tāki insān se ḳhālī zamīn aur ġhairābād registān kī ābpāshī ho jāe,

²⁷tāki wīrān-o-sunsān bayābān kī pyās bujh jāe aur us se hariyālī phūṭ nikle?

²⁸kyā bārish kā bāp hai? kaun shabnam ke qatroṅ kā wālid hai?

²⁹barf kis māṅ ke peṭ se paidā huī? jo pālā āsmān se ā kar zamīn par paṛtā hai kis ne use janm diyā?

³⁰jab pānī patthar kī tarah saḳht ho jāe balki gahre samundar kī satah bhī jam jāe to kaun yih saranjām detā hai?

³¹kyā tū ḳhoshā-e-parwīn ko bāndh saktā yā jauze kī zanjīroṅ ko khol saktā hai?

³²kyā tū karwā saktā hai ki sitāroṅ ke muḳhtalif jhurmaṭ un ke muqarrarā auqāt ke mutābiq nikal āeṅ? kyā tū dubb-e-akbar kī us ke bachchoṅ samet qiyādat karne ke qābil hai?

³³kyā tū āsmān ke qawānīn jāntā yā us kī zamīn par hukūmat muta'ayyin kartā hai?

³⁴kyā jab tū buland āwāz se bādaloṅ ko hukm de to wuh tujh par mūslādhār bārish barsāte haiṅ?

³⁵kyā tū bādal kī bijlī zamīn par bhej saktā hai? kyā wuh tere pās ā kar kahtī hai, ‘maiṅ ḳhidmat ke lie hāzir hūṅ’?

³⁶kis ne misr ke laqlaq ko hikmat dī, murġh ko samajh atā kī?

³⁷kis ko itnī dānāī hāsil hai ki wuh bādaloṅ ko gin sake? kaun āsmān ke in ghaṛoṅ ko us waqt unḍel saktā hai

³⁸jab miṭṭī ḍhāle hue lohe kī tarah saḳht ho jāe aur ḍhele ek dūsre ke sāth chipak jāeṅ? koī nahīṅ!

³⁹kyā tū hī shernī ke lie shikār kartā yā sheroṅ ko ser kartā hai

⁴⁰jab wuh apnī chhupne kī jaghoṅ meṅ dabak jāeṅ yā gunjān jangal meṅ kahīṅ tāk lagāe baiṭhe hoṅ?

⁴¹kaun kawwe ko ḳhurāk muhayyā kartā hai jab us ke bachche bhūk ke bāis allāh ko āwāz deṅ aur māre māre phireṅ?