Read Roman Urdu Geo zabūr 116 Bible Online

zabūr 116 - Roman Urdu Geo bible

zabūr 116

¹maiṅ rab se muhabbat rakhtā hūṅ, kyūṅki us ne merī āwāz aur merī iltijā sunī hai.

²us ne apnā kān merī taraf jhukāyā hai, is lie maiṅ umr bhar use pukārūṅga.

³maut ne mujhe apnī zanjīroṅ meṅ jakaṛ liyā, aur pātāl kī pareshāniyāṅ mujh par ġhālib āīṅ. maiṅ musībat aur dukh meṅ phaṅs gayā.

⁴tab maiṅ ne rab kā nām pukārā, “ai rab, mehrbānī karke mujhe bachā!”

⁵rab mehrbān aur rāst hai, hamārā ḳhudā rahīm hai.

⁶rab sādā logoṅ kī hifāzat kartā hai. jab maiṅ pasthāl thā to us ne mujhe bachāyā.

⁷ai merī jān, apnī ārāmgāh ke pās wāpas ā, kyūṅki rab ne tere sāth bhalāī kī hai.

⁸kyūṅki ai rab, tū ne merī jān ko maut se, merī āṅkhoṅ ko āṅsū bahāne se aur mere pāoṅ ko phisalne se bachāyā hai.

⁹ab maiṅ zindoṅ kī zamīn meṅ rah kar rab ke huzūr chalūṅgā.

¹⁰maiṅ īmān lāyā aur is lie bolā, “maiṅ shadīd musībat meṅ phaṅs gayā hūṅ.”

¹¹maiṅ saḳht ghabrā gayā aur bolā, “tamām insān daroġhgo haiṅ.”

¹²jo bhalāiyāṅ rab ne mere sāth kī haiṅ un sab ke iwaz maiṅ kyā dūṅ?

¹³maiṅ najāt kā pyālā uṭhā kar rab kā nām pukārūṅga.

¹⁴maiṅ rab ke huzūr us kī sārī qaum ke sāmne hī apnī mannateṅ pūrī karūṅga.

¹⁵rab kī nigāh meṅ us ke īmāndāroṅ kī maut girāṅqadar hai.

¹⁶ai rab, yaqīnan maiṅ terā ḳhādim, hāṅ terā ḳhādim aur terī ḳhādimā kā beṭā hūṅ. tū ne merī zanjīroṅ ko toṛ ḍālā hai.

¹⁷maiṅ tujhe shukrguzārī kī qurbānī pesh karke terā nām pukārūṅga.

¹⁸maiṅ rab ke huzūr us kī sārī qaum ke sāmne hī apnī mannateṅ pūrī karūṅga.

¹⁹maiṅ rab ke ghar kī bārgāhoṅ meṅ, ai yarūshalam tere bīch meṅ hī unheṅ pūrā karūṅga. rab kī hamd ho.