Read Roman Urdu Geo ayyūb 39 Bible Online

ayyūb 39 - Roman Urdu Geo bible

ayyūb 39

¹kyā tujhe mālūm hai ki pahāṛī bakriyoṅ ke bachche kab paidā hote haiṅ? jab hirnī apnā bachchā janm detī hai to kyā tū is ko mullāhazā kartā hai?

²kyā tū wuh mahīne gintā rahtā hai jab bachche hirniyoṅ ke peṭ meṅ hoṅ? kyā tū jāntā hai ki kis waqt bachche janm detī haiṅ?

³us din wuh dabak jātī, bachche nikal āte aur dard-e-zah ḳhatm ho jātā hai.

⁴un ke bachche tāqatwar ho kar khule maidān meṅ phalte phūlte, phir ek din chale jāte haiṅ aur apnī māṅ ke pās wāpas nahīṅ āte.

⁵kis ne janglī gadhe ko khulā chhoṛ diyā? kis ne us ke rasse khol die?

⁶maiṅ hī ne bayābān us kā ghar banā diyā, maiṅ hī ne muqarrar kiyā ki banjar zamīn us kī rihāishgāh ho.

⁷wuh shahr kā shor-sharābā dekh kar haṅs uṭhtā, aur use hāṅkne wāle kī āwāz sunanī nahīṅ paṛtī.

⁸wuh charne ke lie pahāṛī ilāqe meṅ idhar udhar ghūmtā aur hariyālī kā khoj lagātā rahtā hai.

⁹kyā janglī bail terī ḳhidmat karne ke lie tayyār hogā? kyā wuh kabhī rāt ko terī charnī ke pās guzāregā?

¹⁰kyā tū use bāndh kar hal chalā saktā hai? kyā wuh wādī meṅ tere pīchhe chal kar suhāgā pheregā?

¹¹kyā tū us kī baṛī tāqat dekh kar us par etimād karegā? kyā tū apnā saḳht kām us ke sapurd karegā?

¹²kyā tū bharosā kar saktā hai ki wuh terā anāj jamā karke gāhne kī jagah par le āe? hargiz nahīṅ!

¹³shuturmurġh ḳhushī se apne paroṅ ko phaṛphaṛātā hai. lekin kyā us kā shāhpar laqlaq yā bāz ke shāhpar kī mānind hai?

¹⁴wuh to apne anḍe zamīn par akele chhoṛtā hai, aur wuh miṭṭī hī par pakte haiṅ.

¹⁵shuturmurġh ko ḳhayāl tak nahīṅ ātā ki koī unheṅ pāoṅ tale kuchal saktā yā koī janglī jānwar unheṅ raund saktā hai.

¹⁶lagtā nahīṅ ki us ke apne bachche haiṅ, kyūṅki us kā un ke sāth sulūk itnā saḳht hai. agar us kī mehnat nākām nikle to use parwā hī nahīṅ,

¹⁷kyūṅki allāh ne use hikmat se mahrūm rakh kar use samajh se na nawāzā.

¹⁸to bhī wuh itnī tezī se uchhal kar bhāg jātā hai ki ghoṛe aur ghuṛsawār kī dauṛ dekh kar haṅsne lagtā hai.

¹⁹kyā tū ghoṛe ko us kī tāqat de kar us kī gardan ko ayāl se ārāstā kartā hai?

²⁰kyā tū hī use ṭiḍḍī kī tarah phalāṅgne detā hai? jab wuh zor se apne nathnoṅ ko phulā kar āwāz nikāltā hai to kitnā robdār lagtā hai!

²¹wuh wādī meṅ sum mār mār kar apnī tāqat kī ḳhushī manātā, phir bhāg kar maidān-e-jang meṅ ā jātā hai.

²²wuh ḳhauf kā mazāq uṛātā aur kisī se bhī nahīṅ ḍartā, talwār ke rū-ba-rū bhī pīchhe nahīṅ haṭtā.

²³us ke ūpar tarkash ḳhaṛkhaṛātā, nezā aur shamshīr chamaktī hai.

²⁴wuh baṛā shor machā kar itnī tezī aur josh-o-ḳhurosh se dushman par hamlā kartā hai ki bigul bajte waqt bhī rokā nahīṅ jātā.

²⁵jab bhī bigul baje wuh zor se hinhinātā aur dūr hī se maidān-e-jang, kamānḍaroṅ kā shor aur jang ke nāre sūṅgh letā hai.

²⁶kyā bāz terī hī hikmat ke zarī'e hawā meṅ uṛ kar apne paroṅ ko junūb kī jānib phailā detā hai?

²⁷kyā uqāb tere hī hukm par bulandiyoṅ par manḍlātā aur ūṅchī ūṅchī jaghoṅ par apnā ghoṅslā banā letā hai?

²⁸wuh chaṭān par rahtā, us ke ṭūṭe-phūṭe kināroṅ aur qilāband jaghoṅ par baserā kartā hai.

²⁹wahāṅ se wuh apne shikār kā khoj lagātā hai, us kī āṅkheṅ dūr dūr tak deḳhtī haiṅ.

³⁰us ke bachche ḳhūn ke lālach meṅ rahte, aur jahāṅ bhī lāsh ho wahāṅ wuh hāzir hotā hai.”