Read Roman Urdu Geo ayyūb 6 Bible Online

ayyūb 6 - Roman Urdu Geo bible

ayyūb 6

¹tab ayyūb ne jawāb de kar kahā,

²“kāsh merī ranjīdagī kā wazn kiyā jā sake aur merī musībat tarāzū meṅ tolī jā sake!

³kyūṅki wuh samundar kī ret se zyādā bhārī ho gaī hai. isī lie merī bāteṅ betukī sī lag rahī haiṅ.

⁴kyūṅki qādir-e-mutlaq ke tīr mujh meṅ gaṛ gae haiṅ, merī rūh un kā zahr pī rahī hai. hāṅ, allāh ke haulnāk hamle mere ḳhilāf safārā haiṅ.

⁵kyā janglī gadhā ḍhīnchūṅ ḍhīnchūṅ kartā hai jab use ghās dastyāb ho? yā kyā bail ḍakrātā hai jab use chārā hāsil ho?

⁶kyā phīkā khānā namak ke baġhair khāyā jātā, yā anḍe kī safedī [5] meṅ zāiqā hai?

⁷aisī chīz ko maiṅ chhūtā bhī nahīṅ, aisī ḳhurāk se mujhe ghin hī ātī hai.

⁸kāsh merī guzārish pūrī ho jāe, allāh merī ārzū pūrī kare!

⁹kāsh wuh mujhe kuchal dene ke lie tayyār ho jāe, wuh apnā hāth baṛhā kar mujhe halāk kare.

¹⁰phir mujhe kam az kam tasallī hotī balki maiṅ mustaqil dard ke māre pech-o-tāb khāne ke bāwujūd ḳhushī manātā ki maiṅ ne quddūs ḳhudā ke farmānoṅ kā inkār nahīṅ kiyā.

¹¹merī itnī tāqat nahīṅ ki mazīd intizār karūṅ, merā kyā achchhā anjām hai ki sabar karūṅ?

¹²kyā maiṅ pattharoṅ jaisā tāqatwar hūṅ? kyā merā jism pītal jaisā mazbūt hai?

¹³nahīṅ, mujh se har sahārā chhīn liyā gayā hai, mere sāth aisā sulūk huā hai ki kāmyābī kā imkān hī nahīṅ rahā.

¹⁴jo apne dost par mehrbānī karne se inkār kare wuh allāh kā ḳhauf tark kartā hai.

¹⁵mere bhāiyoṅ ne wādī kī un nadiyoṅ jaisī bewafāī kī hai jo barsāt ke mausam meṅ apne kināroṅ se bāhar ā jātī haiṅ.

¹⁶us waqt wuh barf se bhar kar gadlī ho jātī haiṅ,

¹⁷lekin urūj tak pahuṅchte hī wuh sūkh jātī, taptī garmī meṅ ojhal ho jātī haiṅ.

¹⁸tab qāfile apnī rāhoṅ se haṭ jāte haiṅ tāki pānī mil jāe, lekin befāidā. wuh registān meṅ pahuṅch kar tabāh ho jāte haiṅ.

¹⁹taimā ke qāfile is pānī kī talāsh meṅ rahte, sabā ke safar karne wāle tājir us par ummīd rakhte haiṅ,

²⁰lekin besūd. jis par unhoṅ ne etimād kiyā wuh unheṅ māyūs kar detā hai. jab wahāṅ pahuṅchte haiṅ to sharmindā ho jāte haiṅ.

²¹tum bhī itne hī bekār sābit hue ho. tum haulnāk bāt dekh kar dahshatzadā ho gae ho.

²²kyā maiṅ ne kahā, ‘mujhe tohfā de do, apnī daulat meṅ se merī ḳhātir rishwat do,

²³mujhe dushman ke hāth se chhuṛāo, fidyā de kar zālim ke qabze se bachāo’?

²⁴mujhe sāf hidāyat do to maiṅ mān kar ḳhāmosh ho jāūṅgā. mujhe batāo ki kis bāt meṅ mujh se ġhaltī huī hai.

²⁵sīdhī rāh kī bāteṅ kitnī taqlīfdih ho saktī haiṅ! lekin tumhārī malāmat se mujhe kis qism kī tarbiyat hāsil hogī?

²⁶kyā tum samajhte ho ki ḳhālī alfāz muāmale ko hal kareṅge, go tum māyūsī meṅ mubtalā ādmī kī bāt nazarandāz karte ho?

²⁷kyā tum yatīm ke lie bhī qur'ā ḍālte, apne dost ke lie bhī saudābāzī karte ho?

²⁸lekin ab ḳhud faislā karo, mujh par nazar ḍāl kar soch lo. allāh kī qasam, maiṅ tumhāre rū-ba-rū jhūṭ nahīṅ boltā.

²⁹apnī ġhaltī taslīm karo tāki nāinsāfī na ho. apnī ġhaltī mān lo, kyūṅki ab tak maiṅ haq par hūṅ.

³⁰kyā merī zabān jhūṭ boltī hai? kyā maiṅ farebdih bāteṅ pahchān nahīṅ saktā?