Read Roman Urdu Geo zabūr 147 Bible Online

zabūr 147 - Roman Urdu Geo bible

zabūr 147

¹rab kī hamd ho! apne ḳhudā kī madahsarāī karnā kitnā bhalā hai, us kī tamjīd karnā kitnā pyārā aur ḳhūbsūrat hai.

²rab yarūshalam ko tāmīr kartā aur isrāīl ke muntashir jilāwatanoṅ ko jamā kartā hai.

³wuh dilshikastoṅ ko shifā de kar un ke zaḳhmoṅ par marham-paṭṭī lagātā hai.

⁴wuh sitāroṅ kī tādād gin letā aur har ek kā nām le kar unheṅ bulātā hai.

⁵hamārā rab azīm hai, aur us kī qudrat zabardast hai. us kī hikmat kī koī intihā nahīṅ.

⁶rab musībatzadoṅ ko uṭhā khaṛā kartā lekin badkāroṅ ko ḳhāk meṅ milā detā hai.

⁷rab kī tamjīd meṅ shukr kā gīt gāo, hamāre ḳhudā kī ḳhushī meṅ sarod bajāo.

⁸kyūṅki wuh āsmān par bādal chhāne detā, zamīn ko bārish muhayyā kartā aur pahāṛoṅ par ghās phūṭne detā hai.

⁹wuh maweshī ko chārā aur kawwe ke bachchoṅ ko wuh kuchh khilātā hai jo wuh shor machā kar māṅgte haiṅ.

¹⁰na wuh ghoṛe kī tāqat se lutfandoz hotā, na ādmī kī mazbūt ṭāṅgoṅ se ḳhush hotā hai.

¹¹rab un hī se ḳhush hotā hai jo us kā ḳhauf mānte aur us kī shafqat ke intizār meṅ rahte haiṅ.

¹²ai yarūshalam, rab kī madahsarāī kar! ai siyyūn, apne ḳhudā kī hamd kar!

¹³kyūṅki us ne tere darwāzoṅ ke kunḍe mazbūt karke tere darmiyān basne wālī aulād ko barkat dī hai.

¹⁴wuhī tere ilāqe meṅ amn aur sukūn qāim rakhtā aur tujhe behtarīn gandum se ser kartā hai.

¹⁵wuh apnā farmān zamīn par bhejtā hai to us kā kalām tezī se pahuṅchtā hai.

¹⁶wuh ūn jaisī barf muhayyā kartā aur pālā rākh kī tarah chāroṅ taraf bikher detā hai.

¹⁷wuh apne ole kankaroṅ kī tarah zamīn par phaiṅk detā hai. kaun us kī shadīd sardī bardāsht kar saktā hai?

¹⁸wuh ek bār phir apnā farmān bhejtā hai to barf pighal jātī hai. wuh apnī hawā chalne detā hai to pānī ṭapakne lagtā hai.

¹⁹us ne yāqūb ko apnā kalām sunāyā, isrāīl par apne ahkām aur āīn zāhir kie haiṅ.

²⁰aisā sulūk us ne kisī aur qaum se nahīṅ kiyā. dīgar aqwām to tere ahkām nahīṅ jāntīṅ. rab kī hamd ho!