Read Roman Urdu Geo zabūr 105 Bible Online

zabūr 105 - Roman Urdu Geo bible

zabūr 105

¹rab kā shukr karo aur us kā nām pukāro! aqwām meṅ us ke kāmoṅ kā elān karo.

²sāz bajā kar us kī madahsarāī karo. us ke tamām ajāib ke bāre meṅ logoṅ ko batāo.

³us ke muqaddas nām par faḳhr karo. rab ke tālib dil se ḳhush hoṅ.

⁴rab aur us kī qudrat kī daryāft karo, har waqt us ke chehre ke tālib raho.

⁵jo mojize us ne kie unheṅ yād karo. us ke ilāhī nishān aur us ke muṅh ke faisle dohrāte raho.

⁶tum jo us ke ḳhādim ibrāhīm kī aulād aur yāqūb ke farzand ho, jo us ke barguzīdā log ho, tumheṅ sab kuchh yād rahe!

⁷wuhī rab hamārā ḳhudā hai, wuhī pūrī duniyā kī adālat kartā hai.

⁸wuh hameshā apne ahd kā ḳhayāl rakhtā hai, us kalām kā jo us ne hazār pushtoṅ ke lie farmāyā thā.

⁹yih wuh ahd hai jo us ne ibrāhīm se bāndhā, wuh wādā jo us ne qasam khā kar is'hāq se kiyā thā.

¹⁰us ne use yāqūb ke lie qāim kiyā tāki wuh us ke mutābiq zindagī guzāre, us ne tasdīq kī ki yih merā isrāīl se abadī ahd hai.

¹¹sāth sāth us ne farmāyā, “maiṅ tujhe mulk-e-kan'ān dūṅgā. yih terī mīrās kā hissā hogā.”

¹²us waqt wuh tādād meṅ kam aur thoṛe hī the balki mulk meṅ ajnabī hī the.

¹³ab tak wuh muḳhtalif qaumoṅ aur saltanatoṅ meṅ ghūmte phirte the.

¹⁴lekin allāh ne un par kisī ko zulm karne na diyā, aur un kī ḳhātir us ne bādshāhoṅ ko ḍānṭā,

¹⁵“mere masah kie hue ḳhādimoṅ ko mat chheṛnā, mere nabiyoṅ ko nuqsān mat pahuṅchānā.”

¹⁶phir allāh ne mulk-e-kan'ān meṅ kāl paṛne diyā aur ḳhurāk kā har zaḳhīrā ḳhatm kiyā.

¹⁷lekin us ne un ke āge āge ek ādmī ko misr bhejā yānī yūsuf ko jo ġhulām ban kar faroḳht huā.

¹⁸us ke pāoṅ aur gardan zanjīroṅ meṅ jakaṛe rahe

¹⁹jab tak wuh kuchh pūrā na huā jis kī peshgoī yūsuf ne kī thī, jab tak rab ke farmān ne us kī tasdīq na kī.

²⁰tab misrī bādshāh ne apne bandoṅ ko bhej kar use rihāī dī, qaumoṅ ke hukmrān ne use āzād kiyā.

²¹us ne use apne gharāne par nigarān aur apnī tamām milkiyat par hukmrān muqarrar kiyā.

²²yūsuf ko fir'aun ke raīsoṅ ko apnī marzī ke mutābiq chalāne aur misrī buzurgoṅ ko hikmat kī tālīm dene kī zimmādārī bhī dī gaī.

²³phir yāqūb kā ḳhāndān misr āyā, aur isrāīl hām ke mulk meṅ ajnabī kī haisiyat se basne lagā.

²⁴wahāṅ allāh ne apnī qaum ko bahut phalne phūlne diyā, us ne use us ke dushmanoṅ se zyādā tāqatwar banā diyā.

²⁵sāth sāth us ne misriyoṅ kā rawayyā badal diyā, to wuh us kī qaum isrāīl se nafrat karke rab ke ḳhādimoṅ se chālākiyāṅ karne lage.

²⁶tab allāh ne apne ḳhādim mūsā aur apne chune hue bande hārūn ko misr meṅ bhejā.

²⁷mulk-e-hām meṅ ā kar unhoṅ ne un ke darmiyān allāh ke ilāhī nishān aur mojize dikhāe.

²⁸allāh ke hukm par misr par tārīkī chhā gaī, mulk meṅ andherā ho gayā. lekin unhoṅ ne us ke farmān na māne.

²⁹us ne un kā pānī ḳhūn meṅ badal kar un kī machhliyoṅ ko marwā diyā.

³⁰misr ke mulk par meṅḍakoṅ ke ġhol chhā gae jo un ke hukmrānoṅ ke andarūnī kamroṅ tak pahuṅch gae.

³¹allāh ke hukm par misr ke pūre ilāqe meṅ makkhiyoṅ aur jū'oṅ ke ġhol phail gae.

³²bārish kī bajāe us ne un ke mulk par ole aur dahakte shole barsāe.

³³us ne un kī angūr kī beleṅ aur anjīr ke daraḳht tabāh kar die, un ke ilāqe ke daraḳht toṛ ḍāle.

³⁴us ke hukm par anginat ṭiḍḍiyāṅ apne bachchoṅ samet mulk par hamlā-āwar huīṅ.

³⁵wuh un ke mulk kī tamām hariyālī aur un ke khetoṅ kī tamām paidāwār chaṭ kar gaīṅ.

³⁶phir allāh ne misr meṅ tamām pahlauṭhoṅ ko mār ḍālā, un kī mardānagī kā pahlā phal tamām huā.

³⁷is ke bād wuh isrāīl ko chāṅdī aur sone se nawāz kar misr se nikāl lāyā. us waqt us ke qabīloṅ meṅ ṭhokar khāne wālā ek bhī nahīṅ thā.

³⁸misr ḳhush thā jab wuh rawānā hue, kyūṅki un par isrāīl kī dahshat chhā gaī thī.

³⁹din ko allāh ne un ke ūpar bādal kambal kī tarah bichhā diyā, rāt ko āg muhayyā kī tāki raushnī ho.

⁴⁰jab unhoṅ ne ḳhurāk māṅgī to us ne unheṅ baṭer pahuṅchā kar āsmānī roṭī se ser kiyā.

⁴¹us ne chaṭān ko chāk kiyā to pānī phūṭ niklā, aur registān meṅ pānī kī nadiyāṅ bahne lagīṅ.

⁴²kyūṅki us ne us muqaddas wāde kā ḳhayāl rakhā jo us ne apne ḳhādim ibrāhīm se kiyā thā.

⁴³chunāṅche wuh apnī chunī huī qaum ko misr se nikāl lāyā, aur wuh ḳhushī aur shādmānī ke nāre lagā kar nikal āe.

⁴⁴us ne unheṅ dīgar aqwām ke mamālik die, aur unhoṅ ne dīgar ummatoṅ kī mehnat ke phal par qabzā kiyā.

⁴⁵kyūṅki wuh chāhtā thā ki wuh us ke ahkām aur hidāyāt ke mutābiq zindagī guzāreṅ. rab kī hamd ho.