Read Roman Urdu Geo zabūr 145 Bible Online

zabūr 145 - Roman Urdu Geo bible

zabūr 145

¹dāūd kā zabūr. hamd-o-sanā kā gīt. ai mere ḳhudā, maiṅ terī tāzīm karūṅga. ai bādshāh, maiṅ hameshā tak tere nām kī satāish karūṅga.

²rozānā maiṅ terī tamjīd karūṅga, hameshā tak tere nām kī hamd karūṅga.

³rab azīm aur baṛī tārīf ke lāiq hai. us kī azmat insān kī samajh se bāhar hai.

⁴ek pusht aglī pusht ke sāmne wuh kuchh sarāhe jo tū ne kiyā hai, wuh dūsroṅ ko tere zabardast kām sunāeṅ.

⁵maiṅ tere shāndār jalāl kī azmat aur tere mojizoṅ meṅ mahw-e-ḳhyāl rahūṅgā.

⁶log tere haibatnāk kāmoṅ kī qudrat pesh kareṅ, aur maiṅ bhī terī azmat bayān karūṅga.

⁷wuh josh se terī baṛī bhalāī ko sarāheṅ aur ḳhushī se terī rāstī kī madahsarāī kareṅ.

⁸rab mehrbān aur rahīm hai. wuh tahammul aur shafqat se bharpūr hai.

⁹rab sab ke sāth bhalāī kartā hai, wuh apnī tamām maḳhlūqāt par rahm kartā hai.

¹⁰ai rab, terī tamām maḳhlūqāt terā shukr kareṅ. tere īmāndār terī tamjīd kareṅ.

¹¹wuh terī bādshāhī ke jalāl par faḳhr kareṅ aur terī qudrat bayān kareṅ

¹²tāki ādamzād tere qawī kāmoṅ aur terī bādshāhī kī jalālī shān-o-shaukat se āgāh ho jāeṅ.

¹³terī bādshāhī kī koī intihā nahīṅ, aur terī saltanat pusht-dar-pusht hameshā tak qāim rahegī.

¹⁴rab tamām girne wāloṅ kā sahārā hai. jo bhī dab jāe use wuh uṭhā khaṛā kartā hai.

¹⁵sab kī āṅkheṅ tere intizār meṅ rahtī haiṅ, aur tū har ek ko waqt par us kā khānā muhayyā kartā hai.

¹⁶tū apnī muṭṭhī khol kar har jāndār kī ḳhwāhish pūrī kartā hai.

¹⁷rab apnī tamām rāhoṅ meṅ rāst aur apne tamām kāmoṅ meṅ wafādār hai.

¹⁸rab un sab ke qarīb hai jo use pukārte haiṅ, jo diyānatdārī se use pukārte haiṅ.

¹⁹jo us kā ḳhauf māneṅ un kī ārzū wuh pūrī kartā hai. wuh un kī faryādeṅ sun kar un kī madad kartā hai.

²⁰rab un sab ko mahfūz rakhtā hai jo use pyār karte haiṅ, lekin bedīnoṅ ko wuh halāk kartā hai.

²¹merā muṅh rab kī tārīf bayān kare, tamām maḳhlūqāt hameshā tak us ke muqaddas nām kī satāish kareṅ.