Read Roman Urdu Geo zabūr 11 Bible Online

zabūr 11 - Roman Urdu Geo bible

zabūr 11

¹dāūd kā zabūr. mausīqī ke rāhnumā ke lie. maiṅ ne rab meṅ panāh lī hai. to phir tum kis tarah mujh se kahte ho, “chal, parinde kī tarah phaṛphaṛā kar pahāṛoṅ meṅ bhāg jā”?

²kyūṅki dekho, bedīn kamān tān kar tīr ko tāṅt par lagā chuke haiṅ. ab wuh andhere meṅ baiṭh kar is intizār meṅ haiṅ ki dil se sīdhī rāh par chalne wāloṅ par chalāeṅ.

³rāstbāz kyā kare? unhoṅ ne to bunyād ko hī tabāh kar diyā hai.

⁴lekin rab apnī muqaddas sukūnatgāh meṅ hai, rab kā taḳht āsmān par hai. wahāṅ se wuh deḳhtā hai, wahāṅ se us kī āṅkheṅ ādamzādoṅ ko parakhtī haiṅ.

⁵rab rāstbāz ko parakhtā to hai, lekin bedīn aur zālim se nafrat hī kartā hai.

⁶bedīnoṅ par wuh jalte hue koele aur sholāzan gandhak barsā degā. jhulasne wālī āṅdhī un kā hissā hogī.

⁷kyūṅki rab rāst hai, aur use insāf pyārā hai. sirf sīdhī rāh par chalne wāle us kā chehrā dekheṅge.