Read Roman Urdu Geo ayyūb 9 Bible Online

ayyūb 9 - Roman Urdu Geo bible

ayyūb 9

¹ayyūb ne jawāb de kar kahā,

²“maiṅ ḳhūb jāntā hūṅ ki terī bāt durust hai. lekin allāh ke huzūr insān kis tarah rāstbāz ṭhahar saktā hai?

³agar wuh adālat meṅ allāh ke sāth laṛnā chāhe to us ke hazār sawālāt par ek kā bhī jawāb nahīṅ de sakegā.

⁴allāh kā dil dānishmand aur us kī qudrat azīm hai. kaun kabhī us se bahs-mubāhasā karke kāmyāb rahā hai?

⁵allāh pahāṛoṅ ko khiskā detā hai, aur unheṅ patā hī nahīṅ chaltā. wuh ġhusse meṅ ā kar unheṅ ulṭā detā hai.

⁶wuh zamīn ko hilā detā hai to wuh laraz kar apnī jagah se haṭ jātī hai, us ke bunyādī satūn kāṅp uṭhte haiṅ.

⁷wuh sūraj ko hukm detā hai to tulū nahīṅ hotā, sitāroṅ par muhr lagātā hai to un kī chamak-damak band ho jātī hai.

⁸allāh hī āsmān ko ḳhaime kī tarah tān detā, wuhī samundarī azhdahe kī pīṭh ko pāoṅ tale kuchal detā hai.

⁹wuhī dubb-e-akbar, jauze, ḳhoshā-e-parwīn aur junūbī sitāroṅ ke jhurmaṭoṅ kā ḳhāliq hai.

¹⁰wuh itne azīm kām kartā hai ki koī un kī tah tak nahīṅ pahuṅch saktā, itne mojize kartā hai ki koī unheṅ gin nahīṅ saktā.

¹¹jab wuh mere sāmne se guzare to maiṅ use nahīṅ deḳhtā, jab wuh mere qarīb se phire to mujhe mālūm nahīṅ hotā.

¹²agar wuh kuchh chhīn le to kaun use rokegā? kaun us se kahegā, ‘tū kyā kar rahā hai?’

¹³allāh to apnā ġhazab nāzil karne se bāz nahīṅ ātā. us ke rob tale rahab azhdahe ke madadgār bhī dabak gae.

¹⁴to phir maiṅ kis tarah use jawāb dūṅ, kis tarah us se bāt karne ke munāsib alfāz chun lūṅ?

¹⁵agar maiṅ haq par hotā bhī to apnā difā na kar saktā. is muḳhālif se maiṅ iltijā karne ke ilāwā aur kuchh nahīṅ kar saktā.

¹⁶agar wuh merī chīḳhoṅ kā jawāb detā bhī to mujhe yaqīn na ātā ki wuh merī bāt par dhyān degā.

¹⁷thoṛī sī ġhaltī ke jawāb meṅ wuh mujhe pāsh pāsh kartā, bilāwajah mujhe bār bār zaḳhmī kartā hai.

¹⁸wuh mujhe sāṅs bhī nahīṅ lene detā balki kaṛwe zahr se ser kar detā hai.

¹⁹jahāṅ tāqat kī bāt hai to wuhī qawī hai, jahāṅ insāf kī bāt hai to kaun use peshī ke lie bulā saktā hai?

²⁰go maiṅ begunāh hūṅ to bhī merā apnā muṅh mujhe qusūrwār ṭhahrāegā, go be'ilzām hūṅ to bhī wuh mujhe mujrim qarār degā.

²¹jo kuchh bhī ho, maiṅ be'ilzām hūṅ! maiṅ apnī jān kī parwā hī nahīṅ kartā, apnī zindagī haqīr jāntā hūṅ.

²²ḳhair, ek hī bāt hai, is lie maiṅ kahtā hūṅ, ‘allāh be'ilzām aur bedīn donoṅ ko hī halāk kar detā hai.’

²³jab kabhī achānak koī āfat insān ko maut ke ghāṭ utāre to allāh begunāh kī pareshānī par haṅstā hai.

²⁴agar koī mulk bedīn ke hawāle kiyā jāe to allāh us ke qāziyoṅ kī āṅkheṅ band kar detā hai. agar yih us kī taraf se nahīṅ to phir kis kī taraf se hai?

²⁵mere din dauṛne wāle ādmī se kahīṅ zyādā tezī se bīt gae. ḳhushī dekhe baġhair bhāg nikle haiṅ.

²⁶wuh sarkanḍe ke bahrī jahāzoṅ kī tarah guzar gae haiṅ, us uqāb kī tarah jo apne shikār par jhapaṭṭā mārtā hai.

²⁷agar maiṅ kahūṅ, ‘āo maiṅ apnī āheṅ bhūl jāūṅ, apne chehre kī udāsī dūr karke ḳhushī kā izhār karūṅ’

²⁸to phir bhī maiṅ un tamām takālīf se ḍartā hūṅ jo mujhe bardāsht karnī haiṅ. kyūṅki maiṅ jāntā hūṅ ki tū mujhe begunāh nahīṅ ṭhahrātā.

²⁹jo kuchh bhī ho mujhe qusūrwār hī qarār diyā gayā hai, chunāṅche is kā kyā fāidā ki maiṅ bemānī tag-o-dau meṅ masrūf rahūṅ?

³⁰go maiṅ sābun se nahā lūṅ aur apne hāth soḍe [7] se dho lūṅ

³¹tāham tū mujhe gaṛhe kī kīchaṛ meṅ yūṅ dhaṅsne detā hai ki mujhe apne kapṛoṅ se ghin ātī hai.

³²allāh to mujh jaisā insān nahīṅ ki maiṅ jawāb meṅ us se kahūṅ, ‘āo ham adālat meṅ jā kar ek dūsre kā muqābalā kareṅ.’

³³kāsh hamāre darmiyān sālis ho jo ham donoṅ par hāth rakhe,

³⁴jo merī pīṭh par se allāh kā ḍanḍā haṭāe tāki us kā ḳhauf mujhe dahshatzadā na kare.

³⁵tab maiṅ allāh se ḳhauf khāe baġhair boltā, kyūṅki fitrī taur par maiṅ aisā nahīṅ hūṅ.