Read Roman Urdu Geo zabūr 111 Bible Online

zabūr 111 - Roman Urdu Geo bible

zabūr 111

¹rab kī hamd ho! maiṅ pūre dil se diyānatdāroṅ kī majlis aur jamā'at meṅ rab kā shukr karūṅga.

²rab ke kām azīm haiṅ. jo un se lutfandoz hote haiṅ wuh un kā ḳhūb mutāla'ā karte haiṅ.

³us kā kām shāndār aur jalālī hai, us kī rāstī abad tak qāim rahtī hai.

⁴wuh apne mojize yād karātā hai. rab mehrbān aur rahīm hai.

⁵jo us kā ḳhauf mānte haiṅ unheṅ us ne ḳhurāk muhayyā kī hai. wuh hameshā tak apne ahd kā ḳhayāl rakhegā.

⁶us ne apnī qaum ko apne zabardast kāmoṅ kā elān karke kahā, “maiṅ tumheṅ ġhairqaumoṅ kī mīrās atā karūṅga.”

⁷jo bhī kām us ke hāth kareṅ wuh sachche aur rāst haiṅ. us ke tamām ahkām qābil-e-etimād haiṅ.

⁸wuh azal se abad tak qāim haiṅ, aur un par sachchāī aur diyānatdārī se amal karnā hai.

⁹us ne apnī qaum kā fidyā bhej kar use chhuṛāyā hai. us ne farmāyā, “merā qaum ke sāth ahd abad tak qāim rahe.” us kā nām quddūs aur purjalāl hai.

¹⁰hikmat is se shurū hotī hai ki ham rab kā ḳhauf māneṅ. jo bhī us ke ahkām par amal kare use achchhī samajh hāsil hogī. us kī hamd hameshā tak qāim rahegī.