Read Roman Urdu Geo zabūr 139 Bible Online

zabūr 139 - Roman Urdu Geo bible

zabūr 139

¹dāūd kā zabūr. mausīqī ke rāhnumā ke lie. ai rab, tū merā muāinā kartā aur mujhe ḳhūb jāntā hai.

²merā uṭhnā baiṭhnā tujhe mālūm hai, aur tū dūr se hī merī soch samajhtā hai.

³tū mujhe jāṅchtā hai, ḳhwāh maiṅ rāste meṅ hūṅ yā ārām karūṅ. tū merī tamām rāhoṅ se wāqif hai.

⁴kyūṅki jab bhī koī bāt merī zabān par āe tū ai rab pahle hī us kā pūrā ilm rakhtā hai.

⁵tū mujhe chāroṅ taraf se ghere rakhtā hai, terā hāth mere ūpar hī rahtā hai.

⁶is kā ilm itnā hairānkun aur azīm hai ki maiṅ ise samajh nahīṅ saktā.

⁷maiṅ tere rūh se kahāṅ bhāg jāūṅ, tere chehre se kahāṅ farār ho jāūṅ?

⁸agar āsmān par chaṛh jāūṅ to tū wahāṅ maujūd hai, agar utar kar apnā bistar pātāl meṅ bichhāūṅ to tū wahāṅ bhī hai.

⁹go maiṅ tulū-e-subh ke paroṅ par uṛ kar samundar kī dūrtarīn had par jā basūṅ,

¹⁰wahāṅ bhī terā hāth merī qiyādat karegā, wahāṅ bhī terā dahnā hāth mujhe thāme rakhegā.

¹¹agar maiṅ kahūṅ, “tārīkī mujhe chhupā de, aur mere irdgird kī raushnī rāt meṅ badal jāe,” to bhī koī farq nahīṅ paṛegā.

¹²tere sāmne tārīkī bhī tārīk nahīṅ hotī, tere huzūr rāt din kī tarah raushan hotī hai balki raushnī aur andherā ek jaise hote haiṅ.

¹³kyūṅki tū ne merā bātin banāyā hai, tū ne mujhe māṅ ke peṭ meṅ tashkīl diyā hai.

¹⁴maiṅ terā shukr kartā hūṅ ki mujhe jalālī aur mojizānā taur se banāyā gayā hai. tere kām hairatangez haiṅ, aur merī jān yih ḳhūb jāntī hai.

¹⁵merā ḍhāṅchā tujh se chhupā nahīṅ thā jab mujhe poshīdagī meṅ banāyā gayā, jab mujhe zamīn kī gahrāiyoṅ meṅ tashkīl diyā gayā.

¹⁶terī āṅkhoṅ ne mujhe us waqt dekhā jab mere jism kī shakl abhī nāmukammal thī. jitne bhī din mere lie muqarrar the wuh sab terī kitāb meṅ us waqt darj the, jab ek bhī nahīṅ guzarā thā.

¹⁷ai allāh, tere ḳhayālāt samajhnā mere lie kitnā mushkil hai! un kī kul tādād kitnī azīm hai.

¹⁸agar maiṅ unheṅ gin saktā to wuh ret se zyādā hote. maiṅ jāg uṭhtā hūṅ to tere hī sāth hotā hūṅ.

¹⁹ai allāh, kāsh tū bedīn ko mār ḍāle, ki ḳhūṅḳhār mujh se dūr ho jāeṅ.

²⁰wuh fareb se terā zikr karte haiṅ, hāṅ tere muḳhālif jhūṭ bolte haiṅ.

²¹ai rab, kyā maiṅ un se nafrat na karūṅ jo tujh se nafrat karte haiṅ? kyā maiṅ un se ghin na khāūṅ jo tere ḳhilāf uṭhe haiṅ?

²²yaqīnan maiṅ un se saḳht nafrat kartā hūṅ. wuh mere dushman ban gae haiṅ.

²³ai allāh, merā muāinā karke mere dil kā hāl jān le, mujhe jāṅch kar mere bechain ḳhayālāt ko jān le.

²⁴maiṅ nuqsāndeh rāh par to nahīṅ chal rahā? abadī rāh par merī qiyādat kar!