Read Roman Urdu Geo ayyūb 41 Bible Online

ayyūb 41 - Roman Urdu Geo bible

ayyūb 41

¹kyā tū liwiyātān [19] azhdahe ko machhlī ke kāṅṭe se pakaṛ saktā yā us kī zabān ko rasse se bāndh saktā hai?

²kyā tū us kī nāk chhed kar us meṅ se rassā guzār saktā yā us ke jabṛe ko kāṅṭe se chīr saktā hai?

³kyā wuh kabhī tujh se bār bār rahm māṅgegā yā narm narm alfāz se terī ḳhushāmad karegā?

⁴kyā wuh kabhī tere sāth ahd karegā ki tū use apnā ġhulām banāe rakhe? hargiz nahīṅ!

⁵kyā tū parinde kī tarah us ke sāth khel saktā yā use bāndh kar apnī laṛkiyoṅ ko de saktā hai tāki wuh us ke sāth kheleṅ?

⁶kyā saudāgar kabhī us kā saudā kareṅge yā use tājiroṅ meṅ taqsīm kareṅge? kabhī nahīṅ!

⁷kyā tū us kī khāl ko bhāloṅ se yā us ke sar ko hārpūnoṅ se bhar saktā hai?

⁸ek dafā use hāth lagāyā to yih laṛāī tujhe hameshā yād rahegī, aur tū āindā aisī harkat kabhī nahīṅ karegā!

⁹yaqīnan us par qābū pāne kī har ummīd farebdih sābit hogī, kyūṅki use deḳhte hī insān gir jātā hai.

¹⁰koī itnā bedhaṛak nahīṅ hai ki use mushta'il kare. to phir kaun merā sāmnā kar saktā hai?

¹¹kis ne mujhe kuchh diyā hai ki maiṅ us kā muāwazā dūṅ. āsmān tale har chīz merī hī hai!

¹²maiṅ tujhe us ke āzā ke bayān se mahrūm nahīṅ rakhūṅgā, ki wuh kitnā baṛā, tāqatwar aur ḳhūbsūrat hai.

¹³kaun us kī khāl [20] utār saktā, kaun us ke zirābaktar kī do tahoṅ ke andar tak pahuṅch saktā hai?

¹⁴kaun us ke muṅh kā darwāzā kholne kī jur'at kare? us ke haulnāk dāṅt dekh kar insān ke roṅgṭe khaṛe ho jāte haiṅ.

¹⁵us kī pīṭh par ek dūsrī se ḳhūb juṛī huī ḍhāloṅ kī qatāreṅ hotī haiṅ.

¹⁶wuh itnī mazbūtī se ek dūsrī se lagī hotī haiṅ ki un ke darmiyān se hawā bhī nahīṅ guzar saktī,

¹⁷balki yūṅ ek dūsrī se chimṭī aur lipṭī rahtī haiṅ ki unheṅ ek dūsrī se alag nahīṅ kiyā jā saktā.

¹⁸jab chhīṅkeṅ māre to bijlī chamak uṭhtī hai. us kī āṅkheṅ tulū-e-subh kī palakoṅ kī mānind haiṅ.

¹⁹us ke muṅh se mash'aleṅ aur chingāriyāṅ ḳhārij hotī haiṅ,

²⁰us ke nathnoṅ se dhuāṅ yūṅ nikaltā hai jis tarah bhaṛaktī aur dahaktī āg par rakhī gaī deg se.

²¹jab phūṅk māre to koele dahak uṭhte aur us ke muṅh se shole nikalte haiṅ.

²²us kī gardan meṅ itnī tāqat hai ki jahāṅ bhī jāe wahāṅ us ke āge āge māyūsī phail jātī hai.

²³us ke gosht-post kī taheṅ ek dūsrī se ḳhūb juṛī huī haiṅ, wuh ḍhāle hue lohe kī tarah mazbūt aur belchak haiṅ.

²⁴us kā dil patthar jaisā saḳht, chakkī ke nichle pāṭ jaisā mustahkam hai.

²⁵jab uṭhe to zor-āwar ḍar jāte aur dahshat khā kar pīchhe haṭ jāte haiṅ.

²⁶hathiyāroṅ kā us par koī asar nahīṅ hotā, ḳhwāh koī talwār, neze, barchhī yā tīr se us par hamlā kyūṅ na kare.

²⁷wuh lohe ko bhūsā aur pītal ko galī saṛī lakaṛī samajhtā hai.

²⁸tīr use nahīṅ bhagā sakte, aur agar ġhulel ke patthar us par chalāo to un kā asar bhūse ke barābar hai.

²⁹ḍanḍā use tinkā sā lagtā hai, aur wuh shamshīr kā shor-sharābā sun kar haṅs uṭhtā hai.

³⁰us ke peṭ par tez ṭhīkre se lage haiṅ, aur jis tarah anāj par gāhne kā ālā chalāyā jātā hai usī tarah wuh kīchaṛ par chaltā hai.

³¹jab samundar kī gahrāiyoṅ meṅ se guzare to pānī ubaltī deg kī tarah khaulne lagtā hai. wuh marham ke muḳhtalif ajzā ko milā milā kar tayyār karne wāle attār kī tarah samundar ko harkat meṅ lātā hai.

³²apne pīchhe wuh chamaktā damaktā rāstā chhoṛtā hai. tab lagtā hai ki samundar kī gahrāiyoṅ ke safed bāl haiṅ.

³³duniyā meṅ us jaisā koī maḳhlūq nahīṅ, aisā banāyā gayā hai ki kabhī na ḍare.

³⁴jo bhī ālā ho us par wuh hiqārat kī nigāh se deḳhtā hai, wuh tamām robdār jānwaroṅ kā bādshāh hai.”