Read Roman Urdu Geo zabūr 144 Bible Online

zabūr 144 - Roman Urdu Geo bible

zabūr 144

¹dāūd kā zabūr. rab merī chaṭān kī hamd ho, jo mere hāthoṅ ko laṛne aur merī ungliyoṅ ko jang karne kī tarbiyat detā hai.

²wuh merī shafqat, merā qilā, merā najātdahindā aur merī ḍhāl hai. usī meṅ maiṅ panāh letā hūṅ, aur wuhī dīgar aqwām ko mere tābe kar detā hai.

³ai rab, insān kaun hai ki tū us kā ḳhayāl rakhe? ādamzād kaun hai ki tū us kā lihāz kare?

⁴insān dam bhar kā hī hai, us ke din tezī se guzarne wāle sāy kī mānind haiṅ.

⁵ai rab, apne āsmān ko jhukā kar utar ā! pahāṛoṅ ko chhū tāki wuh dhuāṅ chhoṛeṅ.

⁶bijlī bhej kar unheṅ muntashir kar, apne tīr chalā kar unheṅ darham-barham kar.

⁷apnā hāth bulandiyoṅ se nīche baṛhā aur mujhe chhuṛā kar pānī kī gahrāiyoṅ aur pardesiyoṅ ke hāth se bachā,

⁸jin kā muṅh jhūṭ boltā aur dahnā hāth fareb detā hai.

⁹ai allāh, maiṅ terī tamjīd meṅ nayā gīt gāūṅgā, das tāroṅ kā sitār bajā kar terī madahsarāī karūṅga.

¹⁰kyūṅki tū bādshāhoṅ ko najāt detā aur apne ḳhādim dāūd ko mohlak talwār se bachātā hai.

¹¹mujhe chhuṛā kar pardesiyoṅ ke hāth se bachā, jin kā muṅh jhūṭ boltā aur dahnā hāth fareb detā hai.

¹²hamāre beṭe jawānī meṅ phalne phūlne wāle paudoṅ kī mānind hoṅ, hamārī beṭiyāṅ mahal ko sajāne ke lie tarāshe hue kone ke satūn kī mānind hoṅ.

¹³hamāre godām bhare raheṅ aur har qism kī ḳhurāk muhayyā kareṅ. hamārī bheṛ-bakriyāṅ hamāre maidānoṅ meṅ hazāroṅ balki beshumār bachche janm deṅ.

¹⁴hamāre gāy-bail moṭe-tāze hoṅ, aur na koī zāe ho jāe, na kisī ko nuqsān pahuṅche. hamāre chaukoṅ meṅ āh-o-zārī kī āwāz sunāī na de.

¹⁵mubārak hai wuh qaum jis par yih sab kuchh sādiq ātā hai, mubārak hai wuh qaum jis kā ḳhudā rab hai!