Read Roman Urdu Geo ayyūb 4 Bible Online

ayyūb 4 - Roman Urdu Geo bible

ayyūb 4

¹yih kuchh sun kar ilīfaz temānī ne jawāb diyā,

²“kyā tujh se bāt karne kā koī fāidā hai? tū to yih bardāsht nahīṅ kar saktā. lekin dūsrī taraf kaun apne alfāz rok saktā hai?

³zarā soch le, tū ne ḳhud bahutoṅ ko tarbiyat dī, kaī logoṅ ke thakemānde hāthoṅ ko taqwiyat dī hai.

⁴tere alfāz ne ṭhokar khāne wāle ko dubārā khaṛā kiyā, ḍagmagāte hue ghuṭne tū ne mazbūt kie.

⁵lekin ab jab musībat tujh par ā gaī to tū use bardāsht nahīṅ kar saktā, ab jab ḳhud us kī zad meṅ ā gayā to tere roṅgṭe khaṛe ho gae haiṅ.

⁶kyā terā etimād is par munhasir nahīṅ hai ki tū allāh kā ḳhauf māne, terī ummīd is par nahīṅ ki tū be'ilzām rāhoṅ par chale?

⁷soch le, kyā kabhī koī begunāh halāk huā hai? hargiz nahīṅ! jo sīdhī rāh par chalte haiṅ wuh kabhī rū-e-zamīn par se miṭ nahīṅ gae.

⁸jahāṅ tak maiṅ ne dekhā, jo nāinsāfī kā hal chalāe aur nuqsān kā bīj boe wuh is kī fasal kāṭtā hai.

⁹aise log allāh kī ek phūṅk se tabāh, us ke qahr ke ek jhoṅke se halāk ho jāte haiṅ.

¹⁰sherbabar kī dahāṛeṅ ḳhāmosh ho gaīṅ, jawān sher ke dāṅt jhaṛ gae haiṅ.

¹¹shikār na milne kī wajah se sher halāk ho jātā aur shernī ke bachche parāgandā ho jāte haiṅ.

¹²ek bār ek bāt chorī-chhupe mere pās pahuṅchī, us ke chand alfāz mere kān tak pahuṅch gae.

¹³rāt ko aisī royāeṅ pesh āīṅ jo us waqt dekhī jātī haiṅ jab insān gahrī nīnd soyā hotā hai. in se maiṅ pareshānkun ḳhayālāt meṅ mubtalā huā.

¹⁴mujh par dahshat aur thartharāhaṭ ġhālib āī, merī tamām haḍḍiyāṅ laraz uṭhīṅ.

¹⁵phir mere chehre ke sāmne se hawā kā jhoṅkā guzar gayā aur mere tamām roṅgṭe khaṛe ho gae.

¹⁶ek hastī mere sāmne khaṛī huī jise maiṅ pahchān na sakā, ek shakl merī āṅkhoṅ ke sāmne dikhāī dī. ḳhāmoshī thī, phir ek āwāz ne farmāyā,

¹⁷‘kyā insān allāh ke huzūr rāstbāz ṭhahar saktā hai, kyā insān apne ḳhāliq ke sāmne pāk-sāf ṭhahar saktā hai?’

¹⁸dekh, allāh apne ḳhādimoṅ par bharosā nahīṅ kartā, apne farishtoṅ ko wuh ahmaq ṭhahrātā hai.

¹⁹to phir wuh insān par kyūṅ bharosā rakhe jo miṭṭī ke ghar meṅ rahtā, aise makān meṅ jis kī bunyād ḳhāk par hī rakhī gaī hai. use patange kī tarah kuchlā jātā hai.

²⁰subh ko wuh zindā hai lekin shām tak pāsh pāsh ho jātā, abad tak halāk ho jātā hai, aur koī bhī dhyān nahīṅ detā.

²¹us ke ḳhaime ke rasse ḍhīle karo to wuh hikmat hāsil kie baġhair intiqāl kar jātā hai.