Read Roman Urdu Geo zabūr 143 Bible Online

zabūr 143 - Roman Urdu Geo bible

zabūr 143

¹dāūd kā zabūr. ai rab, merī duā sun, merī iltijāoṅ par dhyān de. apnī wafādārī aur rāstī kī ḳhātir merī sun!

²apne ḳhādim ko apnī adālat meṅ na lā, kyūṅki tere huzūr koī bhī jāndār rāstbāz nahīṅ ṭhahar saktā.

³kyūṅki dushman ne merī jān kā pīchhā karke use ḳhāk meṅ kuchal diyā hai. us ne mujhe un logoṅ kī tarah tārīkī meṅ basā diyā hai jo baṛe arse se murdā haiṅ.

⁴mere andar merī rūh niḍhāl hai, mere andar merā dil dahshat ke māre behiss-o-harkat ho gayā hai.

⁵maiṅ qadīm zamāne ke din yād kartā aur tere kāmoṅ par ġhaur-o-ḳhauz kartā hūṅ. jo kuchh tere hāthoṅ ne kiyā us meṅ maiṅ mahw-e-ḳhyāl rahtā hūṅ.

⁶maiṅ apne hāth terī taraf uṭhātā hūṅ, merī jān ḳhushk zamīn kī tarah terī pyāsī hai. (silāh)

⁷ai rab, merī sunane meṅ jaldī kar. merī jān to ḳhatm hone wālī hai. apnā chehrā mujh se chhupāe na rakh, warnā maiṅ gaṛhe meṅ utarne wāloṅ kī mānind ho jāūṅgā.

⁸subh ke waqt mujhe apnī shafqat kī ḳhabar sunā, kyūṅki maiṅ tujh par bharosā rakhtā hūṅ. mujhe wuh rāh dikhā jis par mujhe jānā hai, kyūṅki maiṅ terā hī ārzūmand hūṅ.

⁹ai rab, mujhe mere dushmanoṅ se chhuṛā, kyūṅki maiṅ tujh meṅ panāh letā hūṅ.

¹⁰mujhe apnī marzī pūrī karnā sikhā, kyūṅki tū merā ḳhudā hai. terā nek rūh hamwār zamīn par merī rāhnumāī kare.

¹¹ai rab, apne nām kī ḳhātir merī jān ko tāzādam kar. apnī rāstī se merī jān ko musībat se bachā.

¹²apnī shafqat se mere dushmanoṅ ko halāk kar. jo bhī mujhe tang kar rahe haiṅ unheṅ tabāh kar! kyūṅki maiṅ terā ḳhādim hūṅ.