Read Roman Urdu Geo ayyūb 5 Bible Online

ayyūb 5 - Roman Urdu Geo bible

ayyūb 5

¹beshak āwāz de, lekin kaun jawāb degā? koī nahīṅ! muqaddasīn meṅ se tū kis kī taraf rujū kar saktā hai?

²kyūṅki ahmaq kī ranjīdagī use mār ḍāltī, sādālauh kī sargarmī use maut ke ghāṭ utār detī hai.

³maiṅ ne ḳhud ek ahmaq ko jaṛ pakaṛte dekhā, lekin maiṅ ne fauran hī us ke ghar par lānat bhejī.

⁴us ke farzand najāt se dūr rahte. unheṅ shahr ke darwāze meṅ raundā jātā hai, aur bachāne wālā koī nahīṅ.

⁵bhūke us kī fasal khā jāte, kāṅṭedār bāṛoṅ meṅ mahfūz māl bhī chhīn lete haiṅ. pyāse afrād hāṅpte hue us kī daulat ke pīchhe paṛ jāte haiṅ.

⁶kyūṅki burāī ḳhāk se nahīṅ nikaltī aur dukh-dard miṭṭī se nahīṅ phūṭtā

⁷balki insān ḳhud is kā bāis hai, dukh-dard us kī wirāsat meṅ hī pāyā jātā hai. yih itnā yaqīnī hai jitnā yih ki āg kī chingāriyāṅ ūpar kī taraf uṛtī haiṅ.

⁸lekin agar maiṅ terī jagah hotā to allāh se daryāft kartā, use hī apnā muāmalā pesh kartā.

⁹wuhī itne azīm kām kartā hai ki koī un kī tah tak nahīṅ pahuṅch saktā, itne mojize ki koī unheṅ gin nahīṅ saktā.

¹⁰wuhī rū-e-zamīn ko bārish atā kartā, khule maidān par pānī barsā detā hai.

¹¹pasthāloṅ ko wuh sarfarāz kartā aur mātam karne wāloṅ ko uṭhā kar mahfūz maqām par rakh detā hai.

¹²wuh chālākoṅ ke mansūbe toṛ detā hai tāki un ke hāth nākām raheṅ.

¹³wuh dānishmandoṅ ko un kī apnī chālākī ke phande meṅ phaṅsā detā hai to hoshyāroṅ kī sāzisheṅ achānak hī ḳhatm ho jātī haiṅ.

¹⁴din ke waqt un par andherā chhā jātā, aur dopahar ke waqt bhī wuh ṭaṭol ṭaṭol kar phirte haiṅ.

¹⁵allāh zarūratmandoṅ ko un ke muṅh kī talwār aur zabardast ke qabze se bachā letā hai.

¹⁶yūṅ pasthāloṅ ko ummīd dī jātī aur nāinsāfī kā muṅh band kiyā jātā hai.

¹⁷mubārak hai wuh insān jis kī malāmat allāh kartā hai! chunāṅche qādir-e-mutlaq kī tādīb ko haqīr na jān.

¹⁸kyūṅki wuh zaḳhmī kartā lekin marham-paṭṭī bhī lagā detā hai, wuh zarb lagātā lekin apne hāthoṅ se shifā bhī baḳhshtā hai.

¹⁹wuh tujhe chhih musībatoṅ se chhuṛāegā, aur agar is ke bād bhī koī āe to tujhe nuqsān nahīṅ pahuṅchegā.

²⁰agar kāl paṛe to wuh fidyā de kar tujhe maut se bachāegā, jang meṅ tujhe talwār kī zad meṅ āne nahīṅ degā.

²¹tū zabān ke koṛoṅ se mahfūz rahegā, aur jab tabāhī āe to ḍarne kī zarūrat nahīṅ hogī.

²²tū tabāhī aur kāl kī haṅsī uṛāegā, zamīn ke wahshī jānwaroṅ se ḳhauf nahīṅ khāegā.

²³kyūṅki terā khule maidān ke pattharoṅ ke sāth ahd hogā, is lie us ke janglī jānwar tere sāth salāmatī se zindagī guzāreṅge.

²⁴tū jān legā ki terā ḳhaimā mahfūz hai. jab tū apne ghar kā muāinā kare to mālūm hogā ki kuchh gum nahīṅ huā.

²⁵tū dekhegā ki terī aulād baṛhtī jāegī, tere farzand zamīn par ghās kī tarah phailte jāeṅge.

²⁶tū waqt par jamāshudā pūloṅ kī tarah umrrasīdā ho kar qabr meṅ utregā.

²⁷ham ne tahqīq karke mālūm kiyā hai ki aisā hī hai. chunāṅche hamārī bāt sun kar use apnā le!”