Read Roman Urdu Geo zabūr 115 Bible Online

zabūr 115 - Roman Urdu Geo bible

zabūr 115

¹ai rab, hamārī hī izzat kī ḳhātir kām na kar balki is lie ki tere nām ko jalāl mile, is lie ki tū mehrbān aur wafādār ḳhudā hai.

²dīgar aqwām kyūṅ kaheṅ, “un kā ḳhudā kahāṅ hai?”

³hamārā ḳhudā to āsmān par hai, aur jo jī chāhe kartā hai.

⁴un ke but sone-chāṅdī ke haiṅ, insān ke hāth ne unheṅ banāyā hai.

⁵un ke muṅh haiṅ lekin wuh bol nahīṅ sakte. un kī āṅkheṅ haiṅ lekin wuh dekh nahīṅ sakte.

⁶un ke kān haiṅ lekin wuh sun nahīṅ sakte, un kī nāk hai lekin wuh sūṅgh nahīṅ sakte.

⁷un ke hāth haiṅ, lekin wuh chhū nahīṅ sakte. un ke pāoṅ haiṅ, lekin wuh chal nahīṅ sakte. un ke gale se āwāz nahīṅ nikaltī.

⁸jo but banāte haiṅ wuh un kī mānind ho jāeṅ, jo un par bharosā rakhte haiṅ wuh un jaise behiss-o-harkat ho jāeṅ.

⁹ai isrāīl, rab par bharosā rakh! wuhī terā sahārā aur terī ḍhāl hai.

¹⁰ai hārūn ke gharāne, rab par bharosā rakh! wuhī terā sahārā aur terī ḍhāl hai.

¹¹ai rab kā ḳhauf mānane wālo, rab par bharosā rakho! wuhī tumhārā sahārā aur tumhārī ḍhāl hai.

¹²rab ne hamārā ḳhayāl kiyā hai, aur wuh hameṅ barkat degā. wuh isrāīl ke gharāne ko barkat degā, wuh hārūn ke gharāne ko barkat degā.

¹³wuh rab kā ḳhauf mānane wāloṅ ko barkat degā, ḳhwāh chhoṭe hoṅ yā baṛe.

¹⁴rab tumhārī tādād meṅ izāfā kare, tumhārī bhī aur tumhārī aulād kī bhī.

¹⁵rab jo āsmān-o-zamīn kā ḳhāliq hai tumheṅ barkat se mālāmāl kare.

¹⁶āsmān to rab kā hai, lekin zamīn ko us ne ādamzādoṅ ko baḳhsh diyā hai.

¹⁷ai rab, murde terī satāish nahīṅ karte, ḳhāmoshī ke mulk meṅ utarne wāloṅ meṅ se koī bhī terī tamjīd nahīṅ kartā.

¹⁸lekin ham rab kī satāish ab se abad tak kareṅge. rab kī hamd ho!