Read Roman Urdu Geo zabūr 109 Bible Online

zabūr 109 - Roman Urdu Geo bible

zabūr 109

¹dāūd kā zabūr. mausīqī ke rāhnumā ke lie. ai allāh mere faḳhr, ḳhāmosh na rah!

²kyūṅki unhoṅ ne apnā bedīn aur farebdih muṅh mere ḳhilāf khol kar jhūṭī zabān se mere sāth bāt kī hai.

³wuh mujhe nafrat ke alfāz se gher kar bilāwajah mujh se laṛe haiṅ.

⁴merī muhabbat ke jawāb meṅ wuh mujh par apnī dushmanī kā izhār karte haiṅ. lekin duā hī merā sahārā hai.

⁵merī nekī ke iwaz wuh mujhe nuqsān pahuṅchāte aur mere pyār ke badle mujh se nafrat karte haiṅ.

⁶ai allāh, kisī bedīn ko muqarrar kar jo mere dushman ke ḳhilāf gawāhī de, koī muḳhālif us ke dahne hāth khaṛā ho jāe jo us par ilzām lagāe.

⁷muqaddame meṅ use mujrim ṭhahrāyā jāe. us kī duāeṅ bhī us ke gunāhoṅ meṅ shumār kī jāeṅ.

⁸us kī zindagī muḳhtasar ho, koī aur us kī zimmādārī uṭhāe.

⁹us kī aulād yatīm aur us kī bīwī bewā ban jāe.

¹⁰us ke bachche āwārā phireṅ aur bhīk māṅgne par majbūr ho jāeṅ. unheṅ un ke tabāhshudā gharoṅ se nikal kar idhar udhar roṭī ḍhūṅḍnī paṛe.

¹¹jis se us ne qarzā liyā thā wuh us ke tamām māl par qabzā kare, aur ajnabī us kī mehnat kā phal lūṭ leṅ.

¹²koī na ho jo us par mehrbānī kare yā us ke yatīmoṅ par rahm kare.

¹³us kī aulād ko miṭāyā jāe, aglī pusht meṅ un kā nām-o-nishān tak na rahe.

¹⁴rab us ke bāpdādā kī nāinsāfī kā lihāz kare, aur wuh us kī māṅ kī ḳhatā bhī darguzar na kare.

¹⁵un kā burā kirdār rab ke sāmne rahe, aur wuh un kī yād rū-e-zamīn par se miṭā ḍāle.

¹⁶kyūṅki us ko kabhī mehrbānī karne kā ḳhayāl na āyā balki wuh musībatzadā, muhtāj aur shikastādil kā tāqqub kartā rahā tāki use mār ḍāle.

¹⁷use lānat karne kā shauq thā, chunāṅche lānat usī par āe! use barkat denā pasand nahīṅ thā, chunāṅche barkat us se dūr rahe.

¹⁸us ne lānat chādar kī tarah oṛh lī, chunāṅche lānat pānī kī tarah us ke jism meṅ aur tel kī tarah us kī haḍḍiyoṅ meṅ sirāyat kar jāe.

¹⁹wuh kapṛe kī tarah us se lipṭī rahe, paṭke kī tarah hameshā us se kamarbastā rahe.

²⁰rab mere muḳhālifoṅ ko aur unheṅ jo mere ḳhilāf burī bāteṅ karte haiṅ yihī sazā de.

²¹lekin tū ai rab qādir-e-mutlaq, apne nām kī ḳhātir mere sāth mehrbānī kā sulūk kar. mujhe bachā, kyūṅki terī hī shafqat tasallībaḳhsh hai.

²²kyūṅki maiṅ musībatzadā aur zarūratmand hūṅ. merā dil mere andar majrūh hai.

²³shām ke ḍhalte sāy kī tarah maiṅ ḳhatm hone wālā hūṅ. mujhe ṭiḍḍī kī tarah jhāṛ kar dūr kar diyā gayā hai.

²⁴rozā rakhte rakhte mere ghuṭne ḍagmagāne lage aur merā jism sūkh gayā hai.

²⁵maiṅ apne dushmanoṅ ke lie mazāq kā nishānā ban gayā hūṅ. mujhe dekh kar wuh sar hilā kar “taubā taubā” kahte haiṅ.

²⁶ai rab mere ḳhudā, merī madad kar! apnī shafqat kā izhār karke mujhe chhuṛā!

²⁷unheṅ patā chale ki yih tere hāth se pesh āyā hai, ki tū rab hī ne yih sab kuchh kiyā hai.

²⁸jab wuh lānat kareṅ to mujhe barkat de! jab wuh mere ḳhilāf uṭheṅ to baḳhsh de ki sharmindā ho jāeṅ jabki terā ḳhādim ḳhush ho.

²⁹mere muḳhālif ruswāī se mulabbas ho jāeṅ, unheṅ sharmindagī kī chādar oṛhnī paṛe.

³⁰maiṅ zor se rab kī satāish karūṅga, bahutoṅ ke darmiyān us kī hamd karūṅga.

³¹kyūṅki wuh muhtāj ke dahne hāth khaṛā rahtā hai tāki use un se bachāe jo use mujrim ṭhahrāte haiṅ.