Read Roman Urdu Geo zabūr 107 Bible Online

zabūr 107 - Roman Urdu Geo bible

zabūr 107

¹rab kā shukr karo, kyūṅki wuh bhalā hai, aur us kī shafqat abadī hai.

²rab ke najātyāftā jin ko us ne iwazānā de kar dushman ke qabze se chhuṛāyā hai sab yih kaheṅ.

³us ne unheṅ mashriq se maġhrib tak aur shimāl se junūb tak dīgar mamālik se ikaṭṭhā kiyā hai.

⁴bāz registān meṅ sahīh rāstā bhūl kar wīrān rāste par māre māre phire, aur kahīṅ bhī ābādī na milī.

⁵bhūk aur pyās ke māre un kī jān niḍhāl ho gaī.

⁶tab unhoṅ ne apnī musībat meṅ rab ko pukārā, aur us ne unheṅ un kī tamām pareshāniyoṅ se chhuṭkārā diyā.

⁷us ne unheṅ sahīh rāh par lā kar aisī ābādī tak pahuṅchāyā jahāṅ rah sakte the.

⁸wuh rab kā shukr kareṅ ki us ne apnī shafqat aur apne mojize insān par zāhir kie haiṅ.

⁹kyūṅki wuh pyāsī jān ko āsūdā kartā aur bhūkī jān ko kasrat kī achchhī chīzoṅ se ser kartā hai.

¹⁰dūsre zanjīroṅ aur musībat meṅ jakaṛe hue andhere aur gahrī tārīkī meṅ baste the,

¹¹kyūṅki wuh allāh ke farmānoṅ se sarkash hue the, unhoṅ ne allāh t'ālā kā faislā haqīr jānā thā.

¹²is lie allāh ne un ke dil ko taqlīf meṅ mubtalā karke past kar diyā. jab wuh ṭhokar khā kar gir gae aur madad karne wālā koī na rahā thā

¹³to unhoṅ ne apnī musībat meṅ rab ko pukārā, aur us ne unheṅ un kī tamām pareshāniyoṅ se chhuṭkārā diyā.

¹⁴wuh unheṅ andhere aur gahrī tārīkī se nikāl lāyā aur un kī zanjīreṅ toṛ ḍālīṅ.

¹⁵wuh rab kā shukr kareṅ ki us ne apnī shafqat aur apne mojize insān par zāhir kie haiṅ.

¹⁶kyūṅki us ne pītal ke darwāze toṛ ḍāle, lohe ke kunḍe ṭukṛe ṭukṛe kar die haiṅ.

¹⁷kuchh log ahmaq the, wuh apne sarkash chāl-chalan aur gunāhoṅ ke bāis pareshāniyoṅ meṅ mubtalā hue.

¹⁸unheṅ har ḳhurāk se ghin āne lagī, aur wuh maut ke darwāzoṅ ke qarīb pahuṅche.

¹⁹tab unhoṅ ne apnī musībat meṅ rab ko pukārā, aur us ne unheṅ un kī tamām pareshāniyoṅ se chhuṭkārā diyā.

²⁰us ne apnā kalām bhej kar unheṅ shifā dī aur unheṅ maut ke gaṛhe se bachāyā.

²¹wuh rab kā shukr kareṅ ki us ne apnī shafqat aur mojize insān par zāhir kie haiṅ.

²²wuh shukrguzārī kī qurbāniyāṅ pesh kareṅ aur ḳhushī ke nāre lagā kar us ke kāmoṅ kā charchā kareṅ.

²³bāz bahrī jahāz meṅ baiṭh gae aur tijārat ke silsile meṅ samundar par safar karte karte dūrdarāz ilāqoṅ tak pahuṅche.

²⁴unhoṅ ne rab ke azīm kām aur samundar kī gahrāiyoṅ meṅ us ke mojize dekhe haiṅ.

²⁵kyūṅki rab ne hukm diyā to āṅdhī chalī jo samundar kī maujeṅ bulandiyoṅ par lāī.

²⁶wuh āsmān tak chaṛhīṅ aur gahrāiyoṅ tak utrīṅ. pareshānī ke bāis mallāhoṅ kī himmat jawāb de gaī.

²⁷wuh sharāb meṅ dhut ādmī kī tarah laṛkhaṛāte aur ḍagmagāte rahe. un kī tamām hikmat nākām sābit huī.

²⁸tab unhoṅ ne apnī musībat meṅ rab ko pukārā, aur us ne unheṅ tamām pareshāniyoṅ se chhuṭkārā diyā.

²⁹us ne samundar ko thamā diyā aur ḳhāmoshī phail gaī, lahreṅ sākit ho gaīṅ.

³⁰musāfir pursukūn hālāt dekh kar ḳhush hue, aur allāh ne unheṅ manzil-e-maqsūd tak pahuṅchāyā.

³¹wuh rab kā shukr kareṅ ki us ne apnī shafqat aur apne mojize insān par zāhir kie haiṅ.

³²wuh qaum kī jamā'at meṅ us kī tāzīm kareṅ, buzurgoṅ kī majlis meṅ us kī hamd kareṅ.

³³kaī jaghoṅ par wuh daryāoṅ ko registān meṅ aur chashmoṅ ko pyāsī zamīn meṅ badal detā hai.

³⁴bāshindoṅ kī burāī dekh kar wuh zarḳhez zamīn ko kallar ke bayābān meṅ badal detā hai.

³⁵dūsrī jaghoṅ par wuh registān ko jhīl meṅ aur pyāsī zamīn ko chashmoṅ meṅ badal detā hai.

³⁶wahāṅ wuh bhūkoṅ ko basā detā hai tāki ābādiyāṅ qāim kareṅ.

³⁷tab wuh khet aur angūr ke bāġh lagāte haiṅ jo ḳhūb phal lāte haiṅ.

³⁸allāh unheṅ barkat detā hai to un kī tādād bahut baṛh jātī hai. wuh un ke rewaṛoṅ ko bhī kam hone nahīṅ detā.

³⁹jab kabhī un kī tādād kam ho jātī aur wuh musībat aur dukh ke bojh tale ḳhāk meṅ dab jāte haiṅ

⁴⁰to wuh shurafā par apnī hiqārat unḍel detā aur unheṅ registān meṅ bhagā kar sahīh rāste se dūr phirne detā hai.

⁴¹lekin muhtāj ko wuh musībat kī daldal se nikāl kar sarfarāz kartā aur us ke ḳhāndānoṅ ko bheṛ-bakriyoṅ kī tarah baṛhā detā hai.

⁴²sīdhī rāh par chalne wāle yih dekh kar ḳhush hoṅge, lekin be'insāf kā muṅh band kiyā jāegā.

⁴³kaun dānishmand hai? wuh is par dhyān de, wuh rab kī mehrbāniyoṅ par ġhaur kare.