Read Roman Urdu Geo zabūr 110 Bible Online

zabūr 110 - Roman Urdu Geo bible

zabūr 110

¹dāūd kā zabūr. rab ne mere rab se kahā, “mere dahne hāth baiṭh, jab tak maiṅ tere dushmanoṅ ko tere pāoṅ kī chaukī na banā dūṅ.”

²rab siyyūn se terī saltanat kī sarhaddeṅ baṛhā kar kahegā, “ās-pās ke dushmanoṅ par hukūmat kar!”

³jis din tū apnī fauj ko khaṛā karegā terī qaum ḳhushī se tere pīchhe ho legī. tū muqaddas shān-o-shaukat se ārāstā ho kar tulū-e-subh ke bātin se apnī jawānī kī os pāegā.

⁴rab ne qasam khāī hai aur is se pachhtāegā nahīṅ, “tū abad tak imām hai, aisā imām jaisā malik-e-sidq thā.”

⁵rab tere dahne hāth par rahegā aur apne ġhazab ke din dīgar bādshāhoṅ ko chūr chūr karegā.

⁶wuh qaumoṅ meṅ adālat karke maidān ko lāshoṅ se bhar degā aur dūr tak saroṅ ko pāsh pāsh karegā.

⁷rāste meṅ wuh nadī se pānī pī legā, is lie apnā sar uṭhāe phiregā.