Read Roman Urdu Geo zabūr 132 Bible Online

zabūr 132 - Roman Urdu Geo bible

zabūr 132

¹ziyārat kā gīt. ai rab, dāūd kā ḳhayāl rakh, us kī tamām musībatoṅ ko yād kar.

²us ne qasam khā kar rab se wādā kiyā aur yāqūb ke qawī ḳhudā ke huzūr mannat mānī,

³“na maiṅ apne ghar meṅ dāḳhil hūṅgā, na bistar par leṭūṅgā,

⁴na maiṅ apnī āṅkhoṅ ko sone dūṅgā, na apne papoṭoṅ ko ūṅghne dūṅgā

⁵jab tak rab ke lie maqām aur yāqūb ke sūrme ke lie sukūnatgāh na mile.”

⁶ham ne ifrātā meṅ ahd ke sandūq kī ḳhabar sunī aur yār ke khule maidān meṅ use pā liyā.

⁷āo, ham us kī sukūnatgāh meṅ dāḳhil ho kar us ke pāoṅ kī chaukī ke sāmne sijdā kareṅ.

⁸ai rab, uṭh kar apnī ārāmgāh ke pās ā, tū aur ahd kā sandūq jo terī qudrat kā izhār hai.

⁹tere imām rāstī se mulabbas ho jāeṅ, aur tere īmāndār ḳhushī ke nāre lagāeṅ.

¹⁰ai allāh, apne ḳhādim dāūd kī ḳhātir apne masah kie hue bande ke chehre ko radd na kar.

¹¹rab ne qasam khā kar dāūd se wādā kiyā hai, aur wuh us se kabhī nahīṅ phiregā, “maiṅ terī aulād meṅ se ek ko tere taḳht par biṭhāūṅgā.

¹²agar tere beṭe mere ahd ke wafādār raheṅ aur un ahkām kī pairawī kareṅ jo maiṅ unheṅ sikhāūṅgā to un ke beṭe bhī hameshā tak tere taḳht par baiṭheṅge.”

¹³kyūṅki rab ne koh-e-siyyūn ko chun liyā hai, aur wuhī wahāṅ sukūnat karne kā ārzūmand thā.

¹⁴us ne farmāyā, “yih hameshā tak merī ārāmgāh hai, aur yahāṅ maiṅ sukūnat karūṅga, kyūṅki maiṅ is kā ārzūmand hūṅ.

¹⁵maiṅ siyyūn kī ḳhurāk ko kasrat kī barkat de kar us ke ġharīboṅ ko roṭī se ser karūṅga.

¹⁶maiṅ us ke imāmoṅ ko najāt se mulabbas karūṅga, aur us ke īmāndār ḳhushī se zordār nāre lagāeṅge.

¹⁷yahāṅ maiṅ dāūd kī tāqat baṛhā dūṅgā, [19] aur yahāṅ maiṅ ne apne masah kie hue ḳhādim ke lie charāġh tayyār kar rakhā hai.

¹⁸maiṅ us ke dushmanoṅ ko sharmindagī se mulabbas karūṅga jabki us ke sar kā tāj chamaktā rahegā.”