Read Roman Urdu Geo zabūr 103 Bible Online

zabūr 103 - Roman Urdu Geo bible

zabūr 103

¹dāūd kā zabūr. ai merī jān, rab kī satāish kar! merā rag-o-reshā us ke quddūs nām kī hamd kare!

²ai merī jān, rab kī satāish kar aur jo kuchh us ne tere lie kiyā hai use bhūl na jā.

³kyūṅki wuh tere tamām gunāhoṅ ko muāf kartā, tujhe tamām bīmāriyoṅ se shifā detā hai.

⁴wuh iwazānā de kar terī jān ko maut ke gaṛhe se chhuṛā letā, tere sar ko apnī shafqat aur rahm t ke tāj se ārāstā kartā hai.

⁵wuh terī zindagī ko achchhī chīzoṅ se ser kartā hai, aur tū dubārā jawān ho kar uqāb kī sī taqwiyat pātā hai.

⁶rab tamām mazlūmoṅ ke lie rāstī aur insāf qāim kartā hai.

⁷us ne apnī rāheṅ mūsā par aur apne azīm kām isrāīliyoṅ par zāhir kie.

⁸rab rahīm aur mehrbān hai, wuh tahammul aur shafqat se bharpūr hai.

⁹na wuh hameshā ḍānṭtā rahegā, na abad tak nārāz rahegā.

¹⁰na wuh hamārī ḳhatāoṅ ke mutābiq sazā detā, na hamāre gunāhoṅ kā munāsib ajr detā hai.

¹¹kyūṅki jitnā buland āsmān hai, utnī hī azīm us kī shafqat un par hai jo us kā ḳhauf mānte haiṅ.

¹²jitnī dūr mashriq maġhrib se hai utnā hī us ne hamāre qusūr ham se dūr kar die haiṅ.

¹³jis tarah bāp apne bachchoṅ par tars khātā hai usī tarah rab un par tars khātā hai jo us kā ḳhauf mānte haiṅ.

¹⁴kyūṅki wuh hamārī sāḳht jāntā hai, use yād hai ki ham ḳhāk hī haiṅ.

¹⁵insān ke din ghās kī mānind haiṅ, aur wuh janglī phūl kī tarah hī phaltā phūltā hai.

¹⁶jab us par se hawā guzare to wuh nahīṅ rahtā, aur us ke nām-o-nishān kā bhī patā nahīṅ chaltā.

¹⁷lekin jo rab kā ḳhauf māneṅ un par wuh hameshā tak mehrbānī karegā, wuh apnī rāstī un ke potoṅ aur nawāsoṅ par bhī zāhir karegā.

¹⁸shart yih hai ki wuh us ke ahd ke mutābiq zindagī guzāreṅ aur dhyān se us ke ahkām par amal kareṅ.

¹⁹rab ne āsmān par apnā taḳht qāim kiyā hai, aur us kī bādshāhī sab par hukūmat kartī hai.

²⁰ai rab ke farishto, us ke tāqatwar sūrmāo, jo us ke farmān pūre karte ho tāki us kā kalām mānā jāe, rab kī satāish karo!

²¹ai tamām lashkaro, tum sab jo us ke ḳhādim ho aur us kī marzī pūrī karte ho, rab kī satāish karo!

²²tum sab jinheṅ us ne banāyā, rab kī satāish karo! us kī saltanat kī har jagah par us kī tamjīd karo. ai merī jān, rab kī satāish kar!