Read Roman Urdu Geo ayyūb 7 Bible Online

ayyūb 7 - Roman Urdu Geo bible

ayyūb 7

¹insān duniyā meṅ saḳht ḳhidmat karne par majbūr hotā hai, jīte jī wuh mazdūr kī sī zindagī guzārtā hai.

²ġhulām kī tarah wuh shām ke sāy kā ārzūmand hotā, mazdūr kī tarah mazdūrī ke intizār meṅ rahtā hai.

³mujhe bhī bemānī mahīne aur musībat kī rāteṅ nasīb huī haiṅ.

⁴jab bistar par leṭ jātā to sochtā hūṅ ki kab uṭh saktā hūṅ? lekin lagtā hai ki rāt kabhī ḳhatm nahīṅ hogī, aur maiṅ fajr tak bechainī se karwaṭeṅ badaltā rahtā hūṅ.

⁵mere jism kī har jagah kīṛe aur khuranḍ phail gae haiṅ, merī sukaṛī huī jild meṅ pīp paṛ gaī hai.

⁶mere din jūlāhe kī nāl [6] se kahīṅ zyādā tezī se guzar gae haiṅ. wuh apne anjām tak pahuṅch gae haiṅ, dhāgā ḳhatm ho gayā hai.

⁷ai allāh, ḳhayāl rakh ki merī zindagī dam bhar kī hī hai! merī āṅkheṅ āindā kabhī ḳhushhālī nahīṅ dekheṅgī.

⁸jo mujhe is waqt dekhe wuh āindā mujhe nahīṅ dekhegā. tū merī taraf dekhegā, lekin maiṅ hūṅgā nahīṅ.

⁹jis tarah bādal ojhal ho kar ḳhatm ho jātā hai usī tarah pātāl meṅ utarne wālā wāpas nahīṅ ātā.

¹⁰wuh dubārā apne ghar wāpas nahīṅ āegā, aur us kā maqām use nahīṅ jāntā.

¹¹chunāṅche maiṅ wuh kuchh rok nahīṅ saktā jo mere muṅh se nikalnā chāhtā hai. maiṅ ranjīdā hālat meṅ bāt karūṅga, apne dil kī talḳhī kā izhār karke āh-o-zārī karūṅga.

¹²ai allāh, kyā maiṅ samundar yā samundarī azhdahā hūṅ ki tū ne mujhe nazarband kar rakhā hai?

¹³jab maiṅ kahtā hūṅ, ‘merā bistar mujhe tasallī de, sone se merā ġham halkā ho jāe’

¹⁴to tū mujhe haulnāk ḳhwāboṅ se himmat hārne detā, royāoṅ se mujhe dahshat khilātā hai.

¹⁵merī itnī burī hālat ho gaī hai ki sochtā hūṅ, kāsh koī merā galā ghūṅṭ kar mujhe mār ḍāle, kāsh maiṅ zindā na rahūṅ balki dam chhoṛūṅ.

¹⁶maiṅ ne zindagī ko radd kar diyā hai, ab maiṅ zyādā der tak zindā nahīṅ rahūṅgā. mujhe chhoṛ, kyūṅki mere din dam bhar ke hī haiṅ.

¹⁷insān kyā hai ki tū us kī itnī qadar kare, us par itnā dhyān de?

¹⁸wuh itnā aham to nahīṅ hai ki tū har subh us kā muāinā kare, har lamhā us kī jāṅch-paṛtāl kare.

¹⁹kyā tū mujhe takne se kabhī nahīṅ bāz āegā? kyā tū mujhe itnā sukūn bhī nahīṅ degā ki pal bhar ke lie thūk niglūṅ?

²⁰ai insān ke pahredār, agar mujh se ġhaltī huī bhī to is se maiṅ ne terā kyā nuqsān kiyā? tū ne mujhe apne ġhazab kā nishānā kyūṅ banāyā? maiṅ tere lie bojh kyūṅ ban gayā hūṅ?

²¹tū merā jurm muāf kyūṅ nahīṅ kartā, merā qusūr darguzar kyūṅ nahīṅ kartā? kyūṅki jald hī maiṅ ḳhāk ho jāūṅgā. agar tū mujhe talāsh bhī kare to nahīṅ milūṅgā, kyūṅki maiṅ hūṅgā nahīṅ.”