Read Roman Urdu Geo ayyūb 8 Bible Online

ayyūb 8 - Roman Urdu Geo bible

ayyūb 8

¹tab bildad sūḳhī ne jawāb de kar kahā,

²“tū kab tak is qism kī bāteṅ karegā? kab tak tere muṅh se āṅdhī ke jhoṅke nikleṅge?

³kyā allāh insāf kā ḳhūn kar saktā, kyā qādir-e-mutlaq rāstī ko āge pīchhe kar saktā hai?

⁴tere beṭoṅ ne us kā gunāh kiyā hai, is lie us ne unheṅ un ke jurm ke qabze meṅ chhoṛ diyā.

⁵ab tere lie lāzim hai ki tū allāh kā tālib ho aur qādir-e-mutlaq se iltijā kare,

⁶ki tū pāk ho aur sīdhī rāh par chale. phir wuh ab bhī terī ḳhātir josh meṅ ā kar terī rāstbāzī kī sukūnatgāh ko bahāl karegā.

⁷tab terā mustaqbil nihāyat azīm hogā, ḳhwāh terī ibtidāī hālat kitnī past kyūṅ na ho.

⁸guzashtā nasl se zarā pūchh le, us par dhyān de jo un ke bāpdādā ne tahqīqāt ke bād mālūm kiyā.

⁹kyūṅki ham ḳhud kal hī paidā hue aur kuchh nahīṅ jānte, zamīn par hamāre din sāy jaise ārizī haiṅ.

¹⁰lekin yih tujhe tālīm de kar bāt batā sakte haiṅ, yih tujhe apne dil meṅ jamāshudā ilm pesh kar sakte haiṅ.

¹¹kyā ābī narsal wahāṅ ugtā hai jahāṅ daldal nahīṅ? kyā sarkanḍā wahāṅ phaltā phūltā hai jahāṅ pānī nahīṅ?

¹²us kī koṅpleṅ abhī nikal rahī haiṅ aur use toṛā nahīṅ gayā ki agar pānī na mile to bāqī hariyālī se pahle hī sūkh jātā hai.

¹³yih hai un kā anjām jo allāh ko bhūl jāte haiṅ, isī tarah bedīn kī ummīd jātī rahtī hai.

¹⁴jis par wuh etimād kartā hai wuh nihāyat hī nāzuk hai, jis par us kā bharosā hai wuh makaṛī ke jāle jaisā kamzor hai.

¹⁵jab wuh jāle par ṭek lagāe to khaṛā nahīṅ rahtā, jab use pakaṛ le to qāim nahīṅ rahtā.

¹⁶bedīn dhūp meṅ shādāb bel kī mānind hai. us kī koṅpleṅ chāroṅ taraf phail jātī,

¹⁷us kī jaṛeṅ patthar ke ḍher par chhā kar un meṅ ṭik jātī haiṅ.

¹⁸lekin agar use ukhāṛā jāe to jis jagah pahle ug rahī thī wuh us kā inkār karke kahegī, ‘maiṅ ne tujhe kabhī dekhā bhī nahīṅ.’

¹⁹yih hai us kī rāh kī nām-nihād ḳhushī! jahāṅ pahle thā wahāṅ dīgar paude zamīn se phūṭ nikleṅge.

²⁰yaqīnan allāh be'ilzām ādmī ko mustarad nahīṅ kartā, yaqīnan wuh sharīr ādmī ke hāth mazbūt nahīṅ kartā.

²¹wuh ek bār phir tujhe aisī ḳhushī baḳhshegā ki tū haṅs uṭhegā aur shādmānī ke nāre lagāegā.

²²jo tujh se nafrat karte haiṅ wuh sharm se mulabbas ho jāeṅge, aur bedīnoṅ ke ḳhaime nest-o-nābūd hoṅge.”