Read Roman Urdu Geo zabūr 106 Bible Online

zabūr 106 - Roman Urdu Geo bible

zabūr 106

¹rab kī hamd ho! rab kā shukr karo, kyūṅki wuh bhalā hai, aur us kī shafqat abadī hai.

²kaun rab ke tamām azīm kām sunā saktā, kaun us kī munāsib tamjīd kar saktā hai?

³mubārak haiṅ wuh jo insāf qāim rakhte, jo har waqt rāst kām karte haiṅ.

⁴ai rab, apnī qaum par mehrbānī karte waqt merā ḳhayāl rakh, najāt dete waqt merī bhī madad kar

⁵tāki maiṅ tere chune hue logoṅ kī ḳhushhālī dekh sakūṅ aur terī qaum kī ḳhushī meṅ sharīk ho kar terī mīrās ke sāth satāish kar sakūṅ.

⁶ham ne apne bāpdādā kī tarah gunāh kiyā hai, ham se nāinsāfī aur bedīnī sarzad huī hai.

⁷jab hamāre bāpdādā misr meṅ the to unheṅ tere mojizoṅ kī samajh na āī aur terī muta'addid mehrbāniyāṅ yād na rahīṅ balki wuh samundar yānī bahr-e-qulzum par sarkash hue.

⁸to bhī us ne unheṅ apne nām kī ḳhātir bachāyā, kyūṅki wuh apnī qudrat kā izhār karnā chāhtā thā.

⁹us ne bahr-e-qulzum ko jhiṛkā to wuh ḳhushk ho gayā. us ne unheṅ samundar kī gahrāiyoṅ meṅ se yūṅ guzarne diyā jis tarah registān meṅ se.

¹⁰us ne unheṅ nafrat karne wāle ke hāth se chhuṛāyā aur iwazānā de kar dushman ke hāth se rihā kiyā.

¹¹un ke muḳhālif pānī meṅ ḍūb gae. ek bhī na bachā.

¹²tab unhoṅ ne allāh ke farmānoṅ par īmān lā kar us kī madahsarāī kī.

¹³lekin jald hī wuh us ke kām bhūl gae. wuh us kī marzī kā intizār karne ke lie tayyār na the.

¹⁴registān meṅ shadīd lālach meṅ ā kar unhoṅ ne wahīṅ bayābān meṅ allāh ko āzmāyā.

¹⁵tab us ne un kī darḳhwāst pūrī kī, lekin sāth sāth mohlak wabā bhī un meṅ phailā dī.

¹⁶ḳhaimāgāh meṅ wuh mūsā aur rab ke muqaddas imām hārūn se hasad karne lage.

¹⁷tab zamīn khul gaī, aur us ne dātan ko haṛap kar liyā, abīrām ke jaththe ko apne andar dafn kar liyā.

¹⁸āg un ke jaththe meṅ bhaṛak uṭhī, aur bedīn nazar-e-ātish hue.

¹⁹wuh koh-e-horib yānī sīnā ke dāman meṅ bachhṛe kā but ḍhāl kar us ke sāmne aundhe muṅh ho gae.

²⁰unhoṅ ne allāh ko jalāl dene ke bajāe ghās khāne wāle bail kī pūjā kī.

²¹wuh allāh ko bhūl gae. hālāṅki usī ne unheṅ chhuṛāyā thā, usī ne misr meṅ azīm kām kie the.

²²jo mojize hām ke mulk meṅ hue aur jo jalālī wāqiāt bahr-e-qulzum par pesh āe the wuh sab allāh ke hāth se hue the.

²³chunāṅche allāh ne farmāyā ki maiṅ unheṅ nest-o-nābūd karūṅga. lekin us kā chunā huā ḳhādim mūsā raḳhne meṅ khaṛā ho gayā tāki us ke ġhazab ko isrāīliyoṅ ko miṭāne se roke. sirf is wajah se allāh apne irāde se bāz āyā.

