Read Roman Urdu Geo zabūr 118 Bible Online

zabūr 118 - Roman Urdu Geo bible

zabūr 118

¹rab kā shukr karo, kyūṅki wuh bhalā hai, aur us kī shafqat abadī hai.

²isrāīl kahe, “us kī shafqat abadī hai.”

³hārūn kā gharānā kahe, “us kī shafqat abadī hai.”

⁴rab kā ḳhauf mānane wāle kaheṅ, “us kī shafqat abadī hai.”

⁵musībat meṅ maiṅ ne rab ko pukārā to rab ne merī sun kar mere pāoṅ ko khule maidān meṅ qāim kar diyā hai.

⁶rab mere haq meṅ hai, is lie maiṅ nahīṅ ḍarūṅga. insān merā kyā bigāṛ saktā hai?

⁷rab mere haq meṅ hai aur merā sahārā hai, is lie maiṅ un kī shikast dekh kar ḳhush hūṅgā jo mujh se nafrat karte haiṅ.

⁸rab meṅ panāh lenā insān par etimād karne se kahīṅ behtar hai.

⁹rab meṅ panāh lenā shurafā par etimād karne se kahīṅ behtar hai.

¹⁰tamām aqwām ne mujhe gher liyā, lekin maiṅ ne allāh kā nām le kar unheṅ bhagā diyā.

¹¹unhoṅ ne mujhe gher liyā, hāṅ chāroṅ taraf se gher liyā, lekin maiṅ ne allāh kā nām le kar unheṅ bhagā diyā.

¹²wuh shahd kī makkhiyoṅ kī tarah chāroṅ taraf se mujh par hamlā-āwar hue, lekin kāṅṭedār jhāṛiyoṅ kī āg kī tarah jald hī bujh gae. maiṅ ne rab kā nām le kar unheṅ bhagā diyā.

¹³dushman ne mujhe dhakkā de kar girāne kī koshish kī, lekin rab ne merī madad kī.

¹⁴rab merī quwwat aur merā gīt hai, wuh merī najāt ban gayā hai.

¹⁵ḳhushī aur fath ke nāre rāstbāzoṅ ke ḳhaimoṅ meṅ gūṅjte haiṅ, “rab kā dahnā hāth zabardast kām kartā hai!

¹⁶rab kā dahnā hāth sarfarāz kartā hai, rab kā dahnā hāth zabardast kām kartā hai!”

¹⁷maiṅ nahīṅ marūṅga balki zindā rah kar rab ke kām bayān karūṅga.

¹⁸go rab ne merī saḳht tādīb kī hai, us ne mujhe maut ke hawāle nahīṅ kiyā.

¹⁹rāstī ke darwāze mere lie khol do tāki maiṅ un meṅ dāḳhil ho kar rab kā shukr karūṅ.

²⁰yih rab kā darwāzā hai, isī meṅ rāstbāz dāḳhil hote haiṅ.

²¹maiṅ terā shukr kartā hūṅ, kyūṅki tū ne merī sun kar mujhe bachāyā hai.

²²jis patthar ko makān banāne wāloṅ ne radd kiyā wuh kone kā bunyādī patthar ban gayā.

²³yih rab ne kiyā aur deḳhne meṅ kitnā hairatangez hai.

²⁴isī din rab ne apnī qudrat dikhāī hai. āo, ham shādiyānā bajā kar us kī ḳhushī manāeṅ.

²⁵ai rab, mehrbānī karke hameṅ bachā! ai rab, mehrbānī karke kāmyābī atā farmā!

²⁶mubārak hai wuh jo rab ke nām se ātā hai. rab kī sukūnatgāh se ham tumheṅ barkat dete haiṅ.

²⁷rab hī ḳhudā hai, aur us ne hameṅ raushnī baḳhshī hai. āo, īd kī qurbānī rassiyoṅ se qurbāngāh ke sīṅgoṅ ke sāth bāndho.

²⁸tū merā ḳhudā hai, aur maiṅ terā shukr kartā hūṅ. ai mere ḳhudā, maiṅ terī tāzīm kartā hūṅ.

²⁹rab kī satāish karo, kyūṅki wuh bhalā hai aur us kī shafqat abadī hai.