²⁴phir unhoṅ ne kan'ān ke ḳhushgawār mulk ko haqīr jānā. unheṅ yaqīn nahīṅ thā ki allāh apnā wādā pūrā karegā.

²⁵wuh apne ḳhaimoṅ meṅ buṛbuṛāne lage aur rab kī āwāz sunane ke lie tayyār na hue.

²⁶tab us ne apnā hāth un ke ḳhilāf uṭhāyā tāki unheṅ wahīṅ registān meṅ halāk kare

²⁷aur un kī aulād ko dīgar aqwām meṅ phaiṅk kar muḳhtalif mamālik meṅ muntashir kar de.

²⁸wuh bāl-faġhūr dewatā se lipaṭ gae aur murdoṅ ke lie pesh kī gaī qurbāniyoṅ kā gosht khāne lage.

²⁹unhoṅ ne apnī harkatoṅ se rab ko taish dilāyā to un meṅ mohlak bīmārī phail gaī.

³⁰lekin fīnhās ne uṭh kar un kī adālat kī. tab wabā ruk gaī.

³¹isī binā par allāh ne use pusht-dar-pusht aur abad tak rāstbāz qarār diyā.

³²marībā ke chashme par bhī unhoṅ ne rab ko ġhussā dilāyā. un hī ke bāis mūsā kā burā hāl huā.

³³kyūṅki unhoṅ ne us ke dil meṅ itnī talḳhī paidā kī ki us ke muṅh se bejā bāteṅ niklīṅ.

³⁴jo dīgar qaumeṅ mulk meṅ thīṅ unheṅ unhoṅ ne nest na kiyā, hālāṅki rab ne unheṅ yih karne ko kahā thā.

³⁵na sirf yih balki wuh ġhairqaumoṅ se rishtā bāndh kar un meṅ ghul mil gae aur un ke rasm-o-riwāj apnā lie.

³⁶wuh un ke butoṅ kī pūjā karne meṅ lag gae. aur yih un ke lie phande kā bāis ban gae.

³⁷wuh apne beṭe-beṭiyoṅ ko badrūhoṅ ke huzūr qurbān karne se bhī na katrāe.

³⁸hāṅ, unhoṅ ne apne beṭe-beṭiyoṅ ko kan'ān ke dewatāoṅ ke huzūr pesh karke un kā māsūm ḳhūn bahāyā. is se mulk kī behurmatī huī.

³⁹wuh apnī ġhalat harkatoṅ se nāpāk aur apne zinākārānā kāmoṅ se allāh se bewafā hue.

⁴⁰tab allāh apnī qaum se saḳht nārāz huā, aur use apnī maurūsī milkiyat se ghin āne lagī.

⁴¹us ne unheṅ dīgar qaumoṅ ke hawāle kiyā, aur jo un se nafrat karte the wuh un par hukūmat karne lage.

⁴²un ke dushmanoṅ ne un par zulm karke un ko apnā mutī banā liyā.

⁴³allāh bār bār unheṅ chhuṛātā rahā, hālāṅki wuh apne sarkash mansūboṅ par tule rahe aur apne qusūr meṅ ḍūbte gae.

⁴⁴lekin us ne madad ke lie un kī āheṅ sun kar un kī musībat par dhyān diyā.

⁴⁵us ne un ke sāth apnā ahd yād kiyā, aur wuh apnī baṛī shafqat ke bāis pachhtāyā.

⁴⁶us ne hone diyā ki jis ne bhī unheṅ giriftār kiyā us ne un par tars khāyā.

⁴⁷ai rab hamāre ḳhudā, hameṅ bachā! hameṅ dīgar qaumoṅ se nikāl kar jamā kar. tab hī ham tere muqaddas nām kī satāish kareṅge aur tere qābil-e-tārīf kāmoṅ par faḳhr kareṅge.

⁴⁸azal se abad tak rab, isrāīl ke ḳhudā kī hamd ho. tamām qaum kahe, “āmīn! rab kī hamd ho!